Maleko 8:1-26

¹Lahaidi yai ni baiwa hesa ya faꞌoigogoma, mate hige adi kalahe. Yo fede Yesu ana hewahewali ya yogaidima na iyen,

²Dodoga te, E fanuwatohatohaedi, na adi kalahe sa ofi, paꞌana lahai faihona ma afa haidagu.

³Yena E duidi sa lau edi luma ma guliyamdi haba matadi sa kwadekwade ai edaꞌeda paꞌana haisa adi eda sa lofa.

⁴Tau famuli watanina sa fatiꞌo tiyen, Ai malatupwam te haba ai somo kalahe te lobahi be te fakalahedi?

⁵Yesu ya fatiꞌoidi iyen, Fwalawa fisa lebemiu yai? Alinana sa bui tiyen, Faligigi luwaga moho.

⁶Dodoga ya falibadi be sa taꞌai tanohi yai. Habahim fwalawa faligigi luwaga ya abidi na Yaubada ya lautoꞌiyen. Ya ifidi na tau famuli watanina ya feledi be sa soiyedi baiwa lisidi yai.

⁷Hama fisa Yesu ya abidi na Yaubada ya lautoꞌiyen be tau famuli watanina ya feledi sa soiyedi hinaga.

⁸Mahudoꞌidi sa kalahe be bogadi sa yahayaha. Ouꞌoulidi doha 4,000. Adi antole sa tanogogondi be noho faligigi luwaga sa famohafudi. Habahim Yesu ya duidi be sa lau.

¹⁰Na maꞌana hewahewali waga yai sa lau Dalamanuta nuꞌuna.

¹¹Falesiya edi fanuha bena Yesu sa fasai buluhi yo fede sa laoma be sa fatiꞌoi bena galewa fafaꞌilalana ya faꞌitadi.

¹²Yo fede Yesu ya nahasi na iyebom, Sidohana be hiti te ami fanuha bena fafaꞌilala E ginauli be ami ita? E faliba dudulaimiu mate ibege laꞌi ya ginauli.

¹³Yo fede ya lau afuledi na ya awa waga yai be sa lau gabogabo tefana.

¹⁴Tau famuli watanina nuwadi sa fui be hige fwalawa adi ti abi faꞌouli. Esega dumaduma mate waga yai.

¹⁵Yesu ya falibadi iyen, Au ita komakoman! Falesiya yo Heloda adi yisti ibe au abi.

¹⁶Liba wa ibodi sa fafadosi tiyen, Nuwana fwalawa hige laꞌi ta abi, logena ya liba doha.

¹⁷Edi nuwanuwatuhu, mate Yesu haꞌa ya sibai yo fede ya fatiꞌoidi iyen, Paꞌana somo ami liba auwen, “Hige ama fwalawa?” Hige somo au nuwatuhu lobahi, Nuwanuwamiu sa poꞌi?!

¹⁸Matamiu yo beyamiu na hige hola somo au ita yo au atahi lobahi. Nuwamiu sa fui

¹⁹Fuyana fwalawa faligigi E ifidi dodoga 5,000 adi, anꞌan otafahidi ami tanogogo mate noho fisa ami famohafudi? Alinana sa bui tiyen, Noho safuhudohudoꞌi luwaga.

²⁰Na Yesu ya fatiꞌo boda iyen, Fuyana fwalawa faligigi luwaga E ifidi dodoga 4,000 adi, mate antoledi ami tano gogoidi be noho fisa ami famohafudi? Alinana sa bui tiyen, Noho faligigi luwaga.

²¹Yo fede Yesu ya fatiꞌoidi iyen, Na sidohana be hige au nuwatuhu lobahi?

²²Betesaida nuꞌuna yai sa laoma yo fede dodoga haisa amainiya taumoho mata toutouna sa leyama Yesu lisina be sa anꞌetai bena ya abiꞌina.

²³Yesu taumoho wa ya abi nimai be ya foya hudoꞌiyen tefa hesa yai. Matana ya kanisoidi, na muli yai ya abilau tauna yai na iyen, Somo laꞌi wa ita, e higeꞌe?

²⁴Taumoho wa ya itaꞌita hasa na iyen, Ii–, dodoga E itadi doha oyagi sa laulau tiga.

²⁵Yesu nimana ya tole fuyoi taumoho matana yai. Habahim matana sa nega be ginauli ya ita lobahidi.

²⁶Ya faliba iyen, Tabu u fuyo duhu laꞌi yai. Habahim ya dui.