YƐKOTINƆ̀ 22:9-27

⁹Wèè nìti ò yɑ̀u mɛsɑ̀ɑ̀ mmɛ kɛ yɛ̃́ ò totírínɛ̀mɛ̀ bɛcĩ̀rìbɛ̀ o kpɛrɛ.

¹⁰Bɛti tɛfentɛ̀ yiɛ̀ nkɛ̀ yɛkpɑ̀rɛ̀ nɛ̀ kutoweku nɛ̀ mɛsenkùmɛ̀ kɛ̀ dɛ̀ɛ dèè.

¹¹Wèè dɔ́ timɔ́mmɔnti kɛ mɔkɛ tinɑ́ɑǹsɑ̀ɑ̀tì weè dɑ̀púnɛ̀ okpɑ̀ɑ̀tì.

¹²Kuyie nkɑ̃nkɛ́mu mɛciì nyɛmbɛ̀, kɛ yetírí bɛnitiyɛibɛ nɑ́ɑǹtì.

¹³Otɔ̃nnɛ́díétì ɔ̃ɔ̃ yĩ́ dicìrícìrì diì bo kucɛ, kòò yɛ̀roo dì bo ò pĩ.

¹⁴Onitipòkù wèè dɔuti dɔutinɛ̀ bɛnitidɑɑbɛ̀ nɑ́ɑǹtì dò ndifɔ̃̀tìrì cũmpuri ndi, Kuyie nyetɛ wè weè ɔ̃ɔ̃ do di miɛkɛ.

¹⁵Dɛbirɛ ɔ̃ mmɔkɛ mɛwɑ́ɑ́tɛ́yɛ̀mmɛ̀ mmɛ, kunɑsɑ̃́ɑ̃ kuù ɔ̃ɔ̃ mɛ̀ dɛ̀itɛ.

¹⁶Wèè fɛ̃́ũnko ocĩ̀rì wè ò kpɑ̀rìkùnkomu, wèè pɑ̃ɑ̃ nhokpɑ̀ɑ̀tì ò cĩ̀rìkùnko omɑ́ɑ̀ ndi.

¹⁷Kéntɛ́ mɛsɑ̀ɑ̀ nkɛ́keè mɛciì nyiɛ̀ nkó tinɑ́ɑǹtì. Dɑɑtɛ n dɑ nɑ́ɑ́ ntì kpɛ́í kɛ̀ n dɑ tuo mmɛciì.

¹⁸A mɛ̀ ɑ̃nnɛ́ ɑ yɛ̀mmɛ̀ kɛ̀ dɛ̀ ndɑ nɑɑti kɑ̀ɑ mmɛ̀ yɛ̃ sɑ̃́ɑ̃̀.

¹⁹N dɔ́ ɑ yié nhɑ Yiɛ̀ nKuyie nku, dɛɛ̀ te kɛ̀ n yóó tì ndɑ tié nyíe.

²⁰N dɑ wɑ̃̀ri itié nsipísìtɑ̃ɑ̃ti ndi nɛ̀ yɛtɑnnɔ̀ ɑ dò nkɛ́totí dɛ̀ɛ̀ ĩ́nkɛ̀ ɑ yɛ̀mmɛ̀ kɛ́bɑntɛ́ timɔ́mmɔnti.

²¹Kɛ̀ bɛ̀ dɑ tɔ̃ nkɑ̀ɑ wɛ̃̀tɛní ɑ́ nɑ́kɛ́ timɔ́mmɔnti.

²²A bɑ́ɑ́ yɑ̀ ocĩ̀rì cĩ̀ĩnnìmɛ̀ kɛ́fietɛ o kpɛrɛ, ɑ bɑ́ɑ́ fɛ̃́ũ nhosénnìwè tibeéntì borɛ̀.

²³Kuyie nkuù yóó kpɑ̀ mbɛ kpɛ́í nkɛ́kuɔ bɛ̀ɛ̀ fèkɛ bɛ kpɛrɛ.

²⁴A bɑ́ nnɑɑtinɛ̀ kɛmiɛkɛ yiɛ̀, ɑ bɑ́ɑ́ nɛinɛ̀ onitiyonkuwe,

²⁵ɑ yɑ̀ɑ̀ bo bɛ̀ teetɛ́ kɛ́tɑ tìmɑtì miɛkɛ.

²⁶A bɑ́ɑ́ bɛ́i nkɛ́potɛ́ ɑ nɔ̀ùtɛ̀ kɛtenkɛ̀ kɛ dɔ̀ ɑ bo yietí otɔù kó dibɑ̀nnì.

²⁷Kɑ̀ɑ yĩ mɛmmɛ kɛ í nɑ kɛ yietí bɛ̀ bo fietɛ ɑ dɔ́ù.