MAREK 8:1-26

¹Andre ola dživesa, sar sas pale zgele but manuša a na sas len so te chal, o Ježiš vičinďa ke peste le učeňiken a phenďa lenge:

²“Pharo mange hin vaš kala manuša, bo imar trin dživesa hine manca a nane len so te chal.

³Te len bičhavava khere bokhalen, odperena pal o drom, bo varesave avle dural.”

⁴O učeňika leske odphende: “Ko pre kada omuklo than šaj dochudel maro, hoj te čaľarel kajci manušen?”

⁵Ale phučľa lendar: “Keci tumen hin mare?” Odphende leske: “Efta.”

⁶Rozkazinďa le manušenge, hoj peske te bešen pre phuv. Iľa ole efta mare, paľikerďa le Devleske, phagerelas a podelas o maro le učeňikenge, hoj on te poden le manušenge. A kerde avke.

⁷Sas len the varesave cikne ribi, the vaš ola paľikerďa a phenďa, hoj len te poden.

⁸Avke chanas a čaľile. Olestar, so ačhiľa, kidle upre efta košara.

⁹Ola, save chanas, sas vaj štar ezera (4 000) manuša. Paľis len bičhaďa het,

¹⁰a takoj geľa le učeňikenca andre loďka a avľa andre phuv Dalmanuta.

¹¹Avle paš leste o Farizeja a chudle pes leha te kerel. Mangenas lestar znameňje andral o ňebos a oleha les probaľinenas (skušinenas).

¹²Phares peske vzdichňinďa andro duchos a phenďa: “Soske kala manuša mangen znameňje? Čačipen phenav tumenge, hoj kale manušenge na ela dino ňisavo znameňje.”

¹³Mukľa len ode, geľa pale andre loďka, a pregeľa pre oki sera le moroske.

¹⁴Andre loďka len sas ča jekh maro, bo bisterde peha te lel.

¹⁵O Ježiš lenge dovakerelas: “Merkinen tumenge pre le Farizejengere the le Herodesiskere drožďi!”

¹⁶Paľis vakerenas maškar peste: “Vašoda vakerel, bo nane amen maro.”

¹⁷O Ježiš džanelas, so vakerenas a phenďa lenge: “Soske pal oda vakeren, hoj nane tumen maro? So mek furt na achaľon? Hine tumare jile zaphandle?

¹⁸Hin tumen jakha – a na dikhen? Hin tumen kana – a na šunen? Soske bisterďan:

¹⁹Sar ola pandž mare rozulavavas maškar o pandž ezera (5 000) manuša, keci pherde košara kidňan upre olestar, so ačhiľa?” Phende leske: “Dešuduj (12).”

²⁰“A sar ola efta mare rozulavavas maškar o štar ezera (4 000) manuša, keci pherde košara kidňan upre olestar, so ačhiľa?” Odphende: “Efta.”

²¹A phenďa lenge: “So mek furt na achaľon?”

²²Paľis avle andre Betsaida. Ande ke leste jekhe kores a mangenas les, hoj pes lestar te dotkňinel.

²³O Ježiš chudľa le kores vastestar a iľa les avri andral o gav. Ode leske le šlinenca makhľa o jakha, thoďa pre leste o vasta a phučľa lestar: “Dikhes vareso?”

²⁴O koro dikhľa upre a phenďa: “Dikhav le manušen, ale dičhon avri sar stromi, so phiren.”

²⁵O Ježiš pale thoďa pre leskere jakha o vasta a chudľa te dikhel. O koro avke sasťiľa avri, hoj dikhelas savoro žužes.

²⁶Bičhaďa les khere a phenďa leske: “Ma dža andre oda gav aňi pal oda ma phen ňikaske!”