Mark 8:1-26

¹Akngerr akarrirrek Jesus-warl. Amern ingkerrenh ywerrelhilek. Jesus irrepern angayakw-rnemek amperrngirrek.

²Jesus ilelhek kwertengerl ikwerenh-rnemek, “Ayeng irrepern angayakw-rnemek amperrngirreyel. Arlta irrpety-inger rernem anwekantherr-itwel anenh, angayakw.

³Nthakenh atha renh-rnem thweneyney-angenh, apmer arleng-warl alpetyek, rernem aytney-alpekerr angayakw angath-antey.”

⁴Kwertengerl ikwerenh-rnemel renh ayernek, “Amernan anwantherr nthek-warl inem? Akngerr nhenh-rnem-akertan? Arrangkwarl nhenhan, aherretyarl! Atherrkeny-weny!”

⁵Jesus-el renh-rnem ayernek, “Amern akngerrelang arrekantherrenhan?” Rernem renh tyernek, “Ya, amern ampeng 7-ant aynteyel.”

⁶Jesus-el ingkerrenh ilek, “Arrantherr ingkerrenh anenherr-arey ahernel.” Jesus-el amern 7 renh-rnem inek. Ra Ingkart Akngey-warl angkek, inkwerelhemel, amern akngerr renh anthetyek. Jesus-el amern rlweth-akek, kwertengerl ikwerenh-rnem anthemel, rernem artwa ingwer-rnem antheynetyek ingkerrenh.

⁷Aker irrpeng-rnem-then irrpety kwertengerl ikwerenh-rnemel inek, Jesus renh anthemel. Ra Ingkart Akngey-warl angkek, inkwerelhemel aker irrpeng renh anthetyek. Jesus-el aker irrpeng renh rlweth-akek, kwertengerl ikwerenh-rnem anthemel, rernem artwa ingwer-rnem antheynetyek ingkerrenh.

⁸Jesus-el amern irrpety-penh irrpelthel akngerrilek, ingkerrenh wantetyek. Ingkerrenh 4,000 inkwerelhek, Jesus-elarl amern ingkerrenh wantek. Amern akngerr menty-anem irrek. Kwertengerl rernem ingkerrenh amern-rnem akwetyeynek, teram 7-warl ampwerrk iwemel ingkerrenh. Teram 7 amern akngerr-akert rtnenh. Jesus-el ingkerrenh thwenek, rernem apmer-warl alpetyek.

¹⁰Jesus, kwertengerl ikwer-rnem-akert rtnwewarl nganek. Rtnwa ikwerel rernem alhek apmer ingwer-ampeny-warl-anem, apmer Dalmanutha-warl.

¹¹Rernem atwarrirrek rtnwethey. Pharisee-rnem Jesus-warl apetyek, renh ilerretyek. Rernem renh arrkernek, Akngey-kenh rlterrkek, ingwerek-ingwer-angkwarr mpwaretyek, mwerriletyek.

¹²Jesus-el renh-rnem ilek, “Arrantherrarl angka ingwerek-ingwer ayenh ayerneyel-kety. Menty! Ayenh ipmenherr-arey, arlkareweyang! Ayeng menty-anem aneyel arrekantherrety.”

¹³Jesus alhek ikwer-rnem-kety. Ra rtnwel nganerl-alhek. Ra apmer ingwer-warl alhek, kwaty ilkwangkwarr anthenayn, kwertengerl ikwerenh-rnem-akert.

¹⁴Kwertengerl ikwerenhel-rnem amern ampeng iwerl-alhek apmerek. Amern anyentant rernem akngek.

¹⁵Jesus-el renh-rnem ilek, “Mwantyel arntarnt-arelhenherr-arey Jew-kenh angkarl apenteyel-rnem-kety, Atyetyart Herod-kety. Ahelarl rernem arlwar rtneyel-kety, thwet-penh-apeny, apmwangkwarrarl rernem akalty-antheyel-kety.”

¹⁶Kwertengerl ikwerenh-rnem angkerrenh, “Ra ahelirreyel anwekantherr, anwantherrarl amern iwerl-alhekek-arnterl.”

¹⁷Jesus-el ra iterl-arek, kanper-antey, rernemarl ikwer angkerrenh. Ra renh-rnem ilek, “Ilekekarl arrantherran iterreyelan, amern arlkwey-angenhan? Arrantherr ingkerrenhel artewentyel iterl-arey-angenh-antey. Kel, arrantherr areyelan, arrantherr iterl-arey-angenharl. Kel, arrantherr aweyelan, arrantherr iterl-arey-angenharl.

¹⁸Ayenh arrantherr iterl-aremer, ayeng Akngey-kenh Itnweng rlterrk-akert. Arrantherr ayenh iterl-aremer, atha artwa akngerr 5,000 wantek, amern irrpetyapel, aker irrpetyapel.”

¹⁹Jesus-el renh-rnem ayernek, “Nthakenty teram arrantherr amern-then aker-then akwetyemel ampwerrk iwek, rernemarl akertang arlkwek-penh?” Rernem ikwer ilelhek, “Anwernantherr amern-then aker-then 12 teram-warl akwetyemel ampwerrk iwek.”

²⁰Jesus-el renh-rnem ilek, “Arrantherr ayenh iterl-aremer, atharl 4,000 amern-then aker-then wantekarl.” Jesus-el renh-rnem ayernek, “Nthakenty teram arrantherr amern-then aker-then akwetyemel ampwerrk iwek, rernemarl akertang arlkwek-penh?” Rernem Jesus ikwer ilelhek, “Anwernantherr amern-then aker-then 7 teram-warl akwetyemel ampwerrk iwek.”

²¹Jesus-el renh-rnem ilek, “Arrantherr ayenh iterl-aremer, ayeng Akngey-kenh Itnweng rlterrk-akert.”

²²Jesus, kwertengerl ikwerenh-rnem-akert apmer Bethsaida-warl alhek. Artwa tawen-arenyel-rnem artwa aparrng Jesus-warl atnwenhek, renh mwerriletyek.

²³Jesus-el aparrng renh tawen-they akwerr-warl atnwenhek. Jesus-el apelhel annga apernek. Jesus-el renh ayernek, “Ntwa apek areyel?”

²⁴Artwa aparrng ra ilelhek Jesus-warl, “Ya, artwernem atha areyel-anem, arwerl-apenyarl arrkay alherleweyel.”

²⁵Jesus-el annga artwa aparrng renh arnep-arnek arrpem. Artwa Jesus-warl ilelhek, “Atha anaynt-anem areyel.” Ra ingkerrenh-anem arek.

²⁶Jesus-el artwa renh ilek, “Kel-anem apmer-warl alpa! Tawen-angkwarr alpey-angenh, akwerrel-antey alpa! Ingwerel-rnem-anem ngenh ayerney-ayntekerr, ayenh arlkarewerl-anekerr.”