Jon 16

1

2

3

4

5

6

7

8

9

10

11

12

13

14

15

16

17

18

19

20

21

¹Ayeu ganei yaun etenik gitangi yem, ve gisov ayeu tangg givin ganei yem unvarkei gwangne be aplongg aim nivin ayeu gwangne ge.

²Atob eisir inaitin yem unde unahlang unkwai lum mateu ane aplo be unde ve unvang unkwai eisir. Be asonge nivin sawa ebe amolmol ebe ve ines yem vunu ane ok ve menihlang ok, atob eisir tas nitung inei eisir ilgum gen vie gitau gile ebe Pomate ane luev ok.

³Eisir itpweng eilu Tamangg are ite, beti atob inalgum gen bambamo etok nitangi yem.

⁴Bemem ande ayeu ganei gen bambamo etok ane yaun binge gimungg gitangi yem gikwai, dangetok be ginei nivin ebe eisir ve inalgum gen dangetok nitangi yem ok, okob atob yem unatpweng are unei ayeu ganei gen bambamo etok ane yaun gimungg gitangi yem gikwai. Warik ayeu ate gavang gavin yem beti ganei yaun etenik gitangi yem ite.

⁵Bemem galkik etenik ayeu ve nanumul natangi Amol ebe gihlin ayeu be ganme ok, nale vukuri. Bemem yem aim amol ti giutani ayeu be ginei; Wali mie ve nuvang? Amol ti giutani ayeu dangetok ite ma.

⁶Ve gisov yaun ete galkik ayeu ganei gitangi yem ok gilgum yem be aplongg aim bunam molge.

⁷Bemem ayeu nanei bingano ge nitangi yem nanei; Gen etok vie ve ayeu nakwai yem be nale. Ve ginei ayeu nakwai yem be nale ite, okob Ngalau ebe ve niro yem ta ok atob nitangi yem ninme ite ma. Bemem ginei ayeu nale, okob atob ayeu nahlin ei be ninme.

⁸Nivin ebe amol nok (Ngalau Yamar) ve ninme ok, okob atob ei nes gen tiate ane dabe ru, be nes luev gen vevies ane ru be luev ebe Pomate gilgum amolmol as yaun ok ane dabe ru nivin nitangi amolmol ebe dabas ungglus ok.

⁹Be gen ebe gilgum beti eisir ilgum gen tiate ok, ebe atob Ngalau nes ru nitangi eisir ok dang eteik: Eisir aplos givin Ayeu ite.

¹⁰Be luev gen vevies ane ane dabe ebe atob ei nes ru nitangi eisir nivin ok dang eteik: Ayeu atob natangi Tamangg nale, be atob yem undi ayeu vukuri ite.

¹¹Be luev ebe Pomate gilgum amolmol as yaun ok ane dabe ebe atob ei nes ru nitangi eisir ok ete dangeteik: Pomate gilgum amol bamo (Sadam) ebe geb nalk etenik dabin ok ane yaun be ande gitin ei gikwai.

¹²Awangg yaun ebe ve namb nitangi yem ok walang molge ete giengk nik. Bemem galkik atob kulkul bamo molge nitangi yem, ebe ve unatpweng awangg yaun bambamo etok tepwengge are ok.

¹³Bemem nivin ebe Ngalau yaun ano ane ve ninme ok, okob atob ei nitwem yem be unatpweng yaun ano walang ok are be ma. Atob ei ninei yaun nitangi ebe ei ate ane ta gitung ok ite ma, yaun ebe ei giute nangge Pomate ok ge ete atob ninei yaun etok ge nitangi yem. Be atob ninei gen ebe ve menihlang nindeb mul ane ane ok ane yaun binge nitangi yem nivin.

¹⁴Atob ei ninggas awangg yaun nilek be ninei nitangi yem. Ei atob nilgum dangetok, kob atob amolmol avos nivwat ayeu arengg.

¹⁵Be Tamangg ane gen walang ete giengk givin ei ate ok, etok ayeu angg gen tepwengge. Beti ayeu ganei dangetok ganei: Atob Ngalau Yamar ninggas yaun ebe ayeu gab gitangi ei ok nilek be ninei binge nitangi yem.

¹⁶Kasop-gege atob yem undi ayeu vukuri ite nitangi sawa undib siti-ngge, bekob atob undi ayeu vukuri.

¹⁷Be eisir singamolomb subu inei ve is ate be inei: Yaun ete ei ginei gitangi eitit ok ane dabe nam nambed? Ei ginei; Kasop-gege atob yem undi ayeu vukuri ite nitangi sawa undib siti-ngge bekob atob undi ayeu vukuri.

