1Ma Eliu i ga biti bula:
2Dave, u nuk ia ba go i takodo piram? Ba u biti: A maukuagu i takodo ta dir ma ra maukua i God,
3Ba u biti: Ona pa iau ga varpiam, na ga topa ra ava nam piram? Ma: Na ngala laka nam ba ina kale ta ra mangamangana takodo ta nam ina ga kale ta ra varpiam?
4Io, ina bali u, Ma ra umana talaim bula.
5Una tadarake ra bakut, ma una gire; Una bobe ra bakut, nina i lia tam.
6Kaum varpiam i dave pire God? Ma kaum peal kaina mangamangana dia pait ra ava pirana?
7Kaum takodo na mangamangana i tul tar ra ava pirana? Ma ava i kale pa ia ta ra limam?
8Kaum kaina mangamangana i tadav uka ra tutana da u, Ma kaum takodo na mangamangana i bili ka ra tarai.
9Dia tangi ure ra lavur dekdek na varkurai dia ki taun diat; Dia tangi upi ra maramaravut tago ra lima i ra umana luluai i mamat pire diat.
10Pa ta tikai i biti: Akave God kaugu Tena Vavaki, Nina ba i tul tar ra umana kakailai ta ra marum,
11Ra vartovo i tovo dat me i lia ta ra vartovo i tovo ra lavur leing me, I manga vakabinana dat ta diat ra umana beo ta ra maup?
12Dia tangi ka, ma pa ta i bali diat, Ivuna ka ta ra nuknuk na kolakolo tai ra umana kaina tutana.
13God pa na valongore ta tinangi vakuku, Ma ra Dekdek muka pa na nuk vake.
14Ma pa na valongore muka u ba u biti ba pa u gire; Ea, ra magit i ki pirana, una ki vovovon upi ia!
15Ma gori, tago pa i ub u ma ra kankan, U biti ba pa i manga nuk pa ra varpiam.
16Damana Iob i papa vakuku ra ngiene, Ma i vapeal ra umana tuptup na tinata.
