Jon 1

1

2

3

4

5

6

7

8

9

10

11

12

13

14

15

16

17

18

19

20

21

¹Tamba nglei ta nyan tɨndɨ. Ta nyan Godnonala tɨndɨ. Ta nyan Godna. Ta nyan Godna vak sɨmogwi lɨga nyana.

³Ta nyan nyinangwut kɨpma aywaa kwutndɨ. Nat kɨta nyan ana kɨta nda kwutndɨ. Ndɨ aywaa kapma kwutndɨ.

⁴Apma vak yetɨnda vak ndinyangu kat vɨsɨmogwindɨ, vɨndi. Apma vak yetɨnda vak ya vɨtɨga tuway vla lɨgandɨ. Va nɨmba apma vak yiga yetɨndi.

⁵Ndi kavle nɨmba kavle vat mɨna yiga yetɨndi. Kavle vat yiga yetɨlɨnja vak ya apma vak kat ana kwulaka viyesandandɨ.

⁶Kɨta nyan Jon God wandɨ, yalaa laataa njɨvwa kwutɨndɨ.

⁷Wan nyan Jon apma vat sɨmogwi lɨga nyan kat mbupmat laataa yandɨ. Mbutnda nyaangɨt wutaa ndinyangu maawupmba yelavɨtaa kwutaa yetɨnjangat mbutndɨ.

⁸Jon ndɨ apma vat yetɨlɨga ta nyan ana ndɨ. Ndɨ kat tɨga nat nɨmba kat mbutɨga nyana Jon.

⁹Ta nyan apma nglei vak yeta nyan ndinyangu kat sɨmagavak kat kan kɨpma ngaga yandɨ. Yalaa ndɨnai yeta apma vat sɨmogwi lɨndɨ.

¹⁰Ndɨ kɨpmamba lɨga nda kat wutndɨ. Kɨpma gaga yalaa ndinyanguanala yetɨndɨ. Njambwi nyanat tɨnda vat kɨpmamba la nimba vɨga lɨndi.

¹¹Kapma ngepma nyan vla ana yandɨ. Ndɨna ngepma nɨmba njambwi nyanat tɨnda vat ana vɨga lɨndi.

¹²Kɨta nyan njambwi nyanat tɨnda vak kat vɨlaa mɨn wuna njambwi nyan mɨn waa wandeyan ndɨ Godna mbaapma wuleilaa Godna nyanat tɨgiyandɨ. Gondna nyanat tɨnjeya kwondu ndɨnai kwiya.

¹³Wan ndɨna nyanat tɨgiyaa nɨmba ndinyangu yelavɨka yetɨga maawupmba lɨgiyaa nɨmba ana Godna nyanat tɨgiyandi. God wandɨ maa tɨgiyandi.

¹⁴Ta nyan Godna vak sɨmogwi lɨga nyan ndinyanguna mbangɨ ɨlalaa nɨnogwinala yetɨndɨ. Apma vat yetɨlɨnda vat nɨn vɨlɨnɨn. Vɨlaa walɨnɨn. God wandɨ maa ndɨ njɨvwa klalaa yandɨ. Ndɨ Godna nyana waa walɨnɨn. Ndɨ apma vat mɨna yiga yetɨga nyana.

¹⁵Jon ndɨ kat tɨga ndinyangu kat waga mbutɨndɨ. Wuna kwupmba yaiga nyan wuna njambwi nyana. Tak wun kat name kwutapman tɨlɨ ndɨ tamba tɨndɨ waa walɨndɨ Jon.

¹⁶Ndɨ nɨma sakwat apma vat tɨga nyana. Nɨn kat awagapma nɨma sakwat apma vat kwindɨ. Kwindɨ, vɨlaa klanɨn.

¹⁷Tamba la nyan Moses Juda kat njambiya taagandɨ. Ngini ya nyan Jisas Kraist wupma ana yilɨdɨ. Ndɨ apma vat nɨn kat awagapma kwo kwilɨndɨ. Ndɨ njambiya ana taagandɨ.

¹⁸Godna mbangɨ vɨga la nyan kai. Ndɨna nyan ndɨnogwionala kɨta vat vɨga lɨndɨ. Vɨlaa nɨn kat ngaga yalaa Godna vak nɨn kat mbutɨndɨ.

¹⁹Jon mbutɨndɨ wutɨnja nyaangɨt kɨngiyan. Jerusalemba njambwi Juda God kat kwunatɨga nɨmbo Livai walɨnja mbaapmamba la nɨmba kat ay wandi maa Jon kat wagalavat yindi. Yilaa wagalandɨ. Mɨn anda nyan mɨn waa wagalandi.

²⁰Wandi maa wandɨ. Ngwuk kat tɨwa vak ana pagwugiyowun. Wun Kraist ana wun.

²¹Wandɨ ma nat njamba at ndɨ kat wagalandi. Mɨn Ilaija mɨn? Waa wagalandi maa ndɨ kai wandɨ. Mɨn kawiga lɨna profet mɨn? Waa wagalandi maa ndɨ kai wandɨ.

