Marcos 8:1-26

¹Aféruillaɨdo aillo comɨnɨ meine dáanomo gaɨrídiaɨoɨ. Iaɨoɨ güille iñede. Ie jira Jesús ie llófuegamacɨ jɨ́ɨrita, íaɨoɨna daɨde:

²—Bie náɨraɨri dúecaidɨcue. Ja daruiámani benó cue dɨga itíaɨoɨ. Iaɨoɨ güille jae iñede.

³Güiñeno íaɨoɨ jofomo orédɨcuenia, iodo báɨicana jáitiaɨoɨ. Dáarie jɨcana bitíaɨoɨza, —daɨde Jesús.

⁴Ie llófuegamacɨ uai otíaɨoɨ: —Benó bu iñénanoza ¿mɨnɨ́cana íaɨoɨ ecáredɨcaɨ?

⁵Jesús íaɨoɨmo jɨcánote: —¿Nɨga panes ómoɨmo ite? —daɨde. Jira afémacɨ daɨdíaɨoɨ: —Siete panes caɨmo ite, —daɨdíaɨoɨ.

⁶Ie jira nana comɨnɨ ana énɨemo ráɨitate. Iemo Jesús afe siete panes llɨ́ɨnuano, Juzíñamuina “Fɨgora” daɨde. Daɨna mei, afe panes dɨtade. Daɨí ñeta, ie llófuegamacɨmo ite. Afe mei llófuegamacɨ comɨ́nɨdo oni fecádiaɨoɨ.

⁷Afémacɨmo due jiza chamu ite. Jesús Juzíñamuina “Fɨgora” daɨnano afe chamu fecátate.

⁸Nana güitíaɨoɨ. Iemona ñue jeɨ́rediaɨoɨ. Ie mei güíllamona fɨébidɨno siete dɨga cɨrɨgaɨ ɨráɨdiaɨoɨ.

⁹Afe güitɨno cuatro milmo áɨnoziacade. Afe mei Jesús nana íaɨoɨ raɨnode.

¹⁰Ráɨnua mei afémɨe raɨre ie llófuegamacɨ dɨga nocaemo jofo jaide. Iemo Dalmanuta énɨemo jaide.

¹¹Iemona fariséuaɨ Jesumo júfiduaɨbitiaɨoɨ. Ie facátaiacadiaɨoɨ. Iemona: “Monámona uaido comuide onótate raa caɨmo ácatari,” daɨdíaɨoɨ.

¹²Iemo Jesús comecɨ zúurenamona izire zegóricaillano daɨde: —¿Nɨbái mei bie naɨraɨ uáimona comuide onótate raa jɨcádiaɨoɨ? Uáfuena ómoɨmo llotɨcue, jaca onótate raana bu ómoɨmo fɨ́noñeite, —daɨde.

¹³Jira Jesús íaɨoɨ fɨ́iano meine nocaemo jaide. Iemo jorai enéfenemo jaide.

¹⁴Jesús ie llófuegamacɨ dɨga íaɨoɨ jailla llezica, íaɨoɨ ráiñuaɨ féitatiaɨoɨ. Dɨnó nocaemo fia daa pan íaɨoɨmo ite.

¹⁵Iemo Jesús íaɨoɨ ocuide: —Omoɨ cacai. Fariséuaɨmo ite pan aillo fáitate raa izóidɨfuemona abɨ́ omoɨ rairuiri. Daje izói Heródesmo ite pan fáitate raa izóidɨfuemona abɨ omoɨ rairuiri, —daɨde.

¹⁶Iemo llófuegamacɨ danɨ conímamo llotíaɨoɨ: —Nɨbaɨ caɨ pan iñena jírari, Jesús caɨna daɨí rɨire daɨde, —daɨdíaɨoɨ.

¹⁷Jesús danɨ íaɨoɨ úrillana onóillano daɨde: —¿Nɨbái mei, “caɨmo pan iñede” danɨ jofo conímamo daɨífɨredɨomoɨ? ¿Naɨ fɨdɨ́ñedɨomoɨ? ¿Naɨ omoɨ comécɨmo déiñede? ¿Omoɨ comecɨ naɨ ɨere rɨírede?

¹⁸¿Omoɨ uído cɨóñedɨomoɨ? ¿Omoɨ jefodo cacáñedɨomoɨ? ¿Naɨ cue fɨnócafuena onóñedɨomoɨ?

¹⁹Naui cinco mil ɨíñɨaɨ dɨ́gamɨedemo afe cinco panes cue fecácamo, ¿nɨga cɨrɨgaɨ fɨébidɨnona ɨráɨdɨomoɨ? —daɨde. Iemo daɨdíaɨoɨ: —Doce dɨ́gagaɨ cɨrɨgaɨ, —daɨdíaɨoɨ.

²⁰Jesús nane daɨde: —Daje izói cuatro mil ɨíñɨaɨ dɨ́gamɨedemo afe siete panes cue fecácamo, ¿nɨga oruide cɨrɨgaɨ ɨráɨdɨomoɨ? —daɨde. Iemo daɨdíaɨoɨ: —Siete dɨ́gagaɨ cɨrɨgaɨ, —daɨdíaɨoɨ.

²¹Iemo íaɨoɨna daɨde: —¿Naɨ omoɨ comécɨmo jaca déiñede? —daɨde.

²²Ja Betsaida jófuemo dúcɨdiaɨoɨ. Iemo uina cɨóñedɨmɨe Jesumo comɨnɨ atɨ́diaɨoɨ. Iena jetánollena izire jɨcádiaɨoɨ.

²³Uina cɨóñedɨmɨe ónoɨdo llɨ́ɨnota, jofue jinomo Jesús ie uite. Iemo fue fáicɨdo ie uimo bɨtade. Afe llezica afémɨemo onoɨ bɨtade. Afe mei íemo jɨcánote: —¿Ja baca o ui cɨoide? —daɨde.

²⁴Jira uina cɨóñedɨmɨe érocaillano daɨde: —Jɨɨ, comɨnɨ mácana cɨódɨcue, mei íadɨ uáfodo íaɨoɨna cɨóñedɨcue. Afémacɨ aménaɨaɨ izói cɨóidiaɨoɨ, —daɨde.

²⁵Ie jira Jesús nane dáanomo ie uimo ie onoɨ jóonete. Afe mei afémɨe rɨire eroide. Iemo ie ui ja jíllode; ja afémɨe naga raana uáfodo ñue cɨode.

²⁶Ie mei Jesús ie jofomo ie orede. Iena daɨde: —Jófuemo jáiñeno iri. Afénomo ite comɨ́nɨmo, buna lloñeno iri, —daɨde.