YƐKOTINƆ̀ 8:13-36

¹³A bo ndémɛ̀ Kuyie dɛɛ̀ tu ɑ yetɛ mɛyɛi. N yí nɑɑtinɛ̀ sifeí yɛmbɛ̀, sipɔɔ yɛmbɛ̀ bɛ̀ɛ̀ borimɛ í wenni nɛ̀ bɛ̀ɛ̀ sountɛ.

¹⁴Míì ɔ̃ɔ̃ tié nhonìtì kòo ciitɛ́. Míì tu mɛciì nkɛ duɔ̀ mmuwɛ̃rímú.

¹⁵Míì te kɛ̀ bɛkpɑ̀ɑ̀tìdiɛbɛ̀ bɑkɛ́, kɛ̀ bɛbeéndiɛbɛ̀ bekù kɛ̀ dɛ̀ wenni.

¹⁶Míì te kɛ̀ bɛkpɑ̀ɑ̀tìbɛ̀ nɛ̀ bɛhɛikɛ̀nkótíbɛ̀ nɛ̀ kɛtenkɛ̀ ĩ́nkɛ̀ kó bɛbeémbɛ̀ bɛmɔu kɛ̀ bɛ̀ bɑkɛ́.

¹⁷Bɛ̀ɛ̀ n dɔ́, m bɛ ndɔ́, bɛ̀ɛ̀ n wɑɑ̀, mbɛɛ̀ n yɑ̀u.

¹⁸Míì te tikpɑ̀tì nɛ̀ disɑ̃nni, tikpɑ̀tì tìì í deu nɛ̀ mɛborimɛ sɑ̀ɑ̀mɛ̀.

¹⁹M pɑ̃rɛ̀ wennimu kɛ pɛ̃ɛ̃tɛ́ mɛsɔɔ nsɑ̀ɑ̀mɛ̀, kɛ̀ n cɔ̃́ntimu pɛ̃ɛ̃tɛ́ idíítí.

²⁰N kérí timɔ́mmɔnti kó kucɛ nku bɛnitisɑ̀ɑ̀bɛ̀ tũ nkù,

²¹kɛ dɔɔri mɛsɑ̀ɑ̀ mbɛ̀ɛ̀ n dɔ́, kɛ bɛ̀ duɔ̀ ntikpɑ̀tì.

²²Kuyie nni ndɔ̀ɔ̀ kɛ̀ dɛ̀ mɔ̀ntɛmu, kù niitɛ́ kɛ́dɔɔ̀ mí nwe kɛ nɛ́ dɔɔ̀ dɛsɔnnɛ.

²³M bomu sɑ̃́ɑ̃̀, kutenkù mu nyí dɔ̀ɔ̀ kɛ̀ m bomu.

²⁴N yó mbo kɛ̀ dɑ̀mɛ́ɛ̀rìbɛ̀ nɛ̀ sibií kɛ̀ dɛ̀ mu nyí bo.

²⁵Yɛtɑ̃rɛ̀ nɛ̀ sitɑ̃ɑ̃́ dɛ̀ yóó dɔɔ̀ kɛ̀ m bomu.

²⁶N do bomu kɛ sɔ̃́ nKuyie mmu nyí dɔ̀ɔ̀ kɛtenkɛ̀ nɛ̀ kɛĩ́nkɛ̀, kù yóó dɔɔ̀ dɛnɛnnɛ̀ sɑ́m̀pɔ́rɛ̀ ketirɛ̀ kɛ̀ m bomu.

²⁷Kù yóó dɔɔ̀ kɛĩ́nkɛ̀ kɛ́ bo ɑ̃nnɛ́ tiwɛtì mɑ̀nku kɛ̀ m bomu.

²⁸Kɛ̀ kùu ɑ̃nnɛ́ yɛwɛtɛ̀ nɛ̀ sibií kɛ̀ mɛniɛ nní nyiɛ̀ní nɛ̀ muwɛ̃rímú.

²⁹N do bomu kɛ̀ kùu kéétɛ́ dɑ̀mɛ́ɛ̀rì mɑ̀nku kɛ dɔ̀: Mɛniɛ mbɑ́ mpɛ̃nkù, kɛ́ɑ̃nnɛ́ kɛtenkɛ̀.

³⁰N do bomu nɛ̀ ku kɛ̀ ti pĩ́ mmutɔ̃mmú yɛwe yɛmɔu, kɛ́ n kù duɔ̀ ndiwɛ̀ì, kɛ yɑ̃nku sɑ̃́ɑ̃̀ ku ììkɛ̀,

³¹kɛ́nyɑ̃nku kɛtenkɛ̀ kù dɔ̀ɔ̀ kɛ̀ ĩ́nkɛ̀, kɛ̀ dɛ̀ n nɑɑtinɛ̀ bɛnìtìbɛ̀.

³²Di mmɔ̀nnì m bí, keènɛ̀ n nɑ́ɑǹtì. Dɛ̀ nnɑɑti wèè yie n tié.

³³Di bɑ́ɑ́ yetɛ n tié, cɔutɛ́nɛ̀ i kɛ́ciitɛ́.

³⁴Dɛ̀ nnɑɑti bɛ̀ɛ̀ kèḿmú n tié, kɛ̀ ɔ̃ ncómmú m bòrìnùù kɛ tṹntí n cĩ́ɛ̃̀tɛ̀ sɑ̃́ɑ̃̀.

³⁵Wèè m̀ pɛ̀tɛ́ ò pɛ̀tɛ́ mufòmmu mmu, kɛ pɛ̀tɛ́ Kuyie nkó mɛsɑ̀ɑ̀.

³⁶Wèè ǹ cɑ̀ɑ̀rɛ̀ ò cɑ̀ɑ̀rɛ̀ omɑ́ɑ̀ ndi, wèè n sènkɛ̀rì kòò dɔ́ mukṹṹ.