Marcos 8:1-26

¹E suiale nakwaite kwian ngle mo litu Jesudi tangle Jesu keruchuge, Jesu gwagedu kwian ulitadi sugedu Jesuge kwian ulita me bligda molen gutadale, Jesu kwian geru jwannga amage ulita kadu mo gitigu, Jesu gerudu kwian geru jwannga ole:

²—Cha tai dage kwian ai ulitage, chui maike chku ama ulita kle cha ole aini, bligda ulita bidegu ama ole gire nege ama ulita me bligda molen gutadale.

³Cha kwian ulita kageni gudeguni me bliba, gire nga ñage jogenga kwian ulita gwage bli ole jonkare, cha me takalin kwian boi ene, kwian gweale nu chieba nga batege, cha me ama ulita kagakalin bliage.

⁴Kwian geru jwannga Jesuge ulita gerudu Jesu ole: —¿Che age mine? Aini nga gballa kwian na me kle toi aini, ¿chema ngwadi che joge bligda jinade kwian ngle alin gutadale?

⁵Jesu geru kadu kwian geru jwanngage: —¿Pan gdamangire ba kle chage dbe? Kwian geru jwannga jaindunga Jesu kalen: —Pan gdagukle alin kle.

⁶Jesu kwian ulita gbu toi dba dbi giti gire ama pan gdaguke gau kote, ama gerudu Chube ole: “Cha Ñenua, nga suga noare chadi ba pan ai ketu chage kwian ulita ullagda.” Jesu gerudu ene Chube ole pan giti gire ama pan skutunga kote, ama pan ketu kwian geru jwannga ulitage girabatale kwian ulita ole, pan jriendunga ngle pan ñadu kwian mo litaba mangire batre alin.

⁷Kaire agwe kwian geru jwannga kledu chage ngwe soli ole gdamoite, Jesu ngwe gau kote, gerudu Chube ole ngwe giti gire ama ngwe ketu kwian geru jwannga ulitage girabatale ulita kwian ulita ole, ngwe jriendunga ngle ngwe ñadu kwian mo litaba mangire batre alin ulita.

⁸Kwian ngle cuatro mil blidu ulita pan gutu kaire ngwe gutu ulita unchku ama takalin kare. Pan bita ngwe bita cheguda ngle, kwian geru jwannga bligda bita e litu ole, ski kweri gbaguke chku ete bligda bita cheguda ole. Jesu kwian ulita ullu ene gire Jesu gbi jigu bdagli kwiange, kwian kaguni gudeguni.

¹⁰Gire Jesu jo duge ule kwian geru jwannga ulita ole chi kagda giti ongoru nga kada Dalmanutage.

¹¹Jesu jo chke nga Dalmanutage ule kwian geru jwannga ulita ole, gire kwian fariseo ngle chku mo lite Jesudi mo chuge Jesu ole ta me no ole, kwian fariseo gerudu Jesu ole: —Ba kle gerule Chube ba kagu nga dba ai giti, cha takalin nege ba lle daga ngwale no kweri kwian me ñage dodade mo kira giti kare ba lle ene dodade cha ulita gwa giti, ene be chke uñale trate cha ulitage ulia Chube ba kagu ba kle age Chube kiralla giti.

¹²Jesu ta olire tanre kwian fariseo me kle ama gai ulia giti, Jesu gerudu kwian fariseo e ulita ole: —¿Mineade diali ba ulita kle toi chui aige tangle takalin cha age ene ba gwa giti? Ba kle gerule alin cha lle daga ngwale no dodade ba gwa giti kwian me ña lle dodade mo kira giti lle ene cha dodadale gire ba be cha gai ulia Chube cha kagu age ama kiralla giti. Agwa ulia cha gerule ba ole, cha mi age ba kle toi chui aige tangle alin ba ulita takalin kare.

¹³Jesu gerudu ene kwian fariseoge, gire Jesu nga jigunga ama ulitadi, Jesu joni naskuni du toli kwian geru jwannga amage ulita ole, ama ulita jo chage duge chkagu chibita kagda ongoru ngnagu.

