Mak 8:1-26

¹Ara bung ubalan a kum bung ra, a labino kunur na taro det wanpat tomo, ma kalako utna na inangon sur det in nani. O Iesu i kabo pas anun a kum nat na ususer toromi, ma i watungi tandet lena,

²“A maris doko a taro ri, uni det sa kis tomo nam iau nin, a tulu bung, ma kalako utna na inangon sur det in nani.

³Ra an tulu ru det sur anundet a kum tamon nama munurak, det in bengbeng nanan una kisapi, uni ara taro tagun det, det wan ut tagitiro bakbak.”

⁴Anun a kum nat na ususer det inanosi lena, “A nubual ri, kalako taro uni. Tagai mo lako utna na inangon sur dat in tabor det nami?”

⁵Ra o Iesu i ting det lena, “A isin beret kura mot losi?” Det balu i lena, “A wonom mawit kut.”

⁶O Iesu i inanos a taro rop sur det in kis. I los pas a wonom mawit nin beret, i watung wakak pas uni torom o God, i tibiki ma i pitari torom anun a kum nat na ususer sur det in tabor a taro nami. Ra det pami lenutra.

⁷Det los pas a kabanin natnat na kiripo kai, ra i watung wakak pas uni, ma i pitari sur det in tibo a taro nami.

⁸A taro det wangon ma det masur. Numur det song bukus pas a wonom mawit na rat nama kum utna ra det wangon kopos pas uni.

⁹A kum ino tomo nama kum nat liklik ma a kum musano, det rop det wangon. A niluluk ina kum musano kut, i elar nama wat na arip. Ra numur o Iesu i tulu ru det.

¹⁰I kas pas una pot tomo nam anun a kum nat na ususer, ma det wan sur a papor Dalmanuta.

¹¹A kum Parisi det wanpat torom o Iesu, ma det wasiso na engaras tomo nami. Det ling sur det in lari. Ra det saringi sur in pam tu ukinalong sur in ese i lena, i tagisapat una langit.

¹²O Iesu i taramo a mamaut ma i rungasotuk, ra i watungi lena, “Ilai ra a taro tagun uniri, det tamtama sur tu ukinalong? A inanos mot nama lingmulus, ka din pam tu ukinalong torom mot.”

¹³Ra i kas melet una pot, ra i wan gusun det utong un ara papor tasi.

¹⁴A kum nat na ususer det dumano i sur det in los lako beret. In tekene sot kut ra det losi tomo nam det una pot.

¹⁵Ra o Iesu i utumarong det lena, “Mot in tumarong una is anun a kum Parisi, ma anun o Erod.”

¹⁶Ra det wasiso tomo una kukurai ina wasiso anun o Iesu, ra det lena, “I watungi lenra uni ka dat los lako beret.”

¹⁷O Iesu i tasman anundet a wasiso ra i watungi tandet lena, “Ilai ra mot wasiso lena ka mot los lako beret? Pepetlai ka mot mananos ma ka mot talapor utmakai? Pepetlai, a balamot i dekdek?

¹⁸A kum matmata mot i kis, ikut ka mot tamtama nami. Ma a kum talngamot i kis, ikut ka mot longoro nami. Pepetlai, ka mot nuk pas asau ra a sa pam tari?

¹⁹Ra a tibik a limanin beret torom a limo na arip na musano, a iso rat ra mot song bukus pasi nama utna na inangon ra di wangon kopos pas uni?” Det balu i lena, “A noino ma aru.”

²⁰“Ma i kai, ra a tibik a wonom mawit na beret torom a wat na arip na musano, a iso rat ra mot ubukus pasi nama utna ra di wangon kopos pas uni?” Ra det balu i lena, “A wonom mawit.”

²¹Ra i ting det lena, “Ka mot talapor utmakai?”

²²O Iesu tomo nam anun a kum nat na ususer det wanpat tong o Betsaida, ra ara taro det ben pat ara pulu toromi, ma det saringi sur in ubek a lamano uni, sur in tamtama.

²³I pam a laman a pulu, ra i ben gisen pasi gusun a tamon, i ibis tar arin matan a pulu, ma i ubek aru lamano uni, ra i tingi lena, “U sa tama tu utna?”

²⁴A musano ra i tamtama tokodos, ra i lena, “A tama a taro det elar kut nama kum duwai ra det wan nanan.”

²⁵O Iesu i ubek melet aru lamano una arin matan a pulu, ra arin matano der talapor wakak maragom, ra i tama a kum utna rop.

²⁶O Iesu i tulu ru a musano ra, ma i watungi tano lena, “Un nan tokodos sur anum a rumu. Gong u wan ubalan a tamon.”