YƐKOTINƆ̀ 24:4-30

⁴Nɛ̀ mɛciì mmɛ bɛ̀ ɔ̃ɔ̃ píɛmmɛ̀ yɛbuɔ tikpɑ̀tì tisɑ̀ɑ̀tì tìì wenni.

⁵Wèè ciì weè mɔ̀kɛ muwɛ̃rímú, wèè ciì weè kpetì dɛ̀úkú.

⁶Wèè bɑ̀ɑ́tí mɛsɑ̀ɑ̀ nweè ɔ̃ɔ̃ nɑ mudoò, wèè mɔ̀kɛ bɛ̀ɛ̀ ò duɔ̀ nyitié nkɛ̀ bɛ̀ sũ weè nɔ ndikpɑ̀nnì.

⁷Mɛciì nkó tinɑ́ɑǹtì pɛ̃ɛ̃tɛ́mu kuyɛìnkù wɛ̃rímú, dɛɛ̀ te kɛ̀ bɛ̀ tìí nkɛ nɑ́ɑ́ nkù ncĩ́ɛ̃́kɛ́.

⁸Wèè wɑnti mɛyɛi nsɑ̃́ɑ̃̀ bɛ̀ we ntu mɛyɛi ncicɛ.

⁹Kuyɛìnkù yɛntotí tú iyɛiyi nyi, bɛ̀ í dɔ́ kɛ́yɑ̀ tɛpɔ̀tɛ̀ yiɛ̀ fɛnɔ̀nfɛ̀.

¹⁰Kɛ̀ mɛhɑ́ɑ́rìmɛ̀ tùɔ̀kɛní kɑ̀ɑ bonkɛ ɑ do í kpeńnì.

¹¹Dɛɛtɛ́ bɛ̀ dɔ́ kɛ́kuɔ bɛ̀, bɛ̀ dɛ̀ri bɛ̀ kɛ kɔrinɛ̀ mukɔ̀ù, dɛɛtɛ́ bɛ.

¹²Kɑ̀ɑ yĩ ɑ do í yɛ̃́, Kuyie nkuu wúómmu, kunku yɛ̃́mu ɑ yɛ̀mmɛ̀, kù dɑ wúómmu, kuù bekùnɛ̀ bɑ́ wè o tɔ̃mmú dòmmɛ̀.

¹³M birɛ, nyo mmɛcekùɔ̀, mɛ̀ teénnɛ̀mu kɛ nɑɑti.

¹⁴Nyɛ̃́ kɛ dò mmɛciì nwennimu ɑ fòmmu kpɛ́í kɑ̀ɑ mɛ̀ pɛ̀tɛ́ mɛborimɛ bɑ́ ndɑ yóunɛ̀, kɑ̀ɑ yɑ̀ ɑ dɔ́ dɛ̀.

¹⁵Bɑ́ɑ́ dɔɔ̀ onitiyɛiwe kɔ̃mɛ kɛ́pɔntɛ onitisɑ̀ù cĩ́ɛ̃̀tɛ̀ ò bo tɛ̀.

¹⁶Onitisɑ̀ù bo nɑ kɛ́do kucɛ mɛ̀yiekɛ̀ kɛ bɑɑ nyiitimu, kòo nitiyɛiwe tɑ mɛhɑ́ɑ́rìmɛ̀ miɛkɛ dɛ̀ dèèmu.

¹⁷Kɑ̀ɑ dootitɔù do dɛ̀ bɑ́ɑ́ dɑ nɑrikɛ, kòò bètɛ́, diwɛ̀ì bɑ́ɑ́ dɑ pĩ́,

¹⁸Kuyie nyɑ̀ɑ̀ borɛ̀ yɑ̀ kɛ̀ dɛ̀ɛ kù yonkɛ bɑ́ kù tɛ̃́nkɛ bɑ́ɑ́ ò dɔ̀ɔ̀ mɛyɛi.

¹⁹Bɑ́ nhɛ̃ɛ̃nnɛ̀ bɛnitiyɛibɛ, bɑ́ɑ́ teetɛ́ mɛyɛi ndɔɔ̀rìbɛ̀.

²⁰Bɛnitiyɛibɛ í bɑɑ dɛ̀mɑrɛ̀ dɛyììkɛ̀, bɛ fòmmu yóó kúmu fìtírɛ̀ kɔ̃mɛ.

²¹M birɛ, ndé Kuyie nnɛ̀ okpɑ̀ɑ̀tì, bɑ́ɑ́ tɑunnɛ̀ bɛ̀ɛ̀ dɔ́ kɛ́ceetɛ dɛmɔu.

²²Mɛyɛi nyóó bɛ̀ tùɔ̀kɛnímu bɑ̀mbɑ̀, òmɔù mɛ nyí yɛ̃́ bɛ yɛ̃ĩti yó mmɑmɛ̀.

²³Ntɛ mɛciì nkó tinɑ́ɑǹtì tɛtì, dɛ̀ í wenni ɑ bo mbekùmɛ̀ kɛ mɔkɛ mɛbɑtimɛ̀.

²⁴Kòo beéntì mɔù kòńnɛ́ oyɛiwe, ibotí nɛ̀ bɛnìtìbɛ̀ dɛ miɛkɛ ɔ̃ nhò pɛ́ìmu.

²⁵Kɑ̀ɑ kpɑnnɛ̀ oyɛiwe dɛ̀ wennimu, ò ɔ̃ɔ̃ pɛ́tɛ́ mɛsɑ̀ɑ̀ mmɛ kɛ́di diwɛ̀ì.

²⁶Kɑ̀ɑ tɛ̃̀ńnɛ́ otɔù timɔ́mmɔnti, dɛɛ̀ bɛnkú ɑ ò dɔ́mɛ̀.

²⁷Bɑ́ ntu ɑ bo mɑɑ́ tɛcĩ́ɛ̃̀tɛ̀ kɛ í tũ̀ntɛ ɑ tɔ̃mmú ditowɑɑ̀ kɔ̃mu, kɛ í kùútí kupɑku.

²⁸Bɑ́ɑ́ sɔ̃́ntɛ́ kɛ́nnɑ́ɑ́ ɑ kou kpɛ́í ndɛtetìrɛ̀, ɑ dɔ́ kɛ́nɑɑ́ nsiyɑ́ɑ̀bìsí yiɛ̀ nweɑ̀?

²⁹Bɑ́ɑ́ yĩ́ ò n dɔ̀ɔ̀ miɛ nkɛ̀ m bo ò fɔ̀ɔ́, m bo ò tɛ̃̀ńnɛ́ ò n dɔ̀ɔ̀ tì.

³⁰M pɛ̃ɛ̃tɛ́ diyiè mɑrì otɔ̃nnɛ́díétì mɔù pɑku, kuyɛìnkù mɑkù pɑku,