Mark 8:1-26

¹Jurin dat time, noda big crowd ob people come geda roun Jedus. Wen de people ain hab nottin lef fa nyam, Jedus call e ciple dem.

²E tell um say, “A saary fa de people yah. Dey been wid me shree day an now dey ain hab nottin fa nyam.

³Ef A tell um fa go ta dey house wid nottin fa nyam, dey gwine pass out long de road. Cause some ob dem done come a good way.”

⁴E ciple dem aks Jedus say, “Weh anybody kin find nuff ration fa gii all dese yah people fa nyam? We ain able fa git bread out een dis wildaness.”

⁵Jedus aks um say, “Hommuch bread oona hab?” Dey ansa say, “We hab seben loaf.”

⁶Jedus chaage all de people fa seddown pon de groun. Den e tek de seben loaf an e tank God fa um. E broke de bread an gim ta e ciple dem fa han out ta de people. An de ciple dem gii de people de bread.

⁷Dey hab few leetle fish too. Jedus tell God tankya fa dem an tell e ciple dem fa han um out.

⁸Ebrybody nyam til dey sattify. An wen de ciple dem done geda de food wa been lef oba, dey git seben full basket.

⁹Bout fo tousan people been dey.

¹⁰Den Jedus sen de people ta dey house, an e git eenta de boat wid e ciple dem an gone ta de place dey call Dalmanutha.

¹¹Some Pharisee come ta Jedus an staat fa aagy wid um. Dey wahn fa trick um, so dey aks um fa do a sign fa sho dat God sen um fa true.

¹²Jedus leh out a big sigh an e say, “Hoccome people dese wahn me fa show a sign? A da tell oona fa true, A ain gwine show oona no sign.”

¹³Den Jedus an e ciple dem lef dem people an git back eenta de boat, cross oba ta de oda side ob de lake.

¹⁴De ciple dem been fagit fa bring plenty bread. Dey been jes one loaf wid um een de boat.

¹⁵Wen dey gwine, Jedus waan um say, “Oona mus tek cyah. Mus look out fa de yeast wa de Pharisee dem an Herod da nyuse.”

¹⁶De ciple dem taak ta one noda say, “E taak so cause we ain hab no bread.”

¹⁷Jedus know wa dey beena taak bout, so e aks um say, “Hoccome oona da taak say oona ain hab no bread? Oona stillyet ain know, oona ain ondastan, ainty?

¹⁸Oona hab eye. Hoccome oona ain see? Oona hab yea. Hoccome oona ain yeh? Oona ain memba nottin, ainty?

¹⁹Wen A broke op dem fibe loaf ob bread fa gim ta fibe tousan man dem, how many basket full ob lefoba bread oona pick op?” Dey ansa say, “Dey been tweb basket.”

²⁰Den Jedus aks um say, “An wen A broke op seben loaf ob bread fa gim ta fo tousan people, how many basket full ob lefoba bread oona pick op?” Dey ansa say, “Dey been seben basket.”

²¹Jedus say ta dem, “Oona done see all dat, stillyet oona ain ondastan, ainty?”

²²Wen Jedus an e ciple dem come ta Bethsaida, some people bring one bline eye man ta Jedus. De people beg um fa tetch de man an mek um well.

²³Jedus tek de bline eye man by e han an lead um outta de willage. Den Jedus spit pon de man two eye an pit e han pon um. Jedus aks um say, “Wa ya da see?”

²⁴De man look op an say, “Yeah, A see some people, bot dey look like tree wa da waak roun.”

²⁵Jedus tetch de man eye gin. De man look roun an pay close tention ta wa e see. E ain been bline eye no mo. E able fa see good an e see ebryting plain.

²⁶Jedus chaage um say, “Mus dohn eben go eenta de willage.” Den e sen um home.