YƐKOTINƆ̀ 25:1-14

¹Ntɛ Sɑdomɔɔ kotinɔ̀ tɛyɛ̀ Sudɑɑ kóo kpɑ̀ɑ̀tì Esekiɑsi kɔbɛ wɑ̃̀ri yɛ̀.

²Dɛ̀ tu Kuyie nkó disɑ̃nni ndi kù bo sɔnnɛmɛ̀ dɛ̀mɑrɛ̀ kɛ tú bɛkpɑ̀ɑ̀tìbɛ̀ kpɛri bɛ̀ bo wénnímɛ̀ dɛ̀mɑrɛ̀ mɛsɑ̀ɑ̀.

³Ti í yɛ̃́ mɛ̀ɛ̀ botí kɛĩ́nkɛ̀ youtimɛ̀ mɑ̀mɛ̀, nɛ̀ kɛtenkɛ̀ cũmpumɛ mɑmɛ̀ ti í mɛ nyɛ̃́ bɛkpɑ̀ɑ̀tìbɛ̀ yɛ̀mmɛ̀.

⁴Ũtɛ́ mɛsɔɔ mɛyɔ̃́ɔ̃̀ nkɛ̀ mɛ̀ɛ wenkɛ, wèè dɔ̀ɔ̀ri tisɑ̃tì kòo nɑ kɛ mɛ̀ dɔ̀ɔ̀nɛ̀ dɛ̀mɑrɛ̀ sɑ̀ɑ̀rɛ̀.

⁵Dɛitɛ onitiyɛiwe okpɑ̀ɑ̀tì tɑkɛ́ kɛ̀ timɔ́mmɔntii kpénkùnnɛ o kpɑ̀tì.

⁶Bɑ́ ndɛ́úkùnko ɑmɑ́ɑ̀ okpɑ̀ɑ̀tì ììkɛ̀, bɑ́ mbeúnɛ̀ ɑmɑ́ɑ̀ bɛnitidiɛbɛ̀.

⁷Bɛ̀ bo dɑ deemmɛ̀ dɛɛ̀ tɔ̃ũnɛ̀ bɛ̀ bo dɑ kɛ̃́kummɛ̀ onitidiɛwè ììkɛ̀.

⁸Bɑ́ ncɑ̃ɑ̃ ɑ bo yúmɛ̀ tibeéntì kɛ̀ dɛ̀ yɛ̀mmɛ̀ ɑ yu wè bo beé nho kpɛti kɑ̀ɑ sĩntɛ.

⁹Kɑ̀ɑ mɔ̀kɛnɛ̀ ɑ kou tìmɑtì ɑ ò yɑ̀ kɛ̀ dí tì tũ̀ntɛ, ɑ nɛ́ bɑ́ɑ́ nɑ́kɛ́ otɔù kó disɔ̀rì kpɛti,

¹⁰ò yɑ̀ɑ̀ bo ti kèèmɛ̀ kɛ dɑ sɑ̃́mmú kɑ̀ɑ mɔ́ntɛ́ dɛ̀ yĩ́mɛ̀ kɛ̀ tì yɛ̀nní ɑ nùù.

¹¹Tinɑ́ɑǹtì tìì bɛ́i nkɛ wenni tì dònnɛ̀ kusɑ̃rìkù sɑ̀ɑ̀kù nku, bɛ̀ dɑ̀ri kù mɛsɔɔ nnɛ̀ timɑ́tì pɛ́ítì.

¹²Mɛciì nyiɛ̀ mbɛ́i ntìì nɑ́ɑǹtì dònnɛ̀ mubiɛrìmɑ́mɑ́ɑ́ mmu nɛ̀ mɛsɔɔfĩmmɛ wèè tì yie nho borɛ̀.

¹³Mɛnɛ́buo ndòmmɛ̀ kuyiìnkù mɔ̀nnì kɛ kpénkùnko onìtì, ditɔ̃nnì sɑ̀ɑ̀rì mɛ ndò nwèè dì tɔ̃ nho borɛ̀.

¹⁴Wèè pɛ̀ɛ̀ri o kpɛrɛ ò dònnɛ̀ kuyɑɑkù nku nɛ̀ tiwɛticítì tìì í yóó ni.