Yohane 16

1

2

3

4

5

6

7

8

9

10

11

12

13

14

15

16

17

18

19

20

21

¹Ini ménda qonʒon toŋgému niŋac imuhuc énézéyiac énézézua.

²Ieneŋ Anutuac hénaoriŋ sucgina igucnec nesi énécmigic mamu. Nalé méŋ hayu imuaru ieneŋ ini unuma Anutuac weleŋ qeqe ai meziŋ imuhuc ʒéma nimmu.

³Ni me Maŋgoc ménda niŋnérécmizu imuac niŋac haka silic imuhucya waŋ énécmimu.

⁴Naléya hayu, O Miŋ Kewunéŋ youmi nénézéyu niŋiŋ ʒéma niŋyacgému niŋac ac imi énézézua. Iniguc keri imuac niŋac hénihéniaiguc ac yomi ménda énézéyi.

⁵Degucmi ni méli néŋec iwac muru liliŋgéma kemmaŋ ʒéwa onarunec méŋnéŋ méŋ; Dimucgeŋ kembésémaŋ, ʒéma ni ménda qesinénʒu.

⁶Waŋu ac imuhucya imuhucya énézéwa qeriginaiguc ewa biricnéŋ sécgézac.

⁷Waŋu ac héla ʒéwa niŋgic; Ni ménda kembinec imi onac muru Héipuc ic ménda hawacnec. Waŋu ni kemmaŋiguc nenaoc onac muru i méliwa hamac. Imuac niŋac ni wai énécmima kemmaŋ imi onac hiagina niŋac.

⁸Inéŋ hamac nalé imuaru képésic ʒéma haka solaŋa ʒéma gésigési imuac mia baec séc icembac ʒéqindiŋi ac waŋ énécmimac.

⁹Képésicgina niŋac ʒéma ni ménda ninʒéŋgé nénʒu imuac ara ʒéénécmimac.

¹⁰Haka dindiŋa niŋac ʒéma ni Maŋgocnawac emba ini muŋguc ménda némmu imuac énézémac.

¹¹Waŋu gésigési niŋac ʒéma baec yomuac kuc miŋina saecyaguc ʒémiyec imuac énézémac.

¹²Ni iwawai sasalawac ara henénʒac, waŋu deguc énézédacba hia bisiqatéŋ wammuac séc qahac wammac.

¹³Ac hélawac Uŋa téréyanéŋ hamac nalé imuaru inéŋ ac hélaiguc ini héihéré énécmimac. Inéŋ eŋeya ewa siŋiguc ménda ʒémac, néŋ ac niŋanʒac imi ʒéma iwawai andiaiguc hahaya imuacnec sac énézémac.

¹⁴Inéŋ ackuaʒéc nuarunec imi mema énézémac imuac niŋ inéŋ edamuna mihicŋi némmac.

¹⁵Iwawai Maŋgocaru hezac imi mocʒoŋ nuac, imuac niŋ Uŋa Téréyanéŋ ackuaʒéc nuarunec imi mema énézémac imuhuc ʒézua.

¹⁶Ini nalé hotoŋadac tacma ni ménda némmu duŋa nalé herec ménda keŋu muŋguc ni némmu.

¹⁷Imuhuc ʒéyu tohotoho ichéra tosara ieneŋ eŋaocnec qesiamugic; Ni Maŋgocnawac kemmaŋ imuac ni nalé hotoŋadac tacma ménda némmu, néŋ duŋa nalé herec ménda keŋu muŋguc némmu imuhuc nénézézac ac imuac hénia imi dimuhuc?

¹⁸Imuac ieneŋ ʒégic; Nalé hotoŋadac ʒézac imuac hénia imi némac? Nini ac ʒézac imi ménda niŋasariziŋ.

¹⁹Yesunéŋ ieneŋ qesimiwiŋ ʒé wanʒu imi nimma énézéyec; Ini nalé hotoŋadac ménda némmu, néŋ duŋa nalé herec ménda keŋu muŋguc némmu ʒéwa ac imuac mia eŋaocnec qesiamuma kecʒu?

²⁰Hélacnec téŋgéŋ énézéwa niŋgic; Ini siacma ewa biric wammu, néŋ baec séc ic embac ieneŋ ségiségi wammu. Ini ewa biric wammu, néŋ ewa biricgina néŋ meleŋu ségiségigina wammac.

²¹Merac memeyawac naléya ducŋiyu embacnéŋ qenʒeŋ manʒeŋ qemac, néŋ merac imi hicŋiyu merac ɋelia méŋ baeciguc hicŋizac imuac ségiségi niŋac qenʒeŋ manʒeŋ imi eluŋ qemac.

²²Imuhucyanec deguc ewa biric imi onaru hezac, néŋ muŋguc inicba ewagina ségiségi waŋu ségiségi imi méŋnéŋ méŋ onagicmacac séc qahac wammac.

²³Nalé imuaru ini iwawai méŋ niŋac ménda qesinémmu. Hélacnec téŋgéŋ énézéwa niŋgic; Iwawai imuac me imuac nuac qaciguc qesigic Maŋgocnéŋ énécmimac.

²⁴Éréma kecma nuac qaciguc iwawai méŋ niŋac ménda welecanʒu. Néŋ welecgic énécmiyu onac ségiségi imi sécgémac.

²⁵Séséc aciguc ac youmi énézézua, néŋ nalé méŋ hamac imuaru Maŋgocac ʒémaŋ ʒé séséc ac ménda ʒéma bénʒéŋanec ʒéasari énécmimaŋ.

²⁶Nalé imuaru nuac qaciguc welecmu. Ni onac niŋ wamma Maŋgocaru welecmaŋ imuhuc ménda énézézua.

²⁷Imi mia yomuac niŋac, ini nuac goina héinémma ni Anutu arunec hayi imi ninʒéŋgégic imuac niŋ Maŋgoc eŋeyaoc onac goigina héiénécmimac.

²⁸Ni Maŋgocarunec mama baec yomuhucgeŋ hayiac muŋguc baec yomi waima Maŋgocaru kemmaŋ.

²⁹Ʒéyu tohotoho ichéra ieneŋ ʒégic; Degucmi séséc ac ménda ʒéma bénʒéŋanec ʒéasarizaŋ.

³⁰Gi iwawai mocʒoŋ niŋasarianʒaŋ imuac niŋ méŋnéŋ méŋ ménda qesigéŋunec ac bakia ʒéanʒaŋ imi deguc niŋtecgicma gi Anutu arunec hanec imi ninʒéŋgé génʒiŋ.

³¹Ini degucdacmi ninʒéŋgé nénʒu imuhuc ʒéma Yesunéŋ melemma ʒéyec.

³²Waŋu naléya hayu ini wainémma tuima kendacgic ni momacguc kecmaŋ. Waŋu nalé imi bec hazac. Waŋu nenacnec qahac, Maŋgocnéŋ niguc kecmac.

³³Nuac qerinaiguc ini ewa bénʒéŋginaguc kecmuac niŋ ac imuhucya imuhucya énézézua. Waŋu baec yomuac qeriaiguc ʒérabéra nimmu. Waŋu ewa bénʒéŋ kecmu, ni baecac kuha imi ogicdacʒua.