1Belo si kokotuṉu, Nebo si todoṉo gore; sari tamasa arini tadi pa Babiloni si ta paleke koari na kurukuru. Sari na beku sapu ta paleke lamae si mamata, na mamata koa rini pu mabo.
2Todoṉo meke kokotuṉu gore varigara sari karua; lopu boka harupu puleni koasa tinasuna, ke somana ta paleke taloa pa tinaraovo.
3Zama se Zihova, “Va avoso mae koa Rau, gamu pa tutina e Zekopi, gamu doduru pu koa hola koari na butubutu Izireli, gamu pu kopuni gamu Rau podalae totoso podo gamu, meke paleke gamu Rau podalae tu haha mia.
4Kaqu kopuni gamu Rau osolae barogoso na keo tu kalu mia. Arau mo si Asa, Arau si asa pu kote kopu ni gamu. Arau tavete gamu meke Arau kote paleke gamu; Arau kote kopuni gamu meke Arau kote harupu gamu.
5Koe sei kote vari padapada Nau gamu sapu kekeṉoṉo gua Arau? Koe sei kote va tata lani Au gamu pude vari padapadani gami?
6Kaiqa si va vura qolo pa dia huneke meke padai sari dia siliva pa sikele; tabaria rini si keke tie tavetavete pa qolo meke tavetia sa si keke dia tamasa, meke todoṉo si arini meke vahesia rini si asa.
7Ovulu sage nia rini pa avaradia meke paleke ia; vekoa rini si asa pa nana vasina, meke vasina tugo turu eko nana. Meke lopu boka rizu si asa koasa vasina asa. Be kabo la si keke tie koa sa, ba lopu kaqu olaṉa si asa; lopu kaqu boka harupia sa si asa koari nana tinasuna.
8Mi balabala ia si hie, veko va nabu ia pa mia binalabala; va naqitia pa bulomia, gamu na tie kaleamia.
9Mi balabala i sari ginugua koadi, sapu taveti Rau pukerane la; Arau sa Tamasa, meke loketoṉa pule si koa; Arau sa Tamasa, meke loketoṉa pule si gugua Arau.
10Pa pinodalaena tu si vata gilana nia Rau sa vina betona, totoso pukerane tu tozia Rau sapu kote mae. Zama si Rau: Sa Qua hiniva si kaqu turu hola, meke kaqu taveti Rau doduru gua sapu hiva ni Rau.
11Pa kali gasa rimata si tioko mae nia Rau si keke kurukuru variva mate; pa keke popoa seu si kote mae si keke tie pude va gorevura i sari Qua hiniva. Sapu zama ni Rau, arini tugo si kote taveti Rau; Gua sapu tozi ni Rau, si kote va gorevura i tugo Rau.
12Avoso mae koa Rau, gamu pu nabu bulomia, gamu pu seu hola koasa tinoṉoto.
13Arau korapa turaṉa va tata mae ia sa Qua tinoṉoto; namu lopu seu hokara sia, meke sa Qua hinarupu si lopu kaqu va sasanae. Arau kote harupi si arini pa Zaione, sa Qua tinolava si kote vata dogoro nia Rau koe Izireli.
