SAN MARCOS 8:1-26

¹Cʉ pa‑cʉ, már ndo ngu̱tsjɛ cʉ cja̱hni cʉ mí tɛnijʉ car Jesús. Ya xquí dejʉ pʉ jabʉ már bbʉ guegue, cja̱ jin te mí pɛhtzi te di zijʉ. Nubbʉ, car Jesús bi nzoh quí möxte, bi xijmʉ:

²―Dí jui̱jquigö yʉ cja̱hni rá ngu̱ yʉ xí ndɛngui. Ya xí nzʉ jñu̱jpa xí ndøhmi ya, cja̱ jin te i pɛhtzi pa da zijʉ.

³Cja̱ bbʉ gu cu̱jmʉ, da ma í ngu̱jʉ, cja̱ jin gui tzijʉ, da ma drí ngüentijʉ pʉ jar hñu̱, porque i bbʉj yʉ ddaa, ndo yanʉ xcuí hñe̱jmʉ.―

⁴Cja̱ bi da̱j ya quí möxte, bi dyönijʉ: ―u̱jtjo cʉ dɛnda hua jabʉ dí bbʉpjʉ. Guejtjo hne̱je̱ jin te i bbʉ ngu̱. ¿Jabʉ gu tötijʉ tju̱jme̱ drá ngu̱ pa da ñi̱ña̱ göhtjo yʉ cja̱hni‑yʉ?―

⁵Nu car Jesús bi dyön quí möxte: ―¿Tengu̱ tju̱jme̱ guí pɛhtzijʉ?― Cja̱ bi ma̱jmʉ: ―Yojto.―

⁶Nubbʉ, car Jesús bi bbɛjpi car ndo jmu̱ndo cʉ cja̱hni di mi̱pjʉ jöy. Cja̱ guegue bi zɛti cʉ yojto tju̱jme, bi dyöjpi cjama̱di ca Ocja̱, ma ya bi xɛjqui. Diguebbʉ ya, bi un quí möxte, cja̱ nucʉ, bi jña̱jʉ, bi møhmpijʉ cʉ cja̱hni rá ngu̱.

⁷Mí pɛhtzijʉ hne̱je̱ tengu̱ tzi möy, cja̱ car Jesús pé bi dyöjpi mpöjcje ca Ocja̱ digue cʉ tzi möy. Diguebbʉ ya, pé bi un quí möxte cja̱ guegue‑cʉ bi møhmpijʉ cʉ cja̱hni hne̱je̱.

⁸Cja̱ göhtjo cʉ cja̱hni bi zijʉ, bi ñi̱ña̱jʉ rá zö. Ma ya, quí möxte car Jesús bi jmu̱ntzijʉ cʉ tzi pedazo cʉ xquí sobra, bi ñu̱htzijʉ yojto bbøtze rá nojo.

⁹Cja̱ mí bbʉ como go mil cʉ cja̱hni cʉ bi zijʉ. Diguebbʉ ya, car Jesús bi gu̱h cʉ cja̱hni di ma í ngu̱jʉ,

¹⁰cja̱ guegue ya bi ñʉti jar barco, bi mɛhui quí möxte. Ncjapʉ gá nzøtijʉ jar lugar ca mí tsjifi Dalmanuta.

¹¹Diguebbʉ ya bú e̱h cʉ dda cja̱hni cʉ mí tsjifi fariseo, bi guatijʉ car Jesús pa di dyøhtibijʉ hnar prueba. Bi mʉdi bi mbömbihui palabra car Jesús. Bi dyöjpijʉ car Jesús di u̱jti hnar milagro drí hñe̱ ji̱tzi, como jí̱ mí e̱me̱jʉ, ¿cja xcuí hñe̱h ca Ocja̱ car Jesús?

¹²Nu car Jesús bi ntzøte, bi ungui ʉr du̱mʉy, como mí pa̱di, jí̱ mí ne di hñeme cʉ fariseo. Cja̱ bi xijmʉ: ―Nuquɛjʉ, guí cja̱hnijʉ guí bbʉpjʉ yʉ pa ya, ¿dyoca̱ dé guí öjquijʉ gu øti milagro pa gui pa̱dijʉ, jabʉ xtá e̱jcö? Dí xihquijʉ ntju̱mʉy, jin tema milagro gu u̱jtiquijʉ pa gui pa̱dijʉ jabʉ xtá e̱je̱.―

¹³Cja̱ bbʉ xquí ma̱ na̱r palabra‑ná̱, car Jesús bi wem pʉ, bi zoh cʉ fariseo, pé bi ñʉti jar barco, cja̱ pé bi ddax car mar. Pé bi ma gá ma hnanguadi, bi mɛhui quí möxte.

