Yon 1

1

2

3

4

5

6

7

8

9

10

11

12

13

14

15

16

17

18

19

20

21

¹Suwayo kamakikiw bakan uyo kidelongin kudongin banim kal Weng ayo tein bisa. Kale Weng bela Got so biyámsa ade Weng bela Got alata ka.

²Kale Got so Weng so ika suwayo kamakikiw teinbisiw.

³Kale Got ayo Weng dim adikum ufek ufek uyo kidel kusa. Kale ufek ufek adikum be Weng belami banim so kidel kudongin banim.

⁴Kale ata kuw Motabid kayo sun biyámin be kinim imi Lánin

⁵ade Lánin be midilin tem eidába. Kale midilin be wakbak Lánin ayo ten daudomu banim kala.

⁶Kale kinim mak Got dabadála tasa am win be Yon,

⁷kale ata tad nadano Lánin ami kin walase. Kale ami sung uyo weng bakoyama, adikum kidi nadiwe wanang kinim adikum ika Lánin kinim ami dim ken aket kudawokabiw.

⁸Yon ata Lánin bá, kata aka mada Lánin ami kin walamin kinim kuw tasa.

⁹Kale Yesus ata Lánin tatun madák bakan tad kinim eidyamano bidiw ko.

¹⁰Kale be Yesus alata bakan bu kidel ku nadale bakan dim teinsa, kata bakan kayak ika Yesus ayo atam kal keidongin banim.

¹¹Ade aka tad alam bakan tasa, kata alam kinim iyo dakbu aket kudawongin banim keisiw.

¹²Kata kan ata Yesus ayo dew tam am dádokaba, ata kuw Yesus ayo dew yak alam aket tem dádane, alo beta Yesus aka kinim be kitid daudawa ata kuw Got man keidokaba.

¹³Got ami man keimin be dam wanang kinim im man fukanin taw bá. Ade dam wanang kinim num aket fukan bom kana bom naduwo man fukanumo kalin taw bá ade kinim im aket fukanin dim maek Got man keimin bá. Kata be Got aka alata kuw kanoyama maek Got ami man keibiw ko.

¹⁴Kale Weng ayo madák kinim kei nada nulum iwyak tem alanámsa. Kale nuka am lamlam uyo utamsuduw ade lamlam bela Natim Got Min yánmák makuw ami lamlam. Kale aka afan bakanin so min gelemin so umi mit kayak ko.

¹⁵Yon aka Yesus kin wala nadale am sung bakan bom gán dá bakoyam, “‘nam yán tem tadokaba kinim aka nataw bá, aka amsun, watawo kaleyo bá, aka alam kanom sun Motabid biyámin kinimo,’ kalesi, kinim ade be ka.” Kalesa.

¹⁶Kale Yesus aka atin min gelemin kinim kayo ata ufek ufek kidel uyo sawil kuyam kuyam badano, kudu kudubuw kala.

¹⁷Kale Natim Got aka weng sawa uyo Mosus dim kuyamsa, kata kamane aka min gelemin so tatun weng bakanin so uyo Yesus dim kal kudawa nade ata num kukayaba kala.

¹⁸Kale kinim so mak Got atamongin banim, kata Min makuw ata kuw Got atam nadane Alaw teng miskuno kal biyába ade ata Alaw Got ayo daw kaím teiyamase.

¹⁹Kale Yedusalem kal Yu kayak bowál so kinim mit Liwai so imadáliw tad Yon dákadálaw, “kaba kan ata?” Akiwe,

²⁰Yon aka weng iwáluyamongin banim weng fok bakoyam, “naka Got Walusa Kinim amsun bá.”

²¹Kalane, ika alo dákadálaw, “kinim fasel im weng, ‘lum senin kinim mak tadokabano,’ kalesiw kaí, kabadáwe? Bade, kaba Ilaitsaye?” Akiwe, aka bakoyam, “naka bá.” Kalane, isik bakodaw, “kaba lum senin kinime bade, bá?” Akiwe, aka fakadu weng dam bakoyam, “báyo.” Kalane, ika weng

²²adik adik bakodaw, “bade, kaba kan ata? Kaba fakadu dam weng bakoyamawo, kata weng kudew yak nulum imadáliw tadbuw bakoyamumo, kaba kabalam sung uyo bakoyo?” Akiwe,

²³Yon ayo lum senin kinim Aiseya weng bakosa tuw bakoyam, “naka anang iwán sed gisa bakan kal weng gánbi. ‘Kale kiba Kamokim leiw tudon kuw keidawino.’” Kalesa.

²⁴Kale alo Fedasi kinim madik imadáliw, tadiw isik

²⁵Yon dákadáliw, “fasel im weng Got ami Walusa Kinim mak dabadála tadokaba kalanámsiw ayo ‘nata bá,’ kalbaw, ade Ilaitsa ‘nata bá’ kalbaw, ade lum senin kinim mak tadokabano, kalanámsiw, ‘nata bá’ kalbaw. Kale watawo kale wok ban boyamin uyo boyabáwe?” Akiwade,

²⁶Yon fakadu bakoyam, “naka wok tuw boyamono kanabi, kata kinim mak kim kal banim aka kim iwyak tem be,

²⁷kale aka nam yán tem tadokaba. Kata aka kinim abem kayo naka ken am as fakiw dákádawomi banim, watawo kaleyo bá, naka mada win banim kinim.” Yakeisa ko.