¹⁸Be ginei ti givin ginei: Ayeu ve navangg Tamangg ane. Be sawa undib siti ete ei ginei ok, ane dabe nam nambed? Eitit tatpweng ei ane yaun ete ginei nik ane dabe are ite ba.

¹⁹Yisu ande gitpweng are ginei amei singamolomb veve anautani ei. Beti ei ginei gitangi amei be ginei: Wat yem utau-tani aim ate ve yaun ebe galkik ayeu ganei gitangi yem be ganei; Kasop-gege atob yem undi ayeu vukuri ite nitangi sawa undib siti-ngge bekob atob undi ayeu vukuri ok ane me?

²⁰Ayeu nanei roro ge nitangi yem nanei: Atob yem unteng be aplongg aim bunam anongge ve ebe ande ayeu gamat vunu ok ane. Bemem amolmol ebe dabas ungglus ok atob tas vevias ge. Bemem yem aim aplongg aim bunam etok atob nirau-lili kob atob tangg aim vevie anongge.

²¹Ginei avie ti gitpweng are ginei kasop-gege be atob ei ninggas nunus, atob ei aplo bunam molge ve sawa etok ebe atob ei ninggas vavavne bamo molge ok. Bemem mul ane kob, nivin ebe ande ei vie ve nunus gikwai ok okob atob ei ta nitung gen bunam etok vukuri ite ma. Atob ei ta vevie ge ve ande ei vie ve nunus etok gikwai.

²²Dangetok be galkik etenik ande yem aplonggaim bunam. Bemem asonge nivin ebe yem ve undi ayeu vukuri ok, okob atob tangg-aim vevei anongge. Kob atob amol ti gitangi ebe ve nemb yem aim tangg-aim vevie etok nikwai ok ite molge.

²³Be Yisu ginei; Sawa etok ma nikwai kob atob yem unautani ayeu vukuri ve gen ane dabe dabe ane ite ma. Be ayeu nanei bingano ge nitangi yem nanei; Ginei yem utani Tamangg ve gen ti ane, be unei gisov ayeu arengg, atob Tamangg nemb nitangi yem.

²⁴Warik yem utani ve gen ti ane bemem unei gisov ayeu arengg ite ma. Bemem galkik ginei yem ve unautani gen be unei nisov ayeu arengg, atob yem un-gas gen ete utani ve un-gas ok. Kob atob tangg aim vevie ge.

²⁵Ayeu ganei yaun bambamo etenik be ganei gipil bing ai ge gitangi yem. Bemem nindeb mul ane atob ayeu nanei bing ai ti vukuri ite ma. Atob ayeu nanei Tamangg ane yaun be nanei yaun ano vusa bupwe ge nitangi yem.

²⁶Be nivin sawa etok ete atob yem ate ge unautani Tamangg ve gen ane be unei nisov ayeu arengg. Be ayeu wat nautani Tamangg ve yem ane ite ma.

²⁷Ve Tamangg ei ate ta givin yem, be gitangi ebe atob nemb yem ru ok. Be ei ta givin yem ve gisov ebe yem tangg aim givin ayeu, be aplongg aim givin unei ayeu gabweg gavin Pomate beti ganme ok.

²⁸Warik ayeu gabweg gavin Tamangg beti gamdil gakwai ei be gasov nalk ganme, beti galkik ve nakwai nalk be nanumul natangi Tamangg nale vukuri.

²⁹Beti amei singamolomb anei; “Ke, ande mie gunei yaun ano vusa roro-ngge, be gunei gipil bingai ite ma.

³⁰Be ande amei atpweng are anei mie gusge ve gunei amol ti niutani mie bekob ok ite ma. Ve mie ate gutpweng gen walang ok are gikwai. Beti amei aplongg amei givin anei Mie gubweg guvin Pomate beti gunme.

³¹Yisu giwel ane singamolomb gen amei avongg amei be ginei: “Galkik etenik ge ete yem aplongg aim givin me-rav?

³²Be unaute. Ginei as mate etok menihlang, bingano ande meng gihlang gikwai be atob amolmol invin-vin yem tepwengge be atob unvang ata-tane untangi aim nam dabe ge unde. Be yem tepwengge atob unvang unkwai ayeu be ayeu ate ge atob nambweg. Bemem ayeu ate ge atob nalgum au-ate bwam-bwam nambweg ite ma, Tamangg ei givang givin ayeu.

³³Ayeu tangg givin ve ganei yem unvang unvin ayeu gwangne ge be unvang aim gen bongong vie-ngge, beti ganei yaun etok gitangi yem. Be atob amolmol inemb bunam walang ano nitangi yem. Bemem yem unro aim ate ta be unvarkei gwangne ge. Ve ayeu gabweg gawei nalk etenik ane gen walang ok gikwai.