1Ekewe koten Papilon, Pel me Nepo ra turula. Uluulur kewe oua uweefetalei me lom ra nom won ekewe mönün uwochou, ra fokun chou ngeni ekewe man mi aiengau.
2Iwe, ra turuppöküla, resap tongeni amanaua uluulur kewe, nge ra chök püsin oola.
3Iwe, ewe Samol mi Lapalap a apasa, “Oupwe rongorong, ämi mwirimwirin Jakop, ämi chon Israel meinisin mi chüen manau. Üa amwöchükemi o tümwünükemi seni ämi uputiu.
4Ngang ämi Kot, üpwe tümwünükemi tori fansoun ämi chinlap, lupwen meten möküremi a pwechela. Iwe, üa förikemi o tümwünükemi, üpwe pwal alisikemi o amanauakemi.
5Iö oupwe awewe ngeniei pwe üpwe wewe ngeni, nge iö a tongeni wewe ngeniei?
6Chokewe mi atowu kolt seni ar lenien iseis o kiloni silifer won eu kilo, ra möni eman chon angang ngeni kolt, pwe epwe föri uluulun eman kot ren. Mürin ra chapetiu mwan o fel ngeni.
7Ra mwärei, ra uweela o anomu won lenian. Ikenan a ütä, nge esap tongeni mwökütüküt seni lenian. Iwe, are eman a siö ngeni, esap tongeni pälüeni, esap pwal tongeni amanaua seni an riaföü.
8Oupwe chechemeni mine üa föri o ekieki usun lon lelukemi, ämi chon tipis.
9Oupwe chechemeni ekewe mettoch mi fis me lomlom. Ngang Kot, esap wor eman lüki. Ngang chök Kot, esap wor eman a wewe ngeniei.
10Üa osuni me lepopun mine epwe fis le sopolan, üa pwal pwärätä seni ekewe fansoun lom mettoch resamwo fis. Iwe, üa apasa pwe epwe fis mine üa ekiekietä, üpwe pwal apwönüetä letipei.
11Üa kökköri eman mwän seni ewe fanü ötiu, epwe feito usun eman machang mi mwacho o apwönüetä ai ekiek. Ngang üa apasätä, üpwe pwal afisätä. Üa ekiekietä, üpwe pwal apwönüetä.
12Oupwe aüselingaei, ämi chon tipeförea, ämi mi ekieki pwe ämi küna ngasala a toau.
13Ngang üpwe akanato ewe ränin ai üpwe angasakemi, esap chüen toau, nge üsap fokun mang le amanauakemi. Iwe, üpwe amanaua Sion o pwärätä ngeni Israel ai ling.”