²⁸Kale kukuw adikum bulami kanamsiw uyo ki Betani abiw leiw yak wok Yoddan yakan dákamin kal Yon ayo wok ban boya badano kanamsiw ko.

²⁹Kale kana bi sidiwo matam kawák Yesus ayo Yon finang tadanane, Yon aka kaek fen atam nadane bako, “kaek fen atamino! Siwsiw man belata bakan kayak ban keimin uyo takan keiyamokaba ka.

³⁰Kale naka kinim belami sung uta bakoyam, ‘kinim mak nam yán tem tadokaba, aka nataw bá, aka amsun, watawo kaleyo bá. aka alam kanom sun Motabid biyámin kinimo.’ Yakeisi.

³¹Kale naka nalaso kinim be nam kal banim, kata nami tad wok ban boyabi umi dam be, naka kanamino Isadael kayak ika Siwsiw man be kidela atam kal keidino, kaleyo ka.”

³²Kale nadane beta aka alam kin walamin weng bakoyam, “naka Sinik Abem abid tikin kalo awon samsam madák abin taw kei tad kiwa dauda atami.

³³Kale naka Siwsiw man be nam kal banim, kata naka Got namadála tad wok bomin ban boyabi, ata bakonam, ‘kinim kan ata Sinik Abem madák kiwa dauda tein be, ata Sinik Abem kiwa imkanokabano.’ Nakeise.

³⁴Kale naka atam nadino au afan kinim be Got ami Min be, kale kal keisi ko.”

³⁵Kale alo kana bi sidiwo matam Yon so alam weng kidimin kinim alew so iyo tod alom nadiwe Yon ayo

³⁶kalomo Yesus tadba ka. Kale nadane bako, “kalak fen, Got ami Siwsiw man ade kal tada ka.” Yakei nadane

³⁷beta Yon am weng kidimin kinim alow ika weng bela kidi nadiwe yak Yesus ibik tein uniwe,

³⁸Yesus akal falmek kalomo ika ibik tein tadabiw ka. Yakei nadane weng bakoyam, “kiba wataw fen tadbiwe?” Yakane, ika bakodaw, “Udabai, kaba yakal teinabáwe?” (Udabai, kalin be kukumin kinim.) Kalin, kale be akiwe,

³⁹aka fakadu bakoyam, “tad nam biyábi uyo utamino!” Yakane, afan ika uniw ki yak ami biyába utam nadiwade kal aso tein bi kuina atan sinik alalew dim tadano kal, dabadá unsiw ko.

⁴⁰Kale kinim alew Yon weng kidimin kinim Yesus ibik tein unbiw bidi, mak am win be Andadu, Saimon Bita ami muk anung.

⁴¹Kale Andadu ayo kamakikiw belasik kana bisa. Kale aka alam muk anung Saimon fen kámsi atam nadane bakodaw, “nuka Got Masaya atabuw.” Kalesa. Ami bako Masaya kalesa, be Walusa Kinim kalin, kata Gadík im weng ata Kadais kalbiw.

⁴²Kale Andadu ayo alam muk anung Saimon dew tad Yesus atamane, Yesus kaek fen Saimon atam nadane bakodaw, “Kaba Saimon Yona ami min. Kale kam win takukamokabi, ayo ki Sefas, kakokabi.” Akeisa. Um mit uyo ki Tum, kata nuta bako, ‘Bita’ kalbuw ko.

⁴³Kale alo kana bi sidiwo matam kawák Yesus ayo Galili bakan kudá unono kanamom nadane aka Filiw atam bakodaw, “tad nam ibik teinaw unumo.” Akeisa.

⁴⁴Kale Andadu so Bita so alow ika Filiw so abiw makuw Betseidda kayak.

⁴⁵Kale Filiw ayo Nataniel fenom atam nadane bakodaw, “nuka kinim mak atabuw ayo ki Mosus ami buk kon tem sawa godusa so lum senin kinim imi sung godusiw so kaí, Yesus, Yosew man Nasadet abiw kayak ami sung ka.” Akane,

⁴⁶Nataniel ayo yán kidaw, “kuin! Ken Nasadet abiwo kal ufek ufek kidel uyo Nasadet kalo tadomane?” Kalane, Filiw asik bakodaw, “á tad atamale!” Akane,

⁴⁷Nataniel ayo Yesus alam dok didaw tadanane, Yesus ayo kaek fen atam nadane bakodaw, “belayo ki afan Isadael kayak man low, aka atin dam bakanin kinim.” Akane,

⁴⁸Nataniel asik dákadálaw, “kaba yakno yakno naka kabalam kal keisadáwe?” Akane, Yesus asik fakadu bakodaw, “naka as yet mit tem kal tein badaw katamino, yanol Filiw aka gán dákama ka.” Akane,

⁴⁹Nataniel asiki bakodaw, “kuin! Kukumin kinim kaba, Got ami Min ade kaba Isadael Kamokim.” Akane,

⁵⁰Yesus asik bakodaw, “kaba atin afan, naka afano nakaw bade, nam weng bakokam nadi, ‘as yet mit tem tein badaw, katamino, kaki kayone?’ Kaba yanol kukuw makik makik amsun seng utamokabaw uyo kalak alataw bá.”

⁵¹Akei nadane alo makso bako, “naka atin afan dam bakokamon, kiba adikum abid tikin fal bisuda Got ami ensel iyo ábal dim daung madák Got ami kinim dim tadbiw, tam unbiw kei bidiw itamokabaw.” Akeisa ko.