YƐKOTINƆ̀ 25:5-27

⁵Dɛitɛ onitiyɛiwe okpɑ̀ɑ̀tì tɑkɛ́ kɛ̀ timɔ́mmɔntii kpénkùnnɛ o kpɑ̀tì.

⁶Bɑ́ ndɛ́úkùnko ɑmɑ́ɑ̀ okpɑ̀ɑ̀tì ììkɛ̀, bɑ́ mbeúnɛ̀ ɑmɑ́ɑ̀ bɛnitidiɛbɛ̀.

⁷Bɛ̀ bo dɑ deemmɛ̀ dɛɛ̀ tɔ̃ũnɛ̀ bɛ̀ bo dɑ kɛ̃́kummɛ̀ onitidiɛwè ììkɛ̀.

⁸Bɑ́ ncɑ̃ɑ̃ ɑ bo yúmɛ̀ tibeéntì kɛ̀ dɛ̀ yɛ̀mmɛ̀ ɑ yu wè bo beé nho kpɛti kɑ̀ɑ sĩntɛ.

⁹Kɑ̀ɑ mɔ̀kɛnɛ̀ ɑ kou tìmɑtì ɑ ò yɑ̀ kɛ̀ dí tì tũ̀ntɛ, ɑ nɛ́ bɑ́ɑ́ nɑ́kɛ́ otɔù kó disɔ̀rì kpɛti,

¹⁰ò yɑ̀ɑ̀ bo ti kèèmɛ̀ kɛ dɑ sɑ̃́mmú kɑ̀ɑ mɔ́ntɛ́ dɛ̀ yĩ́mɛ̀ kɛ̀ tì yɛ̀nní ɑ nùù.

¹¹Tinɑ́ɑǹtì tìì bɛ́i nkɛ wenni tì dònnɛ̀ kusɑ̃rìkù sɑ̀ɑ̀kù nku, bɛ̀ dɑ̀ri kù mɛsɔɔ nnɛ̀ timɑ́tì pɛ́ítì.

¹²Mɛciì nyiɛ̀ mbɛ́i ntìì nɑ́ɑǹtì dònnɛ̀ mubiɛrìmɑ́mɑ́ɑ́ mmu nɛ̀ mɛsɔɔfĩmmɛ wèè tì yie nho borɛ̀.

¹³Mɛnɛ́buo ndòmmɛ̀ kuyiìnkù mɔ̀nnì kɛ kpénkùnko onìtì, ditɔ̃nnì sɑ̀ɑ̀rì mɛ ndò nwèè dì tɔ̃ nho borɛ̀.

¹⁴Wèè pɛ̀ɛ̀ri o kpɛrɛ ò dònnɛ̀ kuyɑɑkù nku nɛ̀ tiwɛticítì tìì í yóó ni.

¹⁵Wèè mɔ̀kɛ mɛminnímɛ̀ ò bo nɑ kɛ́ceetɛ okpɑ̀ɑ̀tì yɛ̀mmɛ̀ kɛ̀ tinɑ́ɑǹnɑtì tɑɑ̀ onìtì nɛ̀ o kṹɔ̃̀o.

¹⁶Kɑ̀ɑ yɑ̀ mɛcekùɔ̀ ndi kɛ́bennɛ́, kɑ̀ɑ tontɛ́ ɑ yɑ̀ɑ̀ bo mɛ̀ tɔ̃́.

¹⁷Bɑ́ ncɑ̃ɑ̃ ɑ cɛ̃pɛɛtitɔù cĩ́ɛ̃̀tɛ̀ ò yɑ̀ɑ̀ bo dɑ pɛ̃̀ nkɛ dɑ sĩntɛnɛ̀.

¹⁸Onìtì wèè nɑ̀ɑ́ nhotɔù kó mɛyɛi nhò dònnɛ̀ didùrì ndi nɛ̀ disiè nɛ̀ dipencɔ̀ù.

¹⁹Kɑ̀ɑ yɛ̀mmɛ̀ nɑɑtinɛ̀ onitiyɛiwe, mɛhɑ́ɑ́rìmɛ̀ yiè, dɛ̀ ɔ̃ ndɑ dònnɛ̀ ɑ cɑ́ɑ́nnɛ̀ dinìnnì dìì keutɛ́ dìndi, kɛ cómmúnɛ̀ kutɑ̀ɑ̀ku kùù kpeutí.

²⁰Kɑ̀ɑ dìè mmɛyɛǹcɑɑ̀rìmɛ̀ yiɛ̀ ndɛ̀ dònnɛ̀ ɑ dɑ̀tɛ́ o yɑɑ̀bòrì ndi muséé mmɔ̀nnì, kɛ ɑ̃nnɛ́ o mɔnnɛ mɛtekɑ̃ɑ̃̀.

²¹Kɛ̀ dikònnì bo ɑ dootitɔù, duɔ́ nwe kòo di, kɛ̀ sinɛ́yɛ̃ĩ ò bo, duɔ́ nwe kòo yɑ̃̀.

²²Kɑ̀ɑ dɔ̀ɔ̀ri mɛmmɛ ɑ cou yɛhɑ̃ɑ̃kũɔ̃ nyɛ o yuu ĩ́nkɛ̀, kɛ̀ Kuyie nyóó dɛ̀ ndɑ yietí.

²³Kubɑkù yoú kó kuyɑɑkù tɔuní fɛtɑɑfɛ̀ nfɛ, kɛ̀ siyɑ́ɑ̀bìsí ce nkɛmiɛkɛ.

²⁴A bo mbomɛ̀ difii kɛ kpɛ̃nkɛ́ dɛ̀ tɔ̃ũnɛ̀mu ɑ bo nhɑ̃nnɛ̀mɛ̀ onitipòkù yɛkpɑ̀rɛ̀ yiɛ̀.

²⁵Tinɑ́ɑǹsɑ̀ɑ̀tì tìì yɛ̀nní dɛdɛ́tirɛ̀ tì dònnɛ̀ mɛnɛ́buo mmɛ kɛ bónkùnko kuníí.

²⁶Onitisɑ̀ù wèè yóu kɛ̀ bɛyɛibɛ ò soutɛ́ ò dònnɛ̀ tɛbintɛ ntɛ yoo dinɛ́bòrì dìì kó mɛniɛ ncɑ̀kɛ.

²⁷Dɛ̀ í wenni ɑ bo dimɛ̀ mɛcekùɔ̀ mmɛdiɛ̀, yoo ɑ bo ndɔ́mɛ̀ disɑ̃nni mɛdiɛ̀.