Marcos 8:1-26

¹Nayan, wedà kenamay, ontò medita se otaw netipon diyà ki Jesus. Pegkewedad te kànen dan, tinawal i Jesus se menge tinoledaan din, aw minikagi sikandin,

²“Neidowan ko den se menge otaw seini, so netelowan den dan timaking kanak, aw wedad den kànen dan.

³Simpana ipeolì ko dan te binallos dan pa, metapì dan kidoen te dalan, so mediyò se ogpeanan te keditaan dan.”

⁴Minikagi se tinoledaan din, “Meneng kebigtilan ini, aw wedad palos ebatan tadon te pan amon ipekaen tadon kandan.”

⁵Mig-insà si Jesus, “Pila lay se pan inibing niyo?” Timaba dan, “Pito olò.”

⁶Penga niyan, impeonsad din se kedita te otaw diyà te tanà. Inabat din se pito pan, aw migpesiontong diyà te Timanem kenyan. Binelà-belà din iyan, aw imbegay din diyà te menge tinoledaan din, aw inteped dan diyà te menge otaw netipon.

⁷Doen heman pilabok ikan dedeitek. Migpesiontong heman si Jesus diyà te Timanem kenyan, aw impeteped din heman iyan diyà kandan.

⁸Kimaen se kedita dan aw nebesog dan. Penga niyan, inimon dan se samà te pan kinaen dan, aw pito se boliyas nepenò.

⁹Menge epat melalan se otaw kimaen kenyan.

¹⁰Penga niyan, impeolì i Jesus se kedita dan, aw simakay sikandin te belangay doma te menge tinoledaan din, aw dimoton dan te probinsya medapag te Dalmanota.

¹¹Nayan, doen menge Parisiyo dimoton ki Jesus. Megdindil dan peden kandin. Ibeg dan megtandà dan kandin, aw yan se doun te nemoyò dan te ipekità din diyà kandan se pengilala amon ketegahan dan te ontò sikandin insogò te Timanem.

¹²Ontò migpedo-pedo si Jesus tandà te puluk din, aw minikagi sikandin, “Wedad kekemowan te pegpekità ko kenyo te pengilala. Eneng-enengi niyo se kagi ko seini. Wedad palos pengilala ipekità te Timanem diyà kenyo.”

¹³Penga niyan, nesayo si Jesus lekat kidoen, aw simakay te belangay pesalo doton dipag te lanaw.

¹⁴Nayan, pegbatas dan te lanaw, wedad pan inibing te menge tinoledaan i Jesus, so nelibelan dan se bawo dan. Meneng doen sebad olò pan kidoen te belangay.

¹⁵Migpunù si Jesus kandan, kagi din, “Peg-ahà kaw amon eked kaw ketini te yist te menge Parisiyo aw si Herod.”

¹⁶Migpebelaw-belaway se menge tinoledaan din, kagi dan, “Yan se inikagi din so wedad pan inibing tadon.”

¹⁷Meneng netegahan i Jesus aw eden se aneng-aneng dan, aw minikagi sikandin, “Tay law. Ikà niyo egkepela so wedad pan inibing niyo. Nepela a kenyo, so wedà niyo pa kelebeti se inikagi ko gina diyà kenyo. Magsen pa se olo niyo.

¹⁸Pengkey doen mata niyo, wedà kaw pa kità te kebenalan. Pengkey doen telinga niyo, wedà kaw pa penenalan. Iling te nelibelan niyo se kepelahan ininang ko.

¹⁹Pegpekaen ko te lima melalan otaw te lima pan, pila lay buun se inipenò niyo te samà?” Timaba dan, “Sempolò teg dowa.”

²⁰Mig-insà heman si Jesus, “Pegpekaen ko te epat melalan otaw te pito pan, pila lay boliyas se inipenò niyo te samà?” Timaba dan, “Pito.”

²¹Minikagi si Jesus, “Aw wedà niyo iyan kelibeli, nepela a so wedà niyo pa kelebeti se inikagi ko gina diyà kenyo.”

²²Nayan, dimoton si Jesus aw menge tinoledaan din te Bitsayda. Doen menge otaw nengibing te otaw bota doton ki Jesus, aw nemoyò dan te pemàdan din sikandin amon kegolian.

²³Minawid si Jesus te belad te otaw bota, aw inagak din doton te lowà te lonsod. Penga niyan, migsawol sikandin te ngingi diyà te mata te bota, aw nemaed kandin, aw mig-insà, “Doen lay den kinità nikaw?”

²⁴Timengteng se otaw aw minikagi, “Ee. Meneng kenà metaen so iling te lawa te kayo se bawa te otaw kinità ko migpanaw-panaw.”

²⁵Todà nemaed si Jesus te mata din. Penga niyan, ontò timengteng se otaw sìyan aw kinità din se otaw ontò metaen, so migkèpiya den se mata din.

²⁶Penga niyan, impeolì sikandin i Jesus, kagi din, “Ikà eg-apit pengkey doton te lonsod.”