1MRK 14.1-2 Neis gerger barkiei keubu ya Yiskak Beredira Aro Gerger watabarki, Kebi Kirim Merkem a Aotarle Iesuim dasmerlare ko abi wairpeidarda a waipita.
2Wige no tabara batagerda, “Mi nole able lu akairare able lewer aro kerkerge ableglam le ya waturder yaba urker obarkare.
3MRK 14.3-9 Nade Iesude lewer erwer muige metage able kimiarira meta abra nei dikereder Saimona Lepera Le, ege koskir tabakiamuda au bodombodom debe laglag wakaiso teper au bodombodom taporge tigmeder. E tapor mop daratrumda a debe laglag wakaiso epaiterdi Iesui kirimge.
4Wader le ge urder yaba lid bageblare a tabara batagelare, “E nalugiam debe laglag wakaiso pe no ikiaii?
5Legize merbi bodom bakir wadaiswerda mokakalam netat urut bodomalam able wakaisolam. Mi umele able bodom bakir lukak le wanaiswerda!” Wige au kelarkelar etapereta.
6Ege Iesude yabi daratagerda, “Noiekar, wa able koskir dikairtare! Wa nalugiam abi okasosok ikereda? E karim debe lu ikaidari.
7Lukak le ya mena wabidoge waurder, wa umele yabi ya upidaratidaiare na kerker ya wa laglag urder. Ka umerkak yaka ika nawar.
8Able koskiride ikeri nalu gair lu e karim ikeri; e kari gemge debe laglag wakaiso epaiterdi e kara gem dirsiri ya waiakai e apkorep wadawer wetkobei.
9Kaka wabi agekar detagreda, nade ga legize able debe mir marau wairmawem kemerkemer gesepge, legize ya able mir wasolare pe able koskiret ikeri. Gair le ya abi umele waurder.
10MRK 14.10-11 Ege netat le 12 memegielam abra nei dikereder Iuda Isakariota bakiamuda Kebi Kirim Merkemleem ya waiakaida e Iusui yabi wanakwarda.
11Nade wi abi asorda yaba au serer barukdarda, wige detauta wi ya abi bodomalam waikwarda. Iuda ga daraimrer nalu korepkorep e Iesui wadipi.
12MRK 14.12-21 Kikem gergerge irdireder Yiskak Beredira Aro Gerger wi aresa arenio Paseka Lewer Arwem, a Iesui memeglegize eudige abi itmerda, “Ma laglag nali ki nabakiaware nade mara Paseka Lewer darsirare?”
13Iesude neis yabiaiam namarikdarda, e kikem yabi daratagri, “Wa bakiamulam au utebge. Kimiaret ya ni tarpor weper ya wabi opwadidipit. Wage abi irmiram.
14Nade e obakiamu metaem obau, wako balam. Wa able metara lukemle detagerwam, “Erwerle laglag dali ma kerbi kes natometare nade e a taba memeglekem ya Paseko Lewer wairware.”
15E wabi ya able au kes watiditomer penoko aremge ikeredi. Gair lu wawa laglag dali able lewerem ya i wataragi. Wage merbim gair lu ge tidirsirwam.”
16Able memeglegize abi dikairtiei wige bakiamudariei au utebge nade wi dasmelei gair lu mokakalam nagriweretlare ge e yabi tadaratagrer, wige Paseka Lewer tidirsiriei.
17Keubu ga lim baraigida, Iesu ge tabakiamuda 12 memeglekem able utebge bosi.
18Nade ga wi laulau lewer erolare Iesua akaida ge yabi daratagerda, “Kaka wabi agekar detagreda, netat wabialam pe kari kemem lewer eroli ya kari wanaup.”
19Ege memeglera okasosok barukdarda wige bakeri abi netat itmerlare, “Agekar, nole kakanali?”
20Iesude yabi daratagerda, “Netat wabialam 12 lelam e able le wadawer, netat le ya kiki keriba bered okakise kobarge naitelei.
21Lera Werem ya weumi able korepkorep ge bautarda Zogoziawalige. Epe able le dali ya e Lera Werem wadip ya au asiasi wadigi! E wadikeper, “Ka naluglam osmeda?””
22MRK 14.22-26 Nawer ge wi mena lewer erolare, Iesude bered eturuklu ege Adi ableluglam dispiri. Ege bered itri a ikaida tabara memegle nakwarda. Ege yabi daratagerda, “Wa able lu ikadarare, e kara gem peikeredi.”
23Keubu ga akaida pankin etaruklu ge waina egmeder Adi ga ableluglam eswao ikaida. E ga ikaida yabi nakwarda, a wige netatnetat ga tep diskilare.
