Marcos 8:1-26

¹Ibagwengine, dule-bukidar gannar Jesús-walik ambikunonimarbalid. Dulemar masgunned satesoggu, Jesús na e-sapinganse gochad, ega sogded:

²—An wile we-dulemar-daked, ar ibapaagus anmarba garmakdimalad, emide, masgunned satemalad.

³Mas-guchasuli an e-negse barmidele, igarba ukudba negoedmaloed, ar ade, bukidar dikasur danimalad.

⁴E-sapingan, Jesús-abin sogdemalad: —Ar wegine dulemar mamaisulid. ¿Bia anmar dule-bukidaradga mas unniguar amiosunna?

⁵Jesús na e-sapinganse egisded: —¿Bemar gwabigwa madu nikasunna? E-sapingan, Jesús-abin sogdemalad: —Anmar gwagugle (7) madu nika.

⁶Geb Jesús dulemar napagi oambikued imaksad. E-argangi madu-gwagugled-susgua, Bab-Dummadga doggus-nuedye sogsad. Geb Jesús madu-bisge-bisge-imasgu, e-sapinganga madu uksad, adi, dulemarga mimiegar. Deyobi e-sapingan imaksad.

⁷Deginbali, ua-burwigana wis-ichesaar nikamarbalid. Jesús Bab-Dummadga doggus-nuedye sogsabalid, geb e-sapinganga sogsad, dulemarga mimimarye.

⁸Dulemar bela-nue-immeles mas guchamalad. Geb sorbali, Jesús-sapingan garba-gwagugle (7) mas-obichad wesmalad.

⁹Bela-dule-milibakesaar (4,000) mas guchamalad. Geb Jesús e-neg-e-negse dulemar-barmisad.

¹⁰A-sorbali, Jesús na e-sapinganmala urgi nakwisgu, Dalmanuta-yalaganba nadegusmalad.

¹¹Fariseoʼmar, Jesúsʼse nonimalad, geb Jesúsʼbo abin-abin imakarmalad. Yamo Jesús-wilubdakega, nibneggined-ibmar-wilubgan-dakledisulid emarga oyoye ese egichiarmalad.

¹²Jesús ulubgi ise-nue-bunnoar imaksad, geb sogded: “¿Ibiga we-dulemar-emmisgwamalad ibmar-wilubgan-dakledisulid imakbi an-abege? Napira an bemarga soged, bemar anse-ibmar-egisnaid, an bemarga oyogosulid.”

¹³Geb degine, Jesús Fariseoʼmar-idu naded. Geb gannar urgi nakwisgu, mata-abin-obakar naded.

¹⁴Jesús-sapingan madu-seded ies nadmalad. Unnila madu-gwagwen uryagi semamaid.

¹⁵Jesús na e-sapinganga sogded: —Fariseoʼmar-madubur-inagi, degi, Herodes-madubur-inagi, nue salakarmar.

¹⁶E-sapingan na muchub-muchub sognanai guarmalad: “Ar anmar madu satedbali, wede weyob soged.”

¹⁷Jesús na e-sapingan degi-soge-itosgu, ega sogded: —¿Ibiga bemar madu surye sogmala? ¿Amba bemar aku dakmala, degi, nue aku itomarbali? ¿Amba be gwage dutusurmala?

¹⁸Bemar ibya nikanad, degite ¿amba be aku dakmarde? Bemar uaya nikamarbalid, degite ¿amba bemar aku itomarbarde? ¿Bemar insasursi?

¹⁹An dule-miliataledga (5,000) madu-gwaataled-mimisgu, ¿bemar garba-gwabigwa madu-obichad wesagusmala? E-sapingan, abin-sogdemalad: —Garba gwaambe-gakabo (12) anmar wesmalad.

²⁰Jesús sogdebalid: —Dule-milibaked-abargi (4,000) an madu-gwagugled-mimisbargu (7), ¿Bemar garba-gwabigwa wesagusmarbali? E-sapingan, abin-sogdemalad: —Garba gwagugle (7) anmar wesmalad.

²¹Geb Jesús na e-sapinganga sogdebalid: —Degite ¿Ibiga bemar amba aku-itosunna?

²²Betsaida-neggweburse-nonimargu, dulemar dule-wargwen aku-ataked Jesúsʼse senonimalad. Dulemar, Jesúsʼgi wilenaigusmalad, dule-ebuye.

²³Jesús dule-aku-ataked argangi-gasgu, neggweburgi ega banguded. Geb Jesús dule-aku-ataked-ibyagi-wiaksagu, degi, e-argan egi mesisgu, ese egichided: —¿Emigindi, sunna mag be atake?

²⁴Dule-aku-ataked, atakdegu sogded: —Ar dulemar sapimaryob an daked, degi-inigwele, nanamar an daked.

²⁵Geb Jesús na e-argan gannar dule-aku-ataked-e-ibyagi mesisad, geb dule nugusad, magar atakded, degi, nue-swilidik atakdesunnad.

²⁶Jesús dule-nugusad e-negse barmisad, ega sogsad: —Mer be neggweburse doggwelo, degi, mer dulemarga be we-ibmar sogbalo.