Maga 8:1-26

¹Segeyo amo gala udia dolö yafie bu elö gegedoi. Amoli molö molö made gabugi, Yesuea ïe bëgëla aulo amolima mofiamolahilä ilima sähalea,

²Udia dolö gegedoi amoli nebalä segeyo ohodoa nelo amea hä molö molö made gabugi asigiisebemelë.

³Sïdëa baagoi amola wäla ili mosöa mosöla säseda, idiafa si dädäbëlela digamolö gabu. Odoada amase, sege wagadi madela mofiai gabula säi.

⁴Ïe bëgëla aulo amolia ema nabahalea, Nilï sege nafadeia neebewe, udia dolö wi nefolalebe weli muäia, molö abidi nimolödula nabi.

⁵Ilia Amala nabasebegi, Yesuea ilima nabahalea, Beledi aboläia galebela nabi. Ilia ema säla obëgësalea, Gifalädalïala säi.

⁶Amala säsebegi, ea udia dolö nefolalo amoli nagadaia fifigimalola säi. Amala sälahilä ea beledi gifalädalïa amo gaula nea, Godema nesegelahilä, dagabodasila ïe bëgëla aulo amolima sogomäia ï. Amala ïasebegi, ilia udia dolö sefolalo amoligali neala sogoi.

⁷Ilia seme nelësa naabo safo ägüi amoge, ea nesegelahilä udia dolögali sogomola säi.

⁸Udia dolö sulubadela sefolalo amoli dofea nalahilä, fea digai amo ilia adu gifalädalïa salala nobai.

⁹Udia dolö sefolalo amolida dausini biyidia gadoi nelo. Yesuea udia dolö afiaha maademalola säi.

¹⁰Amalahilä ïe bëgëla aulo amolibalä fodolofalï ödä dudaia fila Dalamanuda segeamadi asi.

¹¹Felesi dolö odoa Yesu neebea maalahilä gëgëla sähalea, Dolöea hamomolöi made gadoi afädë selesaia mosöala misi dia hamomola säi. Ilia e amala fedogola beasebegi,

¹²Yesuïe iso asigigi yöla hame hëia fedalahilä sähalea, Udia dolö walio nefolalebe welia dolöea hamomolöi made gadoi hamosebe amo bimolöïe hogosa nebego, mi edoïe. Udia dolö walio neebewelima dolöea hamomolöi made gadoi dofä made hamomolömelëla säi.

¹³Amala sälahilä ili amilahilä dudaia bu fila, oeabo edefade amo dëgëla alömodi asi.

¹⁴Ïe bëgëla aulo amolia beledi elabolahilä, afädëmu ägüla ödä dudaia fila asi.

¹⁵Yesuea ilima gelola sähalea, Felesi dolöïege Heledoïege beledi edelo yidi dibe amo helësëlahilä, hedabola idihë namialola säi.

¹⁶Amala säi amo nabalahilä hilidomu sähalea, Nilïa beledi made amoïe säsebegola säha dilo.

¹⁷Ilia säi amo ea helësëlahilä ilima sähalea, Dilia beledi made amoïe säsebegola säha dibegoda edoïe. Dilia fädäla helësëla made nelo amomu nea, dawa made neale. Dilile iso asigi galadigi neale.

¹⁸Dilile si galea gaso, made beahale. Gëhege galea gaso, dilia made nabahale. Dilia elaboile.

¹⁹Beledi bia ameamu dolö dausini biaea muäia, dagabodasi amo nalahilä, fea digai amo dilia neala, adu aboläia nobala salila nabi. Amala sälebe ilia ema säla obëgësalea, Giwilasila säi.

²⁰Ilia amala sälebe ea ilima sähalea, Udia dolö dausini biyidiaea muäia beledi gifalädalïa dagabodasi amo nalahilä, fea digai amo adu aboläia nobala salila nabi. Ilia ema säla obëgësalea, Gifalädalïala säi.

²¹Amala säsebegi, ea ilima sähalea, Dilia fädäla made helësësa nelo amomu neagolela säi.

²²Yesu ïe bëgëla aulo amolali afiala sege Bedesaida beselagalai. Beselagalasebegi, dolö odoa amolia dolö afädë si golai nelo amo e neebea sigi maalahilä ema sähalea, Dolö gowe dia naaboea diigimäiamelëla säi.

²³Amala säsebegi, Yesuea dolö si golai amo naaboea gaula mosö dibea amilahilä segea sigi asi. Ea dolö si golai amoïe sihidoa gofedela galala ïe naaboea diigilahilä dolö amoma nabahalea, Nelebo beasebelela nabi.

²⁴Amala nabasebegi, dolö amea busa fädägägïa adogola bealahilä sähalea, Dolö nawese beaha gaso, i gadoi beasebemelëla säi.

²⁵Amala säsebegi, Yesuea dolö amoïe siigi bu elö diigisebegi, dolö amea si gadaea gala melëlebe, e neala hedabolasilahilä nelebo sulubadela fädäla beaha maadei.

²⁶Amala hamolahilä Yesuea dolö amoma sähalea, Mosö yafie dibeadi amogida mosabu. Dihï mosöa mosöla säi.