¹⁴Nu quí möxte car Jesús bbʉ mí ñʉtijʉ jar barco jin gá ngʉxjʉ tju̱jme̱ pa di zijʉ, bi da̱be̱nitjojʉ. Hnaatjo ʉr tzi tju̱jme̱ bi jña̱xjʉ.

¹⁵Cja̱ bbʉ már bbʉjtijʉ jar barco, car Jesús bi xih quí möxte: ―Gui mfödijʉ, jin gui ma gui jña̱jʉ car levadura ca rí hñe̱h cʉ fariseo, cja̱ co cʉ cja̱hni cʉ i tɛnijʉ car Herodes.―

¹⁶Bbʉ mí dyøj ya nʉr palabra‑nʉ, bi hñöntsjɛjʉ qui amigo, ¿te mí ne di ma̱n car palabra‑cá̱? Ngá ma̱jmʉ, pé ntoja mí nesta di döjmʉ tju̱jme̱, como jin te xcuí gʉjʉ.

¹⁷Nu car Jesús bi dyøde te már ma̱jmʉ, cja̱ bi dyöni: ―¿Dyoca̱ guí i̱na̱jʉ dí xihquijʉ guí nesta gui töjmʉ tju̱jme̱? ¿Cja̱ jí̱ bbe guí ntiendejʉ ter bɛh ca̱ dí xihquijʉ? ¿Cja jí̱ bbe guí ja̱jʉ ʉr huɛnda ja ncja ca dí u̱jtiquijʉ? ¿Cja nttzɛditjo guí me̱mʉyjʉ?

¹⁸¿Cja jin guí cca̱htijʉ te dí øtigö? ¿Cja jin guí øjmʉ car palabra ca dí ma̱ngö? ¿Cja huá ya xcú da̱be̱nijʉ ja mí ncja cʉ milagro xcú cca̱jtiguijʉ xtú øte?

¹⁹¿Cja jin guí mbe̱nijʉ ya, bbʉ ndú jejqui cʉ cʉtta tju̱jme̱, cja̱ gú pøhmpijʉ cʉ cja̱hni cʉ cʉtta mil, cja̱ diguebbʉ ya gú jmu̱ntzijʉ cʉ tzi pedazo cʉ xquí sobra, tengu̱ bbøtze bi ñu̱tzi?― Cja̱ bi da̱j ya quí möxte: ―Bi ñu̱xi doce bbøtze.―

²⁰Cja̱ pé bi dyön car Jesús: ―Guejtjo, bbʉ ndú jejqui cʉ yojto tju̱jme̱, cja̱ gú pøhmpijʉ cʉ cja̱hni cʉ go mil, cja̱ diguebbʉ ya pé gú jmu̱ntzijʉ cʉ tzi pedazo cʉ xquí sobra, ¿cja jin guí mbe̱nijʉ hne̱je̱ tengu̱ bbøtze rá nojo bi ñu̱xi bbʉ́?― Cja̱ pé bi da̱h quí möxe: ―Bi ñu̱xi yojto bbøtze.―

²¹Pé bi ma̱n car Jesús, bbʉ: ―¿Cja jí̱ bbe guí pa̱dijʉ, jin gui gue car tju̱jme̱ xtú xihquijʉ jin gui jña̱mpijʉ cʉ fariseo?― Ncjapʉ gá ma̱n car Jesús, jin di hñe̱me̱jʉ ca mí u̱jti cʉ fariseo.

²²Ma ya, car Jesús bi zøti pʉ hnar jñi̱ni ca mí tsjifi Betsaida. Cja̱ cʉ mi̱ngu̱ pʉ bú tzí hnar godö, bi dyöjpi car Jesús di xojquibi quí dö.

²³Nubbʉ́, car Jesús bi pɛntibi cár dyɛ car godö, bi gʉjqui pʉ jar jñi̱ni gá ma hnanguadi. Diguebbʉ ya, bi gohtzibi cár cji̱jni jáy dö car godö, cja̱ bi dyʉx quí dyɛ. Nubbʉ́, bi dyöni: ―¿Cja ya xquí tzi janti ya?―

²⁴Nubbʉ́, bi jani car godö cja̱ bi ma̱: ―Dí janti yʉ dda cja̱hni, i ne da jñɛjmi za, pe nuyʉ́, i dyo.―

²⁵Ma ya car Jesús pé bi dyʉx quí dyɛ jáy dö car godö. Nubbʉ́, bi joh quí dö car hñøjø cja̱ bi cca̱hti rá zö. Cja̱ bi jianti rá tzi zö göhtjo, hasta cʉ cosa cʉ már bbʉ yanʉ.

²⁶Diguebbʉ ya, car Jesús bi bbɛjpi di má ʉ́r ngu̱, bi xifi jim pé di ñʉti nʉ jar jñi̱ni, cja̱ jin di göx cʉ cja̱hni toca̱ xquí jojquibi quí dö.