Mareko 8:1-26

¹MRK 8.1-10 Kebi niainiai, nerut au kub lera tababu tabakiauda etami nade Iesu dawer. Nade ga yaba nole ko nalu nagriweretlare arwem, Iesude tabara memegle tababim darabgerda a yabi daratagerda,

²“Kara nas barukli able leem ableglam wi neis a netat gerger karidoge urdi a pe irdi yaba nole ko nalu nagriwerteda arwem.

³Ese ka yabi gedim namarkare ka nole yabi kikem darasisiare wader yabiaiam ya gabge erkepnonor ge obaum ableglam wader yabiaiam tabakiuda au murisiam.”

⁴Abi memeglegize abi itmerda, “Nako lelut lewer wairdar e able le wadarasisiare able lekak uteb pe irdi?”

⁵Iesude yabi nautmerda, “Naket bered nagriwerteda?” Wige abi detagerda, “Keriba 7 bered nagriwerteda.”

⁶Ege eudi ge able lera kub daratagerda wi obakeri sepge obamri. Ege eudige 7 bered etakri, Adi eswau ikaiku, ege bered mogem itri a tabara memegle naiswerda ya waiakai wi ya lera kub wanaiswelare. Ege memeglegize ga le naiswelare.

⁷Ege memegle ko urder yaba ko kepkep lar daragriweretlare. Iesude Adi eswau ikailu able larlam, a tabara memegle daratagerda wi able lar le wanaiswerare.

⁸Wige urder maike 4,000 le, yaba gair lera kem bosi nade yaba lewer aro esemuda. Nade memeglegize kaier etakerda wi dasmerda 7 epei kaier lewerlam bosi. Iesude able lera kub namarikdarda,

¹⁰Ege keko bakiamuda taba memeglekem narge batri a bakiauda able utebem ge able gedge irdireder Dalmanutage.

¹¹MRK 8.11-13 Wader Parisyo tabakiauda Iesuim a abi ikaidarda ga abi desaredlare. Wi Iesui bautmerer atamilam kotorlam ableglam wi laglag abi wadamisirda.

¹²Iesude eudige aukaka ner batawerdi a akiadari, “Naluglam le able kerkerge bautmeli nalu atamilam ikeredi? Ka wabi agekar detagreda, wi umerkak ya atamilam wairpeirare!”

¹³Ege eudige darakaireta. E ko bakiamuda narge akawerti, wige ko bakomerti bakiauda nerut pekge nikeperira.

¹⁴MRK 8.14-21 Memeglegize no netat bered narge tikadarda: wi okataprike darakaireta ko wader wataisa.

¹⁵Iesude yabi kikem daratagerda, “Wa okeoke uridwa! Wa okeoke uridwa Parisaio yislam a pako Erodi yislam.”

¹⁶Wige bakeli able mir ga ipulare tabadoge. Wi batagelare, “E able lu detautli ableglam keriba nole bered nagriwerteda.”

¹⁷Iesu umele dawer wi nalu mir batagelare ege eudige yabi nautmerda, “Wa nalu mir peua ipweda meriba nole bered kak? Wa nole peua umele uridli? Nako waba idoni au wapum dali?

¹⁸Waba poni nagriwerteda wa nole dasmereda, waba girip nagriwerteda, wa umerkak asrare. Wa umerkak dikepwalare?

¹⁹Nade ka 5 bered itri 5000em, wage naket epei daramida able leweru ge kaier barida?” Wige abi detagerda, “12 epei.”

²⁰“A nade ka 7 bered itri 4000em, wage naket epei daramida able leweru ge kaier barida?” Wige abi detagerda, “7 epei.”

²¹Iesude eudige yabi daratagerda, “Nako wa mena umerkak uridli?”

²²MRK 8.22-26 Wi bakiauda Betsaiadage bakarki nade ge wader legize sadmerle tigareda Iesuim. Wi abim bagoda Iesude abi waitutida.

²³Iesu akaidari sadmerlera tag derpeidari a abi adem utebiam datkimuada. E sadmerlera poni mosu ditwi a tabara tag ikaida abidoge dikmerida. A eudige eutmeri, “Nako ma lu darasmereda?”

²⁴Able kimiar eudige egri a abi detagri, “Ka le darasmereda; wi uridli mokakalam lu wipe daragmeda!”

²⁵Iesude ga tabara tag nakaidari able kimiarge namarikdari. Able kimiaride ga aukaise dasmeri; e umele wadasmeli gair lu paretkak. Abra poni ge badgirda.

²⁶Iesude able kimiar ko emarikda taba gedim. E able kimiar detagri, “Ma bakiamu gedim, mage nole ko bakiamu able utebem.”