²²Kai wandɨ maa ndɨ kat wagalandi. Mɨn kat wagalavak kat ay waa nɨmba kat lungwamataa yilaa angamak waiganɨn. Nɨn kat ambuk waa wandi.

²³Ndi kat wandɨ. Tamba la profet Aisaia pɨlɨwutnda vak kwutɨgowun. Ndɨ tamba pɨlɨwutndɨ. Wun kwo kavamba lɨga kwundimba nyaangɨt mbutɨga nyan wun. Waa pɨlɨwutndɨ. Kupma butɨgowun njambwi nyan yaiga yambɨ kwuka kwunak ngwula waa mbutɨgowun. Tamba la profet Aisaia mbutnda vla mbutɨgowun.

²⁴Ay wandi mala yaa nɨmba ndi Ferisina mbaapmba la nɨmba ndi.

²⁵Ndɨ kat wagalandi. Mɨn Kraist ana mɨn. Mɨn Ilaija ana mɨn. Mɨn kawiga lɨna profet ana mɨn. Ngi vat tɨga manda kat ndinyangu kat mɨn ngu yagulɨgamɨn.

²⁶Wun kwo ngumba njangi lɨgowun. Wan vak nɨma vat ana ndɨ. Ngwutnogwinala tɨga njambwi nyan ngilɨga. Njamwi nyanat tɨnda vat ngwuk ana vɨga lɨgangwuk.

²⁷Wan nyan wuna kwupmba yaiga nyan wuna njambwi nyana. Tat wun kat name kwutapman tɨlɨ, ndɨ tamba tɨndɨ. Ndɨ njambwi nyana. Wun mat nyan wun. Ndɨna njɨvwa kwuta nyanat ana alɨpsɨga tɨgiyowun. Wun vaatɨgowun waa wandɨ Jon.

²⁸Kan vak Betani walɨnja kɨpmamba kak kiyandɨ. Wan kɨpma Jodan walɨnja ndandangɨ nat naangɨmba lɨga kɨpma. Wan kavamba Jon ndinyangu kat ngu yagulɨndɨ.

²⁹Nat nandinya Jisas yalɨndɨ maa vɨlɨɨ Jon ndinyangu kat wandɨ. Ndɨ kat avɨ ngwula. God kat kwunapmat kwilɨnja sip sip tɨga vla tɨgandɨ. God wandɨ maa yalaa lɨgandɨ. Ndinyangu aywaa ndinai yilɨga kavle vak kat God nyingi maawut tɨnda vak kwunakiyandɨ.

³⁰Wan nyan tak mbutɨwa nyan. Tak wowun. Wuna kwupmba yaiga nyan wuna njambwi nyana. Tak wun kat name kwutapman tɨlɨ, ndɨ tamba tɨndɨ waa tak mbutɨwun.

³¹Tak Jisas njambwi nyanat tɨnda vat wun ana vɨga lɨwun. Ngwuk Isrelna nɨmba njambwi nyan yaigandɨ waa sɨmogwivat ndinyangu kat ngu yagulɨgowun waa wandɨ Jon.

³²Jon mbutnda nat nyaangɨt kɨngwiyan. Godna waagan namiyo ngaga ya vla yandɨ. Yalaa Jisas la sɨsomba tɨndɨ, vɨwun.

³³Tak njambwi nyanat tɨnda vat wun ana vɨga lɨwun. Tak ndinyangu kat ngu yagu mɨla waa wun kat waa nyan God tak wun kat wandɨ. Wuna waagan ngaga yalaa kɨta nyan ta sɨsomba tɨgiyandɨ. Vɨgiyamɨn. Vɨlaa ndɨ Godna waagan nat nɨmba kat kwilɨga nyana waa yelavɨkiyamɨn ngɨni waa wandɨ God wun kat.

³⁴Wanda nyaangɨt wutaa lɨga ngɨni wan vak vɨwun. Vɨlaa ndɨ Godna nyana waa ngwuk kat wowun.

³⁵Nat nandinya Jonogwi ndɨna kwupmba la mbɨt nyan vɨlɨlɨk tɨndi.

³⁶Jisas yilɨndɨ maa Jon ndɨ kat vɨlaa wandɨ. God kat kwunapmat kwilɨnja sip sip tɨga vla tɨga nyan kɨngiyandɨ yaa. God wandɨ maa yalaa lɨgandɨ waa wandɨ Jon.

³⁷Jonogwinala kɨta ta mbɨt nyan ndɨnai waa nyaangɨt wutaa ndɨ kat kwagalalaa Jisasna kwupmba yimbɨt.

³⁸Jisas lungwamataa mbɨk kat vɨlaa wandɨ. Mbɨk manda kat kwaka yambɨt waa wandɨ mbɨk kat. Wandɨ maa ndɨ kat wambɨt. Rabai wambɨt. Ndina kwundimba sɨmokwi lɨga nɨmba kat Rabai walɨndi.

