San Marcos 8:1-26

¹Ñepei arɨ pɨpe setá ava oyemboya iri Jesús rese yuvɨreco. Ndipoi rumo mbahe icaru ãgua. Sese oñehe güemimbohe eta upe aipo ehi:

²—Iparaɨsu catu co ava yuvɨreco cheu. Esepia, mbosapɨ arɨ yuvɨrecoi yande pɨri, iyavei ndipoi eté mbahe semihura.

³Amondopase sẽtave sɨeporẽhɨ reseve, vɨrovɨapi-api tiẽtera tɨeporẽhɨ perɨ rupi yuvɨreco viña. Esepia, setami ava yugüeru amombrɨ sui —ehi.

⁴Semibohe aipo ehi yuvɨreco chupe: —¿Mara yahera vo ava tohu mbahe mondo cohave ava porẽhɨsave? —ehi.

⁵Ahe oporandu: —¿Mbovɨ vo pan pereco? —ehi. —Orovɨreco siete pan —ehi semimbohe yuvɨreco chupe.

⁶Evocoiyase, “Peguapɨ ɨvɨ harɨve” ehi ava rehɨi upe. Ahese oipɨsɨ siete pan, “Avɨye ndeu” ehi Tũpa upe. Ichui omboyaho-yaho pan imondo güemimbohe upe, semimbohe evocoiyase omondo ava rehɨi upe yuvɨreco.

⁷Iyavei vɨreco movɨro pirami yuvɨreco, sese avei, “Avɨye ndeu” ehi iri Tũpa upe. Ichui güemimbohe upe, “Pemboyaho-yaho ava upe” ehi.

⁸Opacatu ité ava ocaru vahe ihɨ̃taro yuvɨreco. Ipare rumo semimbohe omboapɨpo iri rane sumbɨrer siete ɨruova yuvɨreco.

⁹Ava rehɨi ocaru vahe retacuer cuatro mil tuprɨ. Ipare Jesús, “Avɨye, peso tuprɨ” ehi ava upe.

¹⁰Ipare voi eté yuvɨraso güemimbohe eta reseve carite pɨpe Dalmanuta ɨvɨ rese.

¹¹Ipare fariseo eta oyepota Jesús ñehe poepɨ-epɨ ãgua yuvɨreco. Jesús recoãha ãgua, oporandu ɨva pendar poromondɨisa rese ‘¿Tũpa sui eté pĩha ou?’ oya yuvɨreco chupe.

¹²Sese Jesús ipɨ̃tuhe pucu, aipo ehi: —¡Mahera vo co ava oipota ɨva pendar poromondɨisa che recocuer cua ãgua yuvɨreco! Namboyecuai chietera rumo que ñepei evocoi nungar mbahe pẽu —ehi.

¹³Ipare oseyapaño ava. Ichui yuvɨroha iri carite pɨpe, osasapa ɨpa yuvɨraso sovai.

¹⁴Jesús remimbohe sesarai pan sui yuvɨreco, ñepeimi tẽi pan vɨraso güemihura yuvɨreco.

¹⁵Evocoiyase Jesús aipo ehi: —Peicua catu fariseo iyavei Herodes pan mboapeposa sui —ehi güemimbohe upe.

¹⁶Aipo ehise, semimbohe: “Pan ndayaruise revo aipo ehi yandeu” ehi-ehi tẽi oyeupe yuvɨreco.

¹⁷Ahe rumo oicua güemimbohe pɨhañemoñetasa, aipo ehi: —¿Mahera, “Pan ndayarui” peye? ¿Ndapeicua vɨtei vo che rembiapo? ¿Yavai vɨte tie seroya ãgua pẽu?

¹⁸Oime tẽi pe resa, ndapesepiai rumo; oime tẽi pe nambi, ndapesendui rumo mbahe. ¿Ndapeyemomahenduha iri vo

¹⁹acoi amboyaho-yahose cinco pan sui ava cinco mil vahe tohu? ¿Mbovɨ ɨruova vo acoi sumbɨrer pemonuha iri? —ehi. —Doce ɨruova —ehi yuvɨreco chupe.

²⁰—Iyavei acoi amboyaho-yahose siete pan sui ava cuatro mil vahe tohu, ¿mbovɨ ɨruova vo acoi pemonuha sumbɨrer no? —ehi. —Siete ɨruova —ehi yuvɨreco chupe.

²¹Ipare aipo ehi: —¿Ndapesenducua vɨtei vo? —ehi güemimbohe upe.

²²Oyepotase Jesús tecua Betsaida ve, ahe ramoseve voi ogüeru ndasesapɨsoi vahe yuvɨreco chupe ‘epocomi tẽi sese’ oya yuvɨreco.

²³Evocoiyase oipopɨsɨ ndasesapɨsoi vahe seraso co cotɨmi tecua sui. Aheve omondo güendɨ sesa rese, omondo avei opo iharɨve. Ipare oporandu chupe: “¿Eresepia vo mbahe?” ehi.

²⁴Ndasesapɨsoi vahe omahese, aipo ehi: —Asepia ava inungar ɨvɨra oguata vahe yuvɨreco —ehi.

²⁵Evocoiyase omondo iri opo sesa rese. Ipare co mbɨa omahe tuprɨ ité cute, ocuera ité, opacatu mbahe osepia tuprɨ.

²⁶Ichui Jesús omondo sẽtave aipo ehi chupe: —Ereyevɨ iri eme tecuave —ehi.