YƐKOTINƆ̀ 6:13-31

¹³Kɛ ɔ̃ nkɑ̃míí inuɔ nkɛ nɑ́ɑ́nnɛ̀ o nɑɑ̀cɛ̀i kɛ fietì inɔ́mbí,

¹⁴kɛ dɔ́ mɛyɛi nkɛ mɛ̀ wɑnti sɑ̃́ɑ̃̀, kɛ ce nyɛkpɑ̀rɛ̀.

¹⁵Dɛɛ̀ te kɛ̀ mɛyɛi nhɔ̃ɔ̃ ò do dimɔ̀nnì dimɑ́ɑ̀, kóò potɛ́ bɑ́ ò bɑ́ɑ́ nɑ kɛ́yentɛ́ bìtì!

¹⁶Dɛnɛnnɛ̀ bo dɛ̀kuɔ̀ ndi Kuyie nyí dɔ́ dɛ̀, dɛ̀yiekɛ̀ ndi ketíkɛ kù í dɔ́ kɛ́yɑ̀ dɛ̀ fɛnɔ̀nfɛ̀, dɛɛ̀ tu: Tɛpɔ̀tɛ̀, siyɑ́ɑ̀bìsí, ɑ bo sɔ̃́ntɛ́mɛ̀ kɛ́kuɔ onìtì, iyɛntotí yɛiyi, wèè cɑ̃ɑ̃ mɛyɛi mmudɔɔ̀rìmù, ɑ bo nsoúmmɛ̀ kɛ nɑ́ɑ́ nhɑ í yɑ̀ dɛ̀, nɛ̀ ɑ bo ncemmɛ̀ yɛkpɑ̀rɛ̀ ɑ tebìí cuokɛ̀.

²⁰M birɛ, nyo ɑ cicɛ dɑ nɑ́ɑ́ ntì, bɑ́ɑ́ yetɛ ɑ yɔ̃ tié.

²¹Ãnnɛ́ i ɑ yɛ̀mmɛ̀ miɛkɛ, kɛ́ nyì dùúkú ɑ fɔ̃̀níí kusɑ̃rìkù kɔ̃mɛ.

²²Iì yó ndɑ ni ɑ cèmmu, kɛ́ ndɑ bɑɑ ɑ duɔ́ dɛ̀, kɑ̀ɑ èntɛ ì ndɑ nɑ́ɑ́nnɛ̀.

²³A cicɛ nɛ̀ ɑ yɔ̃, bɛ tié ndò nfìtírɛ̀ ndɛ, kɛ tú kuwenniku, bɛ̀ dɑ kpɑnnɛ̀ kɛ dɑ bɛnkú mufòmmu cɛ nku.

²⁴Iì yó ndɑ kɑ̃nkɛ́ onitipòkù wèè dɔuti dɔutinɛ̀ bɛnitidɑɑbɛ̀ nɛ̀ otɔù pokù nùnɑɑtí.

²⁵A bɑ́ nyɑ́ɑ́ ndɛ kóo nitipòkù botí o wenniku kpɛ́í, bɑ́ɑ́ yie nkòò dɑ soutɛ́ nɛ̀ o nuɔ.

²⁶Onitipòkù wèè dɔù í bo kòò dɔuti dɔutinɛ̀ bɛnitidɑɑbɛ̀ o borɛ̀ ɑ kpɛrɛ ɔ̃ɔ̃ yɛ̀ sɑ́m̀pɔ́ nwe, wèè mɔ̀kɛ o dɔù kòò tɔ̀kɛ́nɛ̀ ò bo níntɛ́mɛ̀ ɑ fòmmu.

²⁷Òmɔù bo ɑ̃nnɛ́ muhɑ̃ɑ̃́ nho yɑɑ̀yɔ̀rɛ̀ miɛkɛ kòo yɑ̀ɑ̀tì bɑ́ɑ́ cɔ́útɑ́ɑ̀?

²⁸Onìtì bo nɑ kɛ́nkérí muhɑ̃ɑ̃́ miɛkɛ kɛ bɑ́ɑ́ cɔ́útɑ́ɑ̀?

²⁹Mɛɛ̀ botí nku ɑ bɑ́ɑ́ nɑ kɛ́kɑ́ɑ́kɛ́ ɑ kou pokù kɛ̀ bɛ̀ dɑ yóu.

³⁰Bɛ̀ ɔ̃ɔ̃ í ncĩ̀ɛ̃́ nwèè yùúkú kɛ bo kuɔ dikònnì dɔ̀mmɛ̀.

³¹Kɛ̀ bɛ̀ ò yɑ̀ ò ɔ̃ɔ̃ yietí kucɛ mɛ̀yiekɛ̀ ndi, kɛ́duɔ́ nho kpɛrɛ dɛmɔu ò mɔ̀kɛ dɛ̀ o cĩ́ɛ̃̀tɛ̀.