³⁹Jisas mbɨk kat wandɨ. Wuna kwupmba yalaa wuna ngay vɨgiyambɨt waa wandɨ. Wandɨ maa ndɨna kwupmba yilaa vɨmbɨt. Ngi kat tɨga wan ngan ndɨna ngaymba sɨndu kwambɨt.

⁴⁰Jon kwundi wutaa mbɨt vɨlɨlɨk nyana kɨta nyana sɨ Endru. Wutaa Jisasna kwupmba yindɨ. Ndɨ Saimon waa Pita walɨnja nyana yaakwanda nyana.

⁴¹Ndɨ Endru yiga ndɨna yakwa nyan kat vɨlaa wandɨ. Mɨn yagwa mɨla. Mesaia walɨna nyan kɨngiyan yaa vɨwun. Yaa avɨ ndɨ kat waa wandɨ Endru. Ndinyangu kat kwunapmak God kwiya nyan kat ndina kwundimba Mesaia wandi.

⁴²Ndɨ kat Jisas ta kavat kwutaa kalindɨ. Yambɨt maa Jisas Saimon kat ndɨna maawut tɨga vak vɨlaa wandɨ. Mɨn Saimon. Jon nyan mɨn. Mɨn kat mandɨt kupi sɨ waigowun. Ngɨni mɨn kat Sifas waa Pita waigandi mɨn kat. Wan sɨ angwa ngilɨga. Kambat tɨga vla lɨgamɨn.

⁴³Nat nan dinya Jisas Galili walɨnja nɨma kɨpma kat yivat tɨndɨ. Yiga Filip kat vɨlaa wuna kwupmba yagwa wandɨ.

⁴⁴Filipna angwa ngepma Betsaida. Endruo Pitana kɨta ngepma nyana.

⁴⁵Filip Jisas kat vɨlaa nat nyan Nataniel kat yiga kwatɨndɨ. Ndɨ kat vɨlaa wandɨ. Mɨn yagwa mɨla. Tamba la nyan Moses tamba la profet wan yaigandɨ waa God waa nyaangɨt wutaa pɨlɨwutɨnja nyan tamba yandɨ, vɨnɨn. Ndɨna sɨ jisas. Josepna nyana. Ndɨna ngepma Nasaret waa wandɨ Filip.

⁴⁶Wandɨ maa Nataniel ndɨ kat wandɨ. Nasaret apma ngepma ana ndɨ. Anda vapmba apma nyan tɨga kan kavle ngepma laakiyandɨ waa wandɨ. Wandɨ maa Filip wandɨ. Yaa ndɨ kat vɨlaa sɨga nagugiyamɨn.

⁴⁷Nataniel yalɨndɨ mala Jisas ndɨ kat vɨlaa nat nɨmba kat walɨndɨ. Kan yalɨga nyan kat avɨ ngwula. Ndɨ apma maawutno la Juda ndɨ. Kɨta vat ndɨ ana pagwulɨgandɨ waa wandɨ Jisas.

⁴⁸Jisas wandɨ maa Nataniel wandɨ. Wun kat tak ana vɨga lɨmɨn. Kanda mbutndi, wutaa wuna maawupmba lɨga vak kat nat nɨmba kat mbutɨgamɨn waa wandɨ. Wandɨ maa Jisas ndɨ kat wandɨ. Wun kat tak ana vɨga lɨmɨn waa manda kat wamɨn. Sɨvla kavamba lɨmɨn mɨn kat vɨga lɨwun. Tak fik walɨnja mi angɨmba tɨmɨn maa Filip mɨn kat yaa vɨlaa yagwa wandɨ maa wiwun mɨn kat waa wandɨ Jisas.

⁴⁹Nataniel awat ndɨ kat wandɨ. Njambwi nyan mɨn Godna nyan mɨn. Mɨn nɨn Isrelmba lɨga nɨmba nɨna king mɨn waa wandɨ Nataniel.

⁵⁰Jisas ndɨ kat wandɨ. Tak mi angɨmba lɨmɨn maa vɨlaa mɨn kat wowun maa ngɨpaliga dalaa wun kat njambwi nyan mɨn waa yelavɨka wamɨn. Wan mɨn kat sɨvla kavamba tɨga vɨwa vat nɨma vak ana ndɨ. Ngɨnɨ nɨma nglei vat kwutɨweya vak vɨgiyamɨn.

⁵¹Mɨn kat ana woseka wigowun. Ngɨnɨ nyinangwut mbɨlɨndɨ maa Godna ensel wokelɨnjeya vak vɨlaa wun kat ngaga yanjeya vat vɨgiyamɨn. Wokelaa yalaa Godna vat wun kat mbutndi maa ngwuk kat mbutɨgowun. Wun ndinyangu kat nyinangwutna vat mbutɨga nyan wun. Wan wawa vat nɨma vatna waa wandɨ Jisas.