San Marcos 8:1-26

¹Tiem zeꞌ, ornu byatublaazhaꞌ dela mbecy zigy nunu wangad coz nu gow dey, orzeꞌ Jesuuz bredz mi de yu nu rsyaꞌ lom. Orzeꞌ nam rab mi dey:

²―Ya̱ rashni lagya̱ de mbecy zigy, gun bi bzaꞌ chon dzi nu yuꞌ dey lo̱ ii, nunu blazh coz nu gow dey.

³Benu zuu neza̱ dey gyay yuꞌy gal ran ziꞌl yu, orzeꞌ suun ñi dey nez, gun yuꞌ dey zet bruuy ―nam.

⁴Orzeꞌ na de yu nu rsyaꞌ lom rab yum: ―¿Lac gyicyaꞌ de ub na goow na dela mbecy zigy lugaar ub zi ii? ―na dey.

⁵Orzeꞌ nam rab mi dey: ―¿La be gyishtily ricy cup der? ―nam. Orzeꞌ na dey: ―Gagy ―nay.

⁶Gazeꞌ nu bicy mi mandaar lo de mbecy zigy nu checua dey. Orzeꞌ gush mi gagy gyishtily zeꞌ. Orzeꞌ briic mi gras ni Ñgyoozh. Gazeꞌ nu blew mi ñii. Briic mi ni de yu nu rsyaꞌ lom nu cuic dey ni de mbecy zigy. Gazeꞌ nu bleez dey ñi ni dela mbecy zigy.

⁷Ricy cupaꞌ dey la be bel miꞌ. Orzeꞌ briicaꞌm gras ni Ñgyoozh nunu pcaa gaꞌm de yu nu rsyaꞌ lom nu cuic dey ma gow de mbecy zigy.

⁸Orzeꞌ dela mbecy zigy bdow gyel la dey. Orzeꞌ blazh zeꞌ, pteꞌ dey gagy la chicyiw coz nguzh nu brusub.

⁹De yu nu bdow zeꞌ, tap miily dey nac yu. Orzeꞌ Jesuuz ptush las mi dey yay.

¹⁰Gazeꞌ nu lueg la guꞌ num de yu nu rsyaꞌ lom nañ tub barc. Bruum lugaar zeꞌ. Gazeꞌ nu bruꞌñam lo yu nu la Dalmanuta.

¹¹Orzeꞌ bruꞌña de mbecy fariseo brugyiꞌ rgugyiꞌ dey lom par nu gyicy dey preb mi. Bdiiñ dey lom nu gyicy mi tub nusuriidz baa par nu gabe nu Ñgyoozh nac num mi.

¹²Gazeꞌ nu gyi la byash lagy mi. Orzeꞌ nam rab mi dey: ―Ya̱ warica̱ nusuriidz. ¿Lagu rgyiiñaꞌ de mbecy nu yuꞌ na nusuriidz? Ya̱ rishli rne̱e̱ lo der nu wadaꞌ nusuriidz par de mbecy nu yuꞌ na ―nam.

¹³Orzeꞌ bruum lugaar zeꞌ. Guꞌ gaꞌm nañ barc zam tub laꞌ gaꞌ ruꞌ nisyudoo.

¹⁴Na de yu nu rsyaꞌ lom na mnit lagy dey cha nuy gyishtily. Nomaas tub zi gyishtily ricy cup dey nañ barc zeꞌ.

¹⁵Orzeꞌ Jesuuz mniim lo dey nu gyicy cuidad dey. Gazeꞌ nu nam rab mi dey: ―Bduꞌ cuen der nunu bicy cuidad der nu lebadur ni de mbecy fariseo nu lebadur ni Herodes ―nam.

¹⁶Orzeꞌ de yu nu rsyaꞌ lom bee dey riidz nu losaꞌy. Gazeꞌ nu na dey: ―¿Ti walab nu a̱ꞌ dun gyishtily, ndeꞌ nu ni rniim? ―na dey.

¹⁷Ornu gud lagy Jesuuz coz nu mnii dey, orzeꞌ nam rab mi dey: ―¿Lagu rnii der nu wancyiid nu der gyishtily, ndeꞌ nu ni mne̱e̱? ¿Walab gaal wagyet lag der cuen? ¿Walab gaal noow na shcab ni der?

¹⁸Zub urlo der, ¿walab gaal wacsac der? Nunu zub gyidag der ¿walab gaal wagyeñ der? Nunu ¿walab gaal wagyezaꞌ lagy der?

¹⁹Ornu blewa̱ gyishtily nu bdow gaay miily mbecy, ¿la be la chicyiw gyishtily nu brusub pteꞌ der? ―nam.

²⁰Orzeꞌ na dey: ―Trocyup ―nay. Orzeꞌ nam: ―Zeꞌ ornu blewa̱ gyishtily nu bdow tap miily mbecy, ¿la be chicyiw gyishtily nu brusub pteꞌ der? ―nam. Orzeꞌ na dey: ―Gagy ―nay.

²¹Gazeꞌ nu nam rab mi dey: ―¿A walab gaal gabee wagyet lag ruꞌ der cuen? ―nam.

²²Gazeꞌ nu bruꞌñam Betsaida. Zeꞌ bruꞌña nu dey tub mbecy lo caꞌ lom. Mnishbaa dey lom nu gal yaam yu.

²³Orzeꞌ bduꞌ yaam yaa mbecy lo caꞌ zeꞌ. Gua num yu par ruꞌ gyedz. Orzeꞌ pcoom nis yeñ mi urloy nunu gul yaam yu. Gazeꞌ nu bdugyiꞌm loy ben a rzac yu mas ñuu ga.

²⁴Gazeꞌ nu brugyiꞌ rgüiiy. Orzeꞌ nay rab yum: ―Ya̱ rzaca̱ mbecy gal na yag nay rded yu ―nay.

²⁵Bdaabaꞌ yaam urloy. Orzeꞌ mbi la bgüiiy. Orzeꞌ byac yu nunu byanap la rzac yu dela coz.

²⁶Gazeꞌ nu bzuu nez mi yu gyay yuꞌy. Orzeꞌ nam rab mi yu: ―Cueꞌ chuꞌr lat gyedz ii ―nam.