Mareko 8:1-26

¹Eꞌe madaḡano, vaze ḡuḡuvaḡaniꞌa bare nuꞌoraro. Zeꞌe ogomuze oꞌoꞌa. Iesuꞌa tahiꞌaḡa huziro, ebu ziro.

²'Eꞌe ꞌahi duḡuru vetuḡaziꞌohe, mazaḡa ze mada uḡidu eḡe teite radeha, zu ogomuze oꞌoꞌa.

³Vinini tare nezeo tuḡuzine, ibio higau bauriꞌuma. Nuꞌe haba faḡanonoꞌo onaeha.'

⁴Ebu tahiꞌaḡaniꞌa ane ḡadiniro. 'Haba bohaꞌano ꞌada, noumao ogomu ḡehaḡa horonadu, ꞌahi duḡuru ḡubuziꞌuma?'

⁵Iesuꞌa ḡadizenaꞌa, ꞌahige reiro. 'Zae mazao |iberedi|r nuguꞌeꞌe?' Ebu zeꞌa, 'Fuꞌo tu aheu fare (7)' rae reiro.

⁶Ebu vaze ḡuḡuvaḡa zinaꞌa, 'Rahao ehoroꞌi!' ꞌOugadu beredi fuꞌo aheu fare madu Badiꞌa uminiro. Ebu vahegadu vaze ḡuḡuvaḡa zenoga veize ane tahiꞌaḡa ziniro. Ebu tahiꞌaḡaꞌa ḡahugiro.

⁷Zeꞌe ḡozone komeḡa nu zuniꞌeꞌe. Iesuꞌa eꞌe veize kuraro, ebu tahiꞌaḡa zinaꞌa, 'Ḡahuge ragavoꞌi!' reiro.

⁸Zeḡe niduꞌa au ubararo. Vaze niduꞌaꞌe 4000. Ebu iberedi ḡahaꞌaḡahaꞌa tunahuo mae mae ufiro. Tunahu fuꞌo aheu fare irivaꞌoniro.

¹⁰Ebu zeḡe niduꞌa tuḡuziro. Iesu ani zogone iḡunadu, tahiꞌaḡa teite ḡasio ehoradu, Dalumanuta habaꞌa mone onamiro.

¹¹Farisea azaḡaniꞌa onairo, ebu Iesu teite ḡoere hina naenaetitiro. Iesu soꞌonoga rae, Iesuꞌa, Badiꞌa gigiꞌa hina haḡai nu badeḡa* haḡaoga uratiro.

¹²Iesu ani hereꞌenaꞌa, zamaḡaniꞌa adudaro, ebu ꞌahige reiro. 'Nougadu ꞌahi azaḡaꞌe haḡai nu badeḡa urateꞌohe? E hubehune zae ziꞌohe. ꞌAhi duḡuru veize haḡai nu badeḡaꞌe mene haḡaiꞌuma.'

¹³Ebu aniꞌa muhiziro. Bare ḡasio ehoradu, duꞌura mone afa fare onamiro.

¹⁴Iesu tahiꞌaꞌe |iberedi|r mouga aḡutaro ꞌahine, zeꞌe tiba daꞌo ḡasio ufi odohiro.

¹⁵Iesuꞌa iraduguzenaꞌa ꞌahige reiro. 'Faine ḡianoꞌi! Heroda zu Farisea azaḡa |iisiti|r ḡianoꞌi!'

¹⁶Zeꞌa ḡoꞌaneꞌenaꞌa, “Emeꞌa iberedi mene odoheha ꞌahine, ꞌouge raꞌohe.”

¹⁷Iesuꞌa ze nagini ḡoꞌanirotaꞌaꞌe ederirotene, ziro, raenaꞌa, “Nougadu beredi nu mene odohateꞌeanoꞌo ḡoꞌaneꞌohe? Zaꞌe ize mene ederehehe ga mene zamarehehe? Zamaze uzaboḡahehe?'

¹⁸Ubumazeta, rehano mene ehamuꞌehehe? Teḡazeta, rehano mene igiꞌehehe? Za mene zamareꞌehehe,

¹⁹eḡeꞌa vaze daha fuꞌo (5000) veize, |iberedi|r fuꞌo (5) vahegirotaꞌaꞌe? |iBeredi|r ḡahaꞌa ḡahaꞌaꞌe tunahu nugu irivaꞌoniro?' Zeḡeꞌa ninaꞌa, 'Gaubanana aheu fare (12)' reiro.

²⁰Iesuꞌa zinaꞌa, 'Ebu vaze daha ḡazaḡa (4000) veize, |iberedi|r fuꞌo tu aheu fare (7) vahegirotene, |iberedi|r ḡahaꞌa ḡahaꞌaꞌe tunahu nugu irivaꞌoniro?' Zeḡeꞌa naenaeniꞌenaꞌa, 'Fuꞌo tu aheu fare (7)' reiro.

²¹'Za ize mene zamareꞌehehe?' Iesuꞌa ꞌouge rae ḡadiziro.

²²Iesuꞌa tahiꞌaḡa teite Betesaida neḡano feuriro. Feurirotene, vaze nuꞌa vaze ubumaḡa kuruḡa, Iesu vaḡe abine onairo. Ebu ubumaḡa obonoga rae, umidiro.

²³Iesuꞌa vaze ubumaḡa kuruḡa evoꞌano abinadu, ne huni enoga tutune onamiro. Ebu vaze ubumaḡano soꞌabidadu, evoꞌa ubumaḡa ranatiro. Iesuꞌa ḡadiniro. 'Ḡa ḡau nu horoneꞌehehe?'

²⁴Vaze ubumaḡa kuruḡaniꞌa, dude ehamanadu, ꞌahige naenaeniro. 'Vaze horozeꞌe rehano, ire teige edau ragaveꞌohe.'

²⁵Ebuni Iesuꞌa evoꞌa bare ubumaḡa ranatirotene, vaze ubumaḡa kuruḡa riḡa ehamaro, ebuni ubumaḡa manoriro. Ḡau niduꞌa faine horoniro.

²⁶Iesuꞌa ane ne tuḡune onameꞌenaꞌa, ꞌahige reiro. 'Betesaida neḡa ize ago diuḡoꞌi!'