1MRK 6.1-6 Iesu able uteblam bakiamudari taba gedim. Abra memegle abi kemem bakiauda.
2Sabadge ege akaida mitkar le nerwerlare sunagoge. Nade wi abra mir dasorlare wige bazigmuarter a abim mir dimwarlare. Wige tabara netatnetat bautmerlare, “Netilam able lelut able mir taisi? Netilam abra pardar dikeredi? E nako able au dorge ikeli?”
3E no kamda dali; e no Mariara werem dali; e no Zemisira barada dali, a lose a Iuda a Saimona; a pako abra sisi pa duridli!” A wige nole abi lagkak urder.
4Iesude yabi daratagerda, “Muige wader gedge, legize peropeta wasreda. Epe legize nole abi asreda nade pe e taba gedge dali, taba buaige dali a taba metage dali.”
5E umerkak ge mitkar au dorge waikeri. Ege no kepkep le nadgirlare ge e tabara tag dikmerker yabidoge.
6E ezigmuada ableglam yaba nole owatur nagriweretlare. MRK 6.6-13 Ege bakiamuda ge able gair utebge a le nerwerlare.
7E tababim able 12 memegle darabgerda, ko yabi neisneis wanamarikdarda. E yabi sasrim nakwarda ko dimoni au kelarkelar wadaratagreda. E yabi au kelarkelar daratagerda, “Wa no koket aisawem nade wa dikasirwertawem. Wa nole lewer aisawem; wa nole epei aisawem; a wa nole bodom bakir aisawem wabi wakge.
9Wa tetergab amiawem; a nole neis amiwali namiawem.
10E yabi ko daratagerda, “Nade legize wabim mir watigrilare metaem, wage ge mena uridwa wa nole able uteb dikairetawem.
11Ese wa taba able utebem ya nole legize wabi wadireplare, a wi nole wabi wadasorlare, wage waba pi wabi teterlam adem etkaperdawem nade wa able uteb dikairtawem, yaba ya atamilam waike.”
12Wige bakiauda bausi a maraueremlare le wi watabatarda yabi witlam.
13Wige mitkar dimoni adem nauslare; a wi mitkar gimgimle wakaisoiu darasaulare wige bakerer sikak berer.
14MRK 6.14-29 Erod able Gesep-Ople able lu asri, ableglam legize Iesura mir debreredlare gair utebge. Kepkep legize ge detautiare, “Zone Baptaiso ko akaida idid baidari! Abra sasrim pe Iesuidoge ikeredi.”
15Wader legize ge detautlare, “E Elaiza dali”, a wader legize ge detautlare, “E peropeta dali mokakalam netat emeret peropeta dali.”
16Nade Erodide able mir asri, ege detauti, “E Zone Baptaiso dali. Ka abra geka kirim dismida epe ko eudlam ekiamda.”
17Erodide tababu aresle namarikdarda Zone watirpeidarda a abi wadidbarda a obatawereda kupkpui utebge, ableglam Erodide taba baradara Pilipira koskir Erodias igardi,
18a Zonede mena Erodi detagrer e seksek dikeredi e taba baradara koskir digardi.
19Erodiasira urker Zoneim barki e laglag abi waipiti, ege Erodide nole abi ipiti ableglam e geumge ikerer; e Zonei azimuarda ableglam e umele dawer Zone barkak le a zogo le dawer. Gair kerkerge Zonei miride Erodi waikeli okasosok ke wadali, Erod laglag wadali abi wasri Zonede mir waditautli.
21Erodiaside dasmeri abra kes bagida able Erodi ausmer lewerge. Erodide able lewer dirsiri taba gelar kirimieem, taba ares kirimleem a gair tarimleem Galilaialam.
22Erodiasira neur taba badari a kaberi. Erod a able le ge abidoge emreder laglag urder abra kab. Erodide eudige abi detagri, “Ma kari nalu lugem namos, kai mari naiswere nalu lu ma laglag.”
23Erodide able neur detagri, “Ka mari gair lu naiswere, mena obakedi netat pek kari basalaiage.”
24Able neur baka eosmeda tabara ama titmeri, “Ka nalu lugem tarautmerer?” Abi amade abi tiditagri, “Ma Zone Baptaiso kirimem teutmerwa.”
25Able neur dudumdudum sopkak ko akomeda Gesep Opleem abi tiditagri, “Ka laglag ma kari nakwar Zone Baptaisora kirim kobarge wadudawa.”
26Able Gesep Oplera au okasosok barki nade e able mir asri, e umerkak taba mir wadikarikda ableglam abi legize emetu asorda e detauti e able lu waikaida nalu lugem abi able neuret wadamsi.
27Ege keko au dedumge aseseredle namarikdarda abim watikadarda Zonira kirim. Aseseredle bakiauda Zonira kirim tidismidarda,
28wige eudi ikaidarda kobarge tadarda a akaidarda able neur ikwari, ege ikada tabara ama tikwari.
