1मिनु अय्युबमी “आं थुं जिक्शो बाक्ब। आं नाक्त नुप्शा लशो बाक्नीम। आं कली तुरस ठीक दुम्शो बाक्ब।
2थमा पा, आं एर ओंथ शुक्शी पाइब बाक्नीम। मेको आन शुक्शी पशो मारेइ ममिम्नुङ। अय्युब १६:१९
3परमप्रभु, गे आंमा आं जाकटी दुमीन। अरु सु आं पर्बम जमानी बाक्ने चाप्बा ङा?
4गे मेको आन थुं रे रुप्तीक ग्रुंइताक्नी। मोपतीके गे मेको आन कली ठेयब दुम्चा मगेनी।
5सुमी आ शोंप वारच आन कली कोंइशा योक्चा कली ब्रेप्बा, मेको आ आल जचा मताइनीम।
6मेकोमी आं कली मुर नेल्ल आन दातेम कथा पतीक का सेल्शो बाक्ब। मुरपुकीमी आं ङोंइती तोक्सीनीम। अय्युब ३०:९
7आं मिक्च श्येत जतीके ब्रा ब्रा दुम्शो बाक्ब। आं गुइ खोइल सोव़शो बाक्नीम। गो वांकु खोदेंशो बाक्नुङ।
8रिम्शो थुं पाइश्शो मुर मेको तशा, छक लाक्नीम। दोस मताइबपुकी परमप्रभु यावे आ अरेशो मटीब आन कली तशा गाइक्नीम।
9मिनु ठीक पाइब मुर आंम लां रिम्शो पा गाक्नीम। मोदेंशो मुर बोल्यो क्येङा यो बोल्यो दुम्ना दुम्न लाइनीम।
10मुल गे नेल्ल लेतीन। गो इन दातेमी निप्स पाइश्शो मुर का यो मतङमी।
11आं नाक्त नुप्तेक्म। आं मिम्शो नेल्ल मोशा दुम्त। मिनु आं थुं ङा मिम्शो जाम्शा लत।
12मेको मुरपुकीम नाक्दो कली नाक्त देंनीम। मिनु सुनी दुम्मेनु ‘नां रिक्त’ देंनीम।
13गो आं आस पशो खिं बेक्शो मुर आन बाक्तीक बाक्त हना, आं ब्राख्ये छिङछिङम सेल्ता हना यो,
14गो तुरस कली ‘गे आं आफ बाक्नीनी’ मिनु लुस्पु कली ‘आं ममा आं समी बाक्नीमी’ देंती हना,
15आं आस पशो ते लाक्गा? मिनु सुम आं पर्बम आस पाइबा?
16मार एको बेक्शो मुर आन बाक्तीक आ नेक्था लाइबा? मार, गो नेल्ल उइ फुरकुम काथा लाइनया?” दे अय्युबम देंमाक्त।
