Mak 8:1-26

¹Idu petsih yi, eri pe lau pohpou pohpou hesetahrung Yesus. Su ana’ su song pwi, ile pe Yesus iyuwen su disaipel Tadan pe ipe ihpa,

²“Yu ukarndrundrumwi sa lau kutile. Su hodo ndroda yu rang kah tul, pe ana’ su song pwi.

³Uh Yu kupwe kile ta su ha‑au, eri su we mada’ su kinun pe helkis odo sal, odosa su hamat song pe Yu undrupo song ile ta su pwi tih. Su se ti ho‑us alau pe hasa ketih.”

⁴Su disaipel Tadan hapa ile Tadan ihpa, “Lok tidu tito eriy keti ndramat hesento eriy pwi, pe tidu we titpondriti song odo kehe pe titawei kile ta sa lau hoyo‑on?”

⁵Yesus ihndremte su ihpa, “Oduu bret heski idu ndrongo oduu?” Su hahpah, “Ndrotulihir kopwi.”

⁶Yesus ipe ile ta sa lau ndre sulo‑on hemin poi. Iy ikuni bret ndre ndrotulihir kuti ise lumwen, pe Iy ide ureh ile ta Lapan. Inum pe Iy ipatan bret pe iduwe hala lumwe’ su disaipel pe su disaipel hetlenge ile ta sa lau.

⁷Netnedun ni se mone hodo yi, ile pe Yesus ide urehen Lapan ile eriy yi. Pe Iy ipe ile ta su disaipel hatlangan yi.

⁸Lau ndre pohangoh (4000) ti hoyo‑on pe ilruson ndre sa. Su disaipel hetparngan tikin song irswe ti pe hedehen ndrop ndre ndrotulehet ile eriy. Yesus ipe ile ta sa lau ha‑au yi,

¹⁰inum pe Iy ndroda su disaipel Tadan sowin kopwi hondroh ile ndrol pe hala Distrik Dalmanuta.

¹¹Su Paraseo hapa hehkelmene Yesus ile pe su hala pe helehkike‑ei nolou ndrodan Iy. Su hapa ile Tadan ihpa, “Yesus, opo handrai mirakulo, kile pe odu edehtuno odu ihpa ndre Ou ti ompo maryan Lapan. Pe kile pe odu edeltuwei kihpa ndre puko‑on ta Lapan ti imin ndrongon Ou.”

¹²Yesus ihkalmanan mundren ile pede‑en pe Iy ihti ngohon ile puko‑on. Iy ipe ihpa, “Ihpa kehe pe su lau odo mahkele ti waso‑o’ su hendre‑et handrai mirakulo tih? Odoke Yu kupwe kile ta oduu. Pwi, we etndrendre‑et pwi.”

¹³Iy iyeu ta su, pe indreh ile yi ndre ndrol ndroda su disaipel Tadan pe ha‑au ile ngerin ndras hodoh.

¹⁴Su disaipel kolo’ su isumwen pe hendretakun song sulo‑on pwi. Bret sehir kopwi su hokunii ti ke imin lon ndrol ndroda su.

¹⁵Yesus ipakolou su ihpa, “Edempahar odo yis ta su Paraseo, pe yis ta Herot.”

¹⁶Su disaipel, homou iparuhur ile ta homou pe hapa ihpah, “Iy kihne kimpa kuti odosa, tidu song pwi ti ndreh?”

¹⁷Yesus tunon homosa su hampa ti, ile pe ihndremte su, “Oduu edenesohou ile ‘bret pwi’ ti ile sa? Oduu ti mapwi edentut, eri? Oduu ti kolo’ oduu murun, eri?

¹⁸Mada’ oduu ti henendre‑et ndre pwi? Ndralnga’ oduu ti hertahrung ndre pwi? Oduu edentahorungon ndre pwi?

¹⁹Idu kalmene‑en Yu uptan bret ndre limihir pe su lau ndre polimngeh (5000) hoyo‑on, pe tikin herswe ti oduu etehen ile ndrop ndre heksi?” Su hahpa, “Sungoh-pe-ruhet.”

²⁰Pe Yesus ihndremte yi ihpa, “Pe idu Yu uptan bret ndrotulihir ile ta sa lau ndre pohangoh (4000), oduu etehen tikin ndre herswe ti ile ndrop hesiki?” Su hahpa, “Ndrotulehet.”

²¹Eri pe Yesus ipe ihpa, “Oduu tuno’ oduu oh, pe ihpa kehe pe ma edentawene hudut? Yu usempa song ti pwi.”

²²Yesus pe su disaipel hehir hala Betsaida. Pe sa lau se hokuni orngon homou ile hu Yesus. Orngon ti madan pwi, ile pe su lau ti hosohou karundrum ile ta Yesus, hapa Yesus kiduwe lumwen kile pule‑en.

²³Iy ikuni orngon kuti ile ngerin lok, pe Iy imburnguh ile madan orngon kutih. Inum pe Iy lumwen ile madan orngon kuti pe ihndremte, “Ou eneltuwe hangka‑an ndre pwi?”

²⁴Orngon ti isori madan pe ipe ihpa, “Yu uneltuwe sa lau, odoke su hahpa ndre kei henelila hasa pe hala.”

²⁵Ile pe Yesus iduwe lumwen ile madan orngon kuti petsih yi. Pe orngon ti ihlilis puko‑on pe madan inim ndresale pe indre‑et sane ile huyen.

²⁶Inum pe Yesus ipe ile tadan ihpa, “Owou ndresale ala emwem. Nombrun ala yi ndre Betsaida.”