¹⁴Kwian geru jwannga Jesuge ta jonga pan dbe gutadale duge, pan gdaitre alin allabi kledu ama ole du toli.

¹⁵Jesu kwian geru jwannga ulita ta gbu me geru ngwale gai, Jesu gerudu ama ulita ole: —Cha gerule ulia ba ole, ba mo ta manadale chage ta giti kwian fariseoske kaire chugagwalla rey Herodege, ba me mo chuge ngwadi ama levaduralla gai pan dodale mo alin.

¹⁶Kwian geru jwannga ulita tañachugu Jesu kle gerule pan dodaba levadura ole ulia giti gire gerudu modi: —Che me chiu pan dbe gutadale malen Jesu kle gerule ene che ole levadura giti.

¹⁷Jesuge chku uñale kwian geru jwannga kle gerule modi Jesu gerudu giti, uñadu Jesuge geru levadura giti me sugedu trate kwian geru jwanngage, Jesu gerudu ama ulita ole: —¿Mineade ba kle gerule modi ba me chiu pan dbe mo ole llagli giti? ¿Bage me suge bligda me gire cha ñage bligda kete ba ulitage? ¿Ba bebi mo ta gbe ulia cha ole cha kiraske cha ñage age ulita Chube kiralla giti?

¹⁸Cha lle daga ngwale no tanre dodadu ba gwa giti, agwa me suge bage cha mine. Ba cha gerua keruchugu cha kledu kwian tanre tke tangle gire, agwa geru me suge bage dale. ¿Ba ta jonga ulita cha kwian ngle ullu bligda sidridi giti?

¹⁹Cha pan gdatiga girabatangu bage kwian onbre ngle cinco milge, kwian e ulita unchku gire ¿ba bligda bita cheguda litu ole ski gbamangirege? Kwian geru jwannga Jesuge jaindunga: —Ski gbataboko giti gbaboke chku ete bligda bita cheguda ole.

²⁰Jesu gerudu dare: —Ba gerudu trate. Kaire agwe cha pan gdaguke girabatangu bage kwian ngle cuatro milge, gire ¿ba bligda bita cheguda litu ole ski gbamangirege? Kwian geru jwannga jaindunga: —Ski gbaguke chku ete bligda bita cheguda ole.

²¹Gire Jesu gerudu geru jwannga ole: —¿Bage geru bebi suge cha gerudu sbaliga ba ole giti? Cha gerudu ba ulita ole ba me mo chuge ngwadi kwian fariseo kaire chugagwalla rey Herodes levaduralla gai mo alin giti, cha me kledu gerule levadura ulia giti, agwa cha kledu gerule kwian fariseo gerua ngwale giti kaire chugagwalla rey Herodes gerua ngwale giti —Jesu gerudu ene kwian geru jwannga amage ulita ole.

²²Jesu ule kwian geru jwannga amage ulita ole chagedu dare duge gire ama ulita jo chke una Betsaidage, ama ulita chiu dbige duge gire onbre gdaite gwagwa me dbachku Jesudi dodadale. Onbre gwagwa me dbanga gerudu Jesu ole: —Ba ko gbe onbre ai gwagwa giti ene ama joge chkeni noni.

²³Kwian gerudu ene Jesu ole gire Jesu onbre gwagwa me gau koge du sugekare una ege. Jesu mo jolokwa jun gbu onbre gwagwa giti, Jesu ko gbu onbre gwagwa giti gire ko junnga onbre gwagwa giti, Jesu geru kadu onbre gwagwa mege: —¿Ba ñage ten lle gwealedi o me?

²⁴Onbre gwagwa me ama gwagwa trendu sidri gire ama jaindunga Jesu kalen: —Ima, cha kle ten kwiandi agwa kwian kle meñe cha gwage salengwli gli kare, ama kle chage.

²⁵Jesu ko gbu nakwaite onbre gwagwa giti, gire onbre gwagwa trendu no jo chkeni ulita, ama tendu lle ulitadi trate.

²⁶Jesu gerudu ama ole: —Ba jogeni blike gudegu mo ullage, ba me joge unaske geru trage kwian na ole cha ba dodadu giti —Jesu gerudu ene onbre ama nu dodaba ole.