YƐKOTINƆ̀ 14:17-29

¹⁷Wèè miɛkɛ cɑ̃ɑ̃ kɛ pɛ́íkú ò dɔ̀ɔ̀ri dɛyɛìnkpɛrɛ ndɛ. Kɛ̀ bɛ̀ sènku wèè yɛ̀mmɛ̀ í wenni.

¹⁸Bɛ̀ɛ̀ í toti bɛ yɛ̀mmɛ̀ bɛ cɔ̃́ntimu tu tiyɛìntì, bɛ̀ɛ̀ totí bɛ yɛ̀mmɛ̀ kɛ̀ bɛ kɔ̃mu tú bɛ̀ bo yĩ́ɛ̃́tɛ́mɛ̀ dɛ̀mɑrɛ̀.

¹⁹Bɛnitiyɛibɛ yóó nínkúmu bɛsɑ̀ɑ̀bɛ̀ ììkɛ̀. Kɛ̀ bɛnitidɔnnibɛ̀ ndɑri bɛ̀ɛ̀ wetí bɛ kó yɛbòrɛ̀ kɛ dɔ́ kɛ́tɑ.

²⁰Kpɑnkpɛrɛ í mɔkɛ o nɛ́po, tikpɑ̀tì yiɛ̀ nyie nɛ́pobɛ̀ í sénní.

²¹Wèè sènkɛ̀rì o kou ò dɔ̀ɔ̀ mɛyɛi mmɛ, dɛ̀ nnɑɑti mɛsémmɛ̀ bonɛ̀ wè bɛcĩ̀rìbɛ̀.

²²Bɛ̀ɛ̀ wɑnti mɛyɛi mbɛ̀ fietimu, bɛ̀ɛ̀ wɑnti mɛsɑ̀ɑ̀ nkɛ̀ bɛ̀ dɔ̀ɔ̀ri dɛ̀ɛ̀ wenni kɛ síɛ́.

²³Mutɔ̃mmú mumɔu mɔ̀kɛmu mucɔ̃́ntimu, kɑ̀ɑ mɛ mpoti dinùù mɑ́ɑ̀ dikònnì dɑ pĩ́.

²⁴Mɛciì nyɛmbɛ̀ cɔ̃́ntimu tu tikpɑ̀tì kɛ̀ tiyɛìntì yó ntú tiyɛìntì sɑ̃́ɑ̃̀.

²⁵Timɔ́mmɔnti yiɛ̀ nnɑ̀ɑ́ nho yɑ̀ dɛ̀ndɛ kɛ dɛɛrí bɛnìtìbɛ̀, kɛ̀ siyɑ́ɑ̀bìsí yiɛ̀ nnɑ̀ɑ́ nhò í yɑ̀ dɛ̀.

²⁶Wèè dé Kuyie nhò í yĩɛ̃̀kù tìmɑtì, kɛ̀ kù kɑ̃nkɛ́ o bí.

²⁷A bo ndémɛ̀ Kuyie ndɛɛ̀ duɔ̀ mmufòmmu, kɛ dɛɛrí onìtì nɛ̀ dɛ̀ɛ̀ nɑ nhò tɔní mukṹṹ.

²⁸Kòo kpɑ̀ɑ̀tì nìtìbɛ̀ sũ ò ɔ̃ ndɛumu, kɛ̀ bɛ̀ kɛ̃kɛ o kpɑ̀tìi do.

²⁹Wèè miɛkɛ í cɑ̃kɛ́ kɛ pɛ́íkú weè ciì, wèè kɔkɛ pɛ́íkú mɛcɑ̃ɑ̃ nkòò bɛnkú ò tumɛ̀ kuyɛìnkù.