Marku 8:1-26

¹Mahuku ale, ukhala wiira wahotthukumana tho mphwinko muulupale na atthu khayarina yoolya, Yesu aheehana owiitthuca awe ni ahaahimerya:

²Ukiiriha ihaaya mphwinko ula. Nna va ahovira mahuku mararu anari ni mi ni kharina yoolya.

³Kaalaseraka ciicale woohilyetthu, wiira arwe mmwanyaya anaahala ukhwa mahile ni iphiro, kontha akina akhumile uttayi.

⁴Owiitthuca awe yahomwaakhula: Nohala woorya cani ntthu waaliha nkatthe, watakhwani va?

⁵Nanso ahaakoha: Nrina mikatthe mikavi? Yahaakhula: Mithanu na miili.

⁶Aholamula wiira atthu yunkome vathi. Ni, akusaka mikatthe mithanu na miili, ahoreeriha, ahomyaniha ni ahaavaha owiitthuca awe, wiira yakawele na ale yahaakawela atthu.

⁷Yahaana tho asihopa vakani. Ahoreeriha ni aholamula wiira yaakawele.

⁸Yaholya mpaka urupala, ni ikalakathela cahanle nyo owiitthuca awe yahottottela itthuttu thanu na piili.

⁹Atthu ale yaari elufu cese (4000). Wahoolo ahaalasera.

¹⁰Ni awelaka vano nkalawani ni owiitthuca awe, ahorwaa mittetthe co Talmanuta.

¹¹Yahowa mafarisi yapacenre unyakulihana ni Yesu ni woontteha yahoonlepela ikanyero yo wirimu.

¹²Yesu ahihimeryaka ni nrima wothene, aheera: Nlattuni weesiyani nihimo nna ninalepelela ikanyero? Khweeli kinawuhimeryani wiira nihimo nna khaninhala uvahiya ikanyero hata vakani.

¹³Ni aahiyaka, ahokela nkalawani, mpaka ulapuwela ikhopela ikina.

¹⁴Owiitthuca yaholiyala uwya mikatthe, ni nkalawani khayaarina tho waari nkatthe mmoca paahi.

¹⁵Yesu aheerela: Moone, nkhale miitho mmwehaka ratta miropo co mafarisi ni miropo ca Heroti.

¹⁶Na ale yahopacera uvanyihana, yoopuwelaka wiira waaciye uhikhalana nkatthe.

¹⁷Yesu nanso, weewilyawe moolumo ale, ahaahimerya: Nlattu isiyani moopelaka mwaha o itthu yohikhalana nkatthe? Nanlelo khannahelelela ni khanneeweha? Nri ni nrima woturumala.

¹⁸Nhaana miitho ni khannoona? Nhana manyaru nanso kanneewa ni khannopuwela.

¹⁹Itthuttu kavi coocara ni coohala caattottenlenyu, wamyanihilyaka mikatthe mithanu kaakawelaka atthu elufu thanu? Yahaakhula: Khumi na piili.

²⁰Ni wamyanihilyaka mikatthe saapa pwaavahaka atthu elufu cese, mwacarihile itthuttu kavi cokalakathela co mikatthe? Yahaakhula: Saapa.

²¹Ni anaweerela: Nanlelo khanneewa?

²²Yesu ni owiitthuca awe yahophiya o Petsayita ni yahomwiihera ntthu oohoona, anlepelaka wiira ankwanye.

²³Ahommarela ntata ntthu oohoona ni ahonrweha nceresere itthoko, ahonhela isenye mmithoni mwawe, ahonthatela matata nuunkoha: Unawoonaka itthu?

²⁴Ule ahoteesa miitho ni aheerela: Kinawoona atthu, yeettaka ankhala toko miri.

²⁵Ahonthatela tho matata mmiithoni, ni ule ahopacera woona uparapara, ni ahovona, oonaka rattaratta uttayi ni uparapara citthu cothene.

²⁶Yesu vano ahonlamulela urwaa uwaani, ni ahomwiirela: Uhikele mena umawaani.