29Nade Zonei memeglegize able mir asorda, wige tabakiauda abra gem ikadarda paierge muige tirdidarda.
30MRK 6.30-44 Able kaimegiz ko tabakomerti Iesui opdipita. Wige abi detagerda gair lu ge wi ikerlare a nerwerlare.
31Iesu a abra memegle nole ko yaba kes daragriweretlare wi lewer wairoda ableglam au mitkar le tabakeslare barter a ko bauser. Ege akaida tabara memegle daratagerda, “Wa no tabakiaure karidoge mi keimi nabakiaware sasmirkak utebem ge mi ner tarabaziei.”
32Ege no wi bakiauda narge kei sasmirkak utebem.
33Ege mitkar legize yabi darasmerlare wi bakiauda wige keko umele berda wi netiba darale. Wige gairle able gedlam ge naridweretlare kikem bakiauda koriderge wi gabge bakiauda able utebem kikem terpeidarda keubu ya Iesu taba memeglekem watabakarki.
34Nade Iesu narlam adem eupamadari, ege au kub lera dasmeri; abra au nas yabim barki ableglam wi urder mokakalam mamoi nole mamoi aseseredlekak. Ege eudige akaida yabi ga gair lu nerwerlare.
35Au kikem, abra memegle abim tabakiauda a abi detagerda, “Au kikem pe baida, a epe nole lekak uteb irdiredi.
36Ma able le adem namarkare able utebem pe naridwerteda ya waiakai wi tabara lewer wairapare.”
37Iesude yabi daratagerda, “Wa wabu yabi lewer arwem neiswerare.” Wige abi itmerda, “Nako ma laglag nali ki nabakiaware nabause bered tarapare able gair leem pe uridli? Able lewer nagriwerteda au bodom bakir bakir.”
38Iesude yabi nautmerda, “Waba naket bered nagriwerteda? Wa baka tadasmerare.” Nade wi bakiauda tadasmerda, wige abi detagerda, “Keriba no 5 bered nagriwerteda a neis lar pa nakeredi.”
39Ege Iesude tabara memegle daratagerda wige le nakelare giringirin sogige namerda.
40Ege le bamri ga emreder, able gair 100, able gair 50.
41Ege Iesu akaida neis bered natarukda a neis lar pa nakeredi; eudige kotor espasmuda Adi eswau ikaidari. E bered natrida a mog ikeri tabara memegle neiswerda, ya waiakai ya le ya wanaiswerda. E able korepge neis lar nakaidari le naiswerda.
42Gair legize lewer eroda mena yaba kem bosi.
43Keubu ga, memeglegize bered a lar mog etakerda ge nade barida, wige ikerda 12 epei able mogu daramida.
44Wige 5,000 kimiar urder ge wi able bered eroda.
45MRK 6.45-52 Iesude keko tabara memegle daratagerda wi obakiauda narge obatri a kikem obakiauda Betsaidaem ge nerut apekge tirdireder. Ege kemem emrida able lera kub wanamarikdarda.
46E lera kub namarikdarda, ege adem bakiamuda paserem erkepwaiasameida.
47Nade ga ki asameida, able nar mena ge gurge eipuge eper, a Iesu ge tebteb ge dawer gesepge.
48E tabara memegle darasmerlare nar ereblare wag desaredlare; keubu nedbi ipiti, e yabim maikem tidigmi tumem gurge tidigmer. E no yabimalam kei ikasereder,
49wige abi erdarda e gurge tidigmer. Wige dikepwarlare e lamar dali; wige sasmir demerda ableglam wi aukaka geumge bakerer. Iesude keko yabi daratagerda, “Wa sererge uridwa. Kakanali. Wa nole geum!”
51Ege eudi bakiamuda narge ogi akawerti, ege wag ekemuda. Able memegle bazigmuarti ableglam wi nole berwerda able beredlam nete Iesu agekar dawer. Yabi akepwaride nole paretkak dasmerer.
53MRK 6.53-56 Wige gur tadatupidarda tabakiauda ge wege Genesaretge, ge nade wi nar didbarda.
54Nade ge wi narlam adem baupamarti, le ge urder abi erdarda a umele urder e nete dali.
55Able le korider bamri gair utebge ge maike naridweretlare a gimgim le papekge erdeder wige taraislare able utebem ge nade wi asorlare Iesu dawer.
56Gair utebem Iesu basker, kebi utebem a au utemem a gedub uteb ga nagriweretlare, legize tabara gimgimle taraislare able utebem ge nade tama nagriweretlare, wi Iesui ge damoslare e gimgim le wanakerda abi walira mop waditutirda; ege gair gimgim legize netiba ge abra wali ditutilare ege yaba gim basemrer.
