Malekha 8:1-26

¹Mu manchuva ago, khwale nu lulundamano uluvakha, ulwale vovole ekhyahulya.

²Yiisu akhavelanga avakhongi va mwene nu khuvavula, “Nikholokolela ekhesa ululundamano ulu, vandelile ukhuva nune amanchuva gadatu na valevovole ekhyahulya.

³Ningavavule vagodokhe mumbunchenge uvwa vene khetalya viwesya ukhunchiliha mu njela ne njala. Avange vakhomile khuvutali.”

⁴Avakhongi va mwene vakhamwanda, “Twikhavandahu emikate egya khuvigusya avanu ava apasitakhenu?”

⁵Akhavavuncha, “Mle ni vimenyu vilengi ifya mikate?” Vakhata, “Saba.”

⁶Akhalulagela ululundamano lutame pasi. Akhatola emikati saba, akhansana Unguluve, nu khugemenyula. Akhava pa avakhongi va mwene vavekhe mu mbulongolo, avene vakhagevekha mbulongolo lwa lulundamano.

⁷Vale ni somba indebe, vu esayile akhavalagela avakhongi va mwene vavagavele n anchope.

⁸Valile vakhakwilanila. Pwu vakhalundania ifimenyu ifisigile, ifitundu ifivakha saba.

⁹Avanu vale elfu nne. Pwu akhavalekha vavuyage.

¹⁰Pwu akhingela mu mbwato na vakhongi va mwene, pwu vakhaluta ulunyikha ulwa Dalmanuta.

¹¹Pwu avalongonchi vakhehuma khunchi nu khutengula ukhukanikhana nu mwene. Valekhunogwa avape ifikhwani ifikhomile khukyanya, valekhugela.

¹²Akhenchofanja mu numbula eya mwene akhata, “Kheli ekhepapo ekhe khilonda ifikhwani? Nekhovavula uvulweli umwe, khesikhuli ekhehwani ekheyakheva khihumela khuhepapo ekhe.”

¹³Pwu akhavalekhe, akhingela mu mbwato, akhahega ukhuluta emwambo eyenge.

¹⁴Unsekhe ugwa avakhongi va mwene vasamilwe ukhugega emikati. vale vuvule emikate, vale ne khemenyu khemu mu mbwato.

¹⁵Akhavavunga ukhuta, “Muvinchage mukho nu mwilolele nu uvuvivi uvwa valongonchi nu uvuvivi uvwa Herode.

¹⁶Avakhongi vahenchofyanja vavo, “Ulwa khuva tulevuvule emukate.”

¹⁷U Yiisu akhalemanya ele, khuvavula, “Khehi mu khenchofanya ukhuta mule vuvule emikate? Bado samulomanyile? Samukhweliwa? Inumbula nchenyo nchivile nyebepe?

¹⁸Mle na mikho, samwilola? Mle ni mbulukhutu, samupolekha? Samukumbukha?

¹⁹Vonegavinie emikate gekhano khuvanu elfu ikhano, mwatolile ifitundu filengi ifidegile ifimenyu ifyamikate?” Vakhamwanda, “Kumi na fivele.”

²⁰“Ulwanagavinie emikate saba khu vanu elfu nne, mwatolile ifitundu filengi?”

²¹Vakhata, “Saba.” Akhavavula, “Samukhweliwa?”

²²Vakhincha khu Bethsaida. Avanu vavo vagegile khwa umunu uvesisola vakhansima u Yiisu amwibate.

²³Yiisu akhamwibata umunu uvesilola, nu khundongolela khunchi khuhejiji. Vuabekhile amati pa mikho ga mwene nu khugolosya ifivokho fya mwene khu mwene, akhambuncha, “Vukhohevona khyohyoni?”

²⁴Akhalola khu kyanya nu khuta, “Nikhuva vona avanu nde mibekhe egigenda.”

²⁵Pwu akhagolosya amavokho ga mwene mu mikho ga mwene, omunu ola akhafungula amikho ga mwene, akhalola akhange, akhavona khela khenu khenonu.

²⁶Yiisu akhandekha alote khumwene nu khumbula, “Usite ukhwingela mjini.”