San Marcos 8:1-26

¹Mamaz payura akkwan awane wanmakkara. Sun awa kumira mɨjchi akwa, Jesúsne paiña kammuruza akwanat kit kaiznara:

²—Nane sun awaruza kiwainashimtus. Kutña payukima nakasa puranash. Uspane chi kum mɨjchimai.

³Kumira mɨjchine, uspa yaltakima ɨninnarane, miwara najarɨnazi. Maza mazain attishtas aara, kiznara.

⁴Paiña kammuruzne ussa mɨmaat kit sɨnkaara: —Apane, awa tuchira, ¿miza kumirama sun awara kwinnanapai? kizara.

⁵Usne usparuza mɨmanara: —¿Yawa panma mɨjmakpas? kiznara. Uspane kaizara: —Siete pan mɨjmakpas, kizara.

⁶Usne wanta kaiznara: —Piltain uztain, kiznara. Siete pan saptawane, Diosta kaizta: —Aishtaish, kizta. Usne pan kɨz kit kammuruza mɨlanara, awara nailnanapa. Uspane panne wanta kwinnara.

⁷Uspane pitchin pishkarukas mɨjmara. Diosta aishtaish pishkaru akwa kiztawane, kammuruza kaiznara: —Sunkas wan awara kwinnarain, kiznara.

⁸Uspane kuat kit tukkara. Kuarawane, pitti pitti tizara. Paiña kammuruzne pitti pitti siete tɨmta winñara.

⁹Ampara mil ampu kuaara. Kuarawane, Jesúsne usparuza uspa yalta ɨninnara.

¹⁰Suasne Jesúsne paiña kammuruzkasa kanuara waat kit Dalmanutara sura ɨara.

¹¹Fariseo awane aat kit ussa tɨnta kwinta kiara. Uspane us kwail kinpa ussa kaizara: —Nu Diostas atne, chiwazha iztasparɨt kal Diostas izninchain, kizara.

¹²Jesúsne ayukta tɨnta pshtat kit uspa akwa tayal kit kaiznara: —Une chiwazha Diostas iztasparɨt kal izshiamtu. Dios nawa chiyuras ɨnintakas, nane umɨza chinkas izninnamanash.

¹³Jesúsne sun awara tuij ɨnat kit mamasa kanuara wat kit pi kwakara ɨra.

¹⁴Kammuruzne pan mainñat kit karaarachi. Maza panmin kanuara mɨjara.

¹⁵Jesúsne usparuza manta kit kit kaiznara: —¡Mɨrain! ¡Kwiraruin! ¡Kwail awakana uzman! Fariseo awaruzkas Herodes kamtamtuzkas nil kamtaamtuchi. Paiña kamtam kiñakana i. Kiñane chappira sulnintu. Paiña kamtamne kiñakana awara maizanazi.

¹⁶Jesúspa kammuruzne usparuzpain sun kwinta kiat kit kaizara: —Pan mɨjchimakpas. Katmizna Jesúsne sunkana kwinta kira, kizara. Jesúsne Fariseo kamtampa paranara. Uspane wat mɨarachi.

¹⁷Jesúsne uspa minñamtu aizpa piankamta. Uspane ussa mɨasachi. Katmizna usparuza kaiznara: —¿Nɨjkulamanas? ¿Mɨamanas? ¿Izamanas? kiznara.

¹⁸Une kasu wajmai. ¿Izmuskiwas? Une kail wajmai. ¿Mɨmuskiwas? ¿Nɨjkulmuskiwas?

¹⁹Cinco pan kɨztawane, cinco mil ampura nail kit kwinnarau. ¿Yawa pan tɨzta tɨmta winñanash? kiznara. Uspane ussa kaizara: —Doce tɨmta winñanashɨ, kizara.

²⁰Ankas Jesúsne kaiznara: —Siete pan tɨztawane, ampara mil awara nail kit kwinnarau. ¿Yawa pan tɨzta tɨmta winñanash? kiznara. Uspane ussa kaizara: —Siete tɨmta winñanashɨ, kizara.

²¹Usne usparuza kaiznara: —¿Mama nawa nɨjkultuchimakkiwas? kiznara.

²²Kwiztane Jesúskas paiña kammuruzkas Betsaida pɨpulukin aara. Mɨnpazha awane awa izsachira Jesústa karat kit tɨnta paikuat: —¡Ussa paari, kasu izkulnapa! kizara.

²³Jesúsne an awa izsachira chihtɨra piz kit ussa pɨpulukis mɨlta. Sua ilpikasa paiña kasukin nɨra. Paiña chihtɨkasa ussa paarawane, ussa mɨmara: —¿Mane izshinakish? kizta.

²⁴Sun awane izak kit kaizta: —Nane awara iztus. An awane tɨkana chamtui iztus, kizta.

²⁵Suasne mamasa Jesúsne chihtɨkasa kasukin pal pizta. Suas sun awane tɨnta iz kit wat izkulta. Wanta kai izta.

²⁶Jesúsne ussa paiña yalta ɨnin kit kaizta: —¡Up yalta kailti! ¡Pɨpulukin napmun! ¡Mɨnainkas kainammun! kizta.