24Iesude eudige yabi daratagerda, “Kara mam peikeredi ya wabim weiapaitered mitkar leem wabi le waditomertare Adira lag pedike.
25Kaka agekar mir detautli, Ka umerkak yaka waina koka arie mena yaka kerkar tonar waina tarie Adi baselaiage.”
26Wi eudige eswao wed Adim dikrida a bakiauda Oliwa Paserem.
27MRK 14.27-31 Iesude yabi gair le daratagerda, “Wa ya kemerkemer bakesmer wabi owaturge mokakaiam ge mir bautarda emeretge pe kiki detauteda, 'Adide ya mamoe aseseredle waipit ei mamoe ya adem obatrakrare.'
28Keubu yaka koka idid nakailu, kai kikem nabakiamu Galilaiaem wai keubu ya taba.”
29Peterude abi detager, “Able wader le umele taba owaturge obakesmer nole kakanali!”
30Iesude eudige Peterui detager, “Kaka agekar mir detautli; ma ya neis a netat gaber detaut ma nole kari umerkak nali, able kige keubu ya kimiar paul neis gaber ererwekri.”
31Peteru eudige esereser akaida, “Kai umerkak yaka dataute ka nole mari umerkak nali! Ese wi kari wanarsare a maridoge wanapitare kai mena yaka nawar ka umerkak able mir detaute.” Gair memeglegize able orwairorwair detautlare.
32MRK 14.32-42 Wi bakiaudare able utebge abra nei dike Getsemani ge nade Iesude tabara memegle daratagridare, “Wa mena ge dawidarwem nawar ka naba erkeptarasameirer.”
33Ege yabi neisidare Peteru, Zemis a Zone nerut utebge ge nade e au muimui okasosoke dawer.
34Ege yabi daratagridare, “Kara lamar okasosok ke dali maike eud paikaige. Wa ge dawedarwem a wage idid dawedarwem.”
35Ege yabiaiam kebikebi kikemem bakiamuda a akaida sepge etkobeilu erkepasameida a Adim bagwi e umerkak asiasi wadigi nako Adide abim able lu waikaida.
36E erkepasameirer, “Baba, kara Bab! Ma umele gair lu iker; Ma karialam able asiasi adem ikau. Ma nole kara lag ikerwa mage mabara lag ikerwa.”
37E eudige ko akomeda bakiamuda tabara neis a netat memegle nardardare wige ut nardeder. E akaida Peterui ikailu, “Saimona, ma naluglam ut nauperedi? Mai umerkak idid wanali kebikebi wadikaili?”
38A ga akaida yabi daratagridare, “Wa idid dawiderwem a erkepasamiderwem ya waiakai wabi umerkak mirem wadikerdare. Waba lamar laglag darale epe waba gem pe auka erarerar nagri.”
39Ege ko akomeda yabiaiam bakiamuda erkepasameida able mirmir ge kikem tasameirer.
40E eudige ko akomeda bakiamuda tabara neis a netat memegle nardardare wige ut nadeder. Yaba poni yaba au beberbeber utide darasapelare. Wi nole umerkak wi abi nalu mir waditagerda.
41E nade ge ko takomeda neis a netat kerkerge, ege yabi daratagridare, “Wa naluglam mena ut derdedi? Wage no ge ut eididare waba gem dirsirdare; a nole! Able kerker pe itutida! Wa kei egridare! Abie le pema ikase ya Lera Werem wairpei wide wanakwarare.
42Wa ekwidare mi nabakiaudare. Wa kei egidare, able le pedali ge kariaiam badmirikda akaida kara kurable baida.
43MRK 14.43-52 Nawer ge Iesude mena mir detauter, Iuda, netatle Iesui memeglelam, tabakiamuda lekem wi teibur ausos tulik a gabagaba taislare. Wi yabi Kebi Kirim Merkemgize, Aotale a Aulegize taramarikdarda.
44Ege Iudade able le daratagerda, “Ka wabim yaka umerem atutilu able le yaka uma dakailu, e able le pedali wawa abim dasmereda. Abi erpeiarwem a abi igardawem le ge wauridwa abi waseserdawem.
45Nade Iuda tabakiamuda able utebge ege keko bakiamuda Iesui erdari a abi ikaiada, “Erwerle!”, a abi uma dikaida.
46Wige Iesui erpeidarda mena abi erpeilare.
47Ege netat able lelam ge ikweireder tabara teibur ausos tulik iseda Kirim Merkemira Memegle laip dismida.
