Muqâqiŋ Dâŋ 25:5-27

⁵Ŋoŋe ŋic sindaŋne ŋicwofuŋte maionec bârâriec‐jopahapie guriŋ bapa gie‐ticne fâretiŋ jaha sâcne bahuc juocmu.

⁶Go ŋicwofuŋte maio sahacge mi bafezemec, â ŋic fekicne jaŋe wâc mi âkehoc‐jopazemec.

⁷Manakic, jaŋe ʒiŋuc gazapie sâckeocmu: “Go ʒira ware mai jaha ŋec,” ŋic fekicne ere maio ŋeŋege ŋic mocte biŋe qikiŋnecmurâ gazapie miminehec eocmu.

⁸Go wiac hone manac eekic i acmâc jaha tutumaŋko mi muzemec, i ʒâhec ŋic moczi fuarâ goki dâŋ mucmu irec fuŋne bataniŋkehuc mimi busâqoc bâfua‐gareme weniŋuc ecmu?

⁹Go âgogehec dâŋŋekic fokacko ine ehec mufâsâezepirec, ehuc ŋic mocte fuŋne mi mufuazemec.

¹⁰Iŋuc mi ecmuo ine dâŋge mananiŋmu jaŋe mimi qaqa egarepie ʒâŋe biŋege sâqorerâ fohuc juocmu.

¹¹Dâŋ musarickehuc mukicne i ʒuŋe gâpiŋ ʒeŋaŋhec mâmâc râekicne irec sâc.

¹²Ŋic mamanahec moczi ŋic âgo‐ticne hazec râeha uŋ sawaŋ ecneocmu ere manapene furi sâko ezejec.

¹³Ʒoaŋ fârorocko opâ mâteŋne nâpene bâgunuc‐nâpoekac irec sâc jaha biŋedâŋ baraekac kiŋaŋŋic metâne eki bomboŋ‐ticne ecneekac.

¹⁴Taha wiac râeniŋte dâŋ sawa muhuc fârine mi bâfuaeŋgopieŋ ŋic i jaŋe mâŋâŋzi karorac ficneme omaeha hoe mi heekac irec sâc.

¹⁵Ŋic fekicne ere maio rumerâ juhuc dâŋ âzâcnekupene maŋticne urueme mana‐nâreocmu.

¹⁶Go baŋac bâfuarâ aŋacte sâc sawa nâzemec, irec sâc jâuruhuc nâcmuo ine maŋucmu.

¹⁷Go ŋic âgoge riŋkoa sawa iqickezemec, gâbâ jaha iqicketec gore takickeme qaisocguzacte.

¹⁸Ŋic moc e ŋic âgo‐ticne micko âkec ecneocmu e ʒika me qândiŋ me tepe motec micneheczi hâhâmocko kiekac irec sâc eocmu.

¹⁹Dameŋ ŋemâcnao doc bapa ŋic moctao rorowecke izi ine micsiec‐nâŋec goroc goroc eha ɋoza nâeŋgopeneŋ, me kike‐nâŋec demba qame hata raeŋgopeneŋ irec sâc ekac.

²⁰Me mutuc erâ mâmâteŋ dameŋko hâroŋkenʒepeneŋ muhuc ŋaqi qoruc wiac‐nâŋec hetaranaŋmu irec sâc eocmu. Ŋic moc e maŋ kukumbuc faio juha gae hecnepene ine hâweczi wic ʒaekac irec sâc eocmu.

²¹Râsige nânâre hâmoha nânâ gumezemec, â opâre hâmoha opâ gumezemec.

²²Go iŋuc ecnetec mimiehuc ʒara mara eha Wofuŋzi okacne bazu‐gareocmu.

²³Murazi karorac ficne sueme qâhâckerâ hoe heekac irec sâc jaha gupe micko âkeczi aaric bâfuaekac.

²⁴Ŋokac râŋgeŋne ehec fic biaŋnao juju izi wiac wawahane eekac, â e tâmiric kâte bozeo buc juju izi ine wiac fefene eekac.

²⁵Mâreŋ ʒorickonec biŋe biaŋ wareme mamana izi ine opâre hâmohuc opâ mâteŋne nâpene bâgunuc‐nâpoekac irec sâc ekac.

²⁶Ŋic tiŋne moc e ŋic hehesicne dockecneocmu e opâ ʒâŋe sohoŋnehec me opâ nombâŋko marasiŋ sâqocne behepene hume opâ sâqoreekac irec sâc eocmu.

²⁷Go baŋac bocjaha nâtec mi sâckeocmu iŋuc jaha ŋic jaŋe mumbiaŋguniŋte ʒoɋac ejaretec mi sâckeocmu.