48Ege Iesude yabi daratagerda, “Ka nole erwamle peka nali; wa pe karim tabakiauda gabagaba kem a teibur ausos tulik kem.
49Gair gergerge ka le wanerwerlare muige au zogometa utebge, wa nole kari gewa narpeidarda. Epe sikak dikeredi; able Zogoziawali ya obatomer nalu lu agekar ikeredi.”
50Ege gair abi memegiegize abi dikaireta wige korider bamre adem bakiauda.
51Netat kirgir kebilelut ge Iesui irmirer e dawer no netat wali abra damireder. Wige laglag abi wairpeidarda e tabara wali dikairti ege korider emrida nesurkak.
53MRK 14.53-65 Wige Iesui igareda Kirim Merkemle metaem ge nade Kebi Kirim Merkemle, Aule a Aotale tabakiauda tababu ge etami.
54Peterude yabi lagdaratmida baka ge espirer murisge a bakiamuda able utebge badari maike Kirim Merkemle metage, ge e nade no ge able utebge emrilu maike urge aseseredlekem ya waiakai e geb obaugli.
55Ege Kebi Kirim Mekemle a kemerkemer Iudaia gelarle laglag urder nalu barkak lu wairdarda wi Iesuim ya tag waimarkeda ya waiakai wi abi waipita; wige nole nerut lu erdarda.
56Mitkar legize Iudaia gelarle bes dararidlare Iesui detaudare, wige able le ge netatnetat urder yabidoge nole able mir bakedrer.
57Wader le ga bakwer able besmir detautlare Iesui ikelare; “Ki abi wasorlare e ke waditauter, 'Ka yaka able au zogometa arape ge legize demerda, a neis a netat gergerge ka yaka koka nerut au zogometa damre ya umerkak legize wadimrare.'”
59Ege wi ko able le urder yabidoge nole netatnetat bakedrer.
60Able Kirim Merkemle yabi gair le opem ekweida a Iesui itmeri, “Mai umele mamor detaut nalu pe bamisreda? Ma ge detaut.”
61Ege Iesu mena mirkak ekweireder, e nole yabim nerut mir detauti. Ege Kirim Merkem Lelut nerut orwairorwair ga abi itmeri, “Nako mama Keriso nali?, able Werkabwerkab Adira Werem?”
62Iesu eudige akaida, “Kaka nali, wa ya dasmerare Lera Werem watigireder Au Sasrimsasrim Adi tuter tag pekge a ya abi dasmerare e ya watabakiamu kotor bazkem.”
63Nade wi able mir asorda, ege Kirim Merkem Lelut urkerge tabara wali etwati a akaidari yabi daratagerda, “Mi nole laglag uridli wader legize merbi waditagrare nalu e ikeli; mi abra bes dasorda e Adi opmir detagri! Mi nalu abim akairare?” Wige gair legize detauta abi no apitare.
65Wader no bakeri Iesui mosu ituda, a wi abra waliu op damisilare a ereslare. Wi abi detagelare, “Ese mama peropeta nali, ma kerbi detagrare nete kerbialam pedali mari naresli. Aseseredle ko urder abra op detapilare a ereslare.
66MRK 14.66-72 Peteru mena ge sepgr tadawer able utebge maike metage nade ge memegle neur tabakiamuda abim.
67E Peterui erdari ege geb bauger; e abi natkak lidem dasmeri a eudige abi ikaidari, “Mako gema tarawer Iesui doge pe Nazaretlam dali.”
68Ege Peterude desardi able mir. E eudige akaida, “Ka nole umerkak nali, ka nole able mir irmili pe mama detauti,” a ege eudige digmi bakamuda nerut pekge able utebge maike metage. Ege keko kimiar paol ererekri.
69Able memegle neuret ge abi terdari a ko akaida able le daratagerda ge ekweder ur dairumaretlare, “E netat pe able lelam dali!”
70Peterude ko able mir desardi. Ege kebikebi ga ko ikereder, able le ge ekweder eudige bakeri abi ikaidarda, “Agekar, mama netat pema yabialam nali, ableglam mako nali Galilaia le.”
71Ege yabi kelarkelar daratagerda, “Kaka agekar detautii; ese ka bes darder, Adide ya kari bodomalam wanakai asiasi dagie. Ka nole able le umerkak nali pe wawa detauteda.”
72Ege keko kimiar paol ko ererekri. Peterude eudige dikepwari Iesude ge abi detagri, “Ma ya neis a netat gaber detaut ma nole kari umerkak nali ka nete nali keubu ya kimiar paol neis gaber ererwekri.” A e akaida au okasosoksosok baida, eudige i ditimeda.
