MARKUS 8:1-26

¹Dhali ka tee gwansan ka dhana waambuhany ’kwani tulki is doḵ/e mo dhali uni dar gi tonṯe/ mo mmoshwa mo tani a’di ki yuḵ imanciḵ a’di gwo mo e a’di mo dhali o uni gwo mo ki:

²Aha/ ḵo’ckina adhana waambuhany ’kwanimpa e i is mo haali/ uni ’koni aha/ shwane/ ka cimi kwara mo dhali dar gi tonṯe/ mmoshwa mo be.

³Dhali waḵki/ aha/ mina hash uni bway pa ki ṯe/ mo e bampam buni mo tani uni mina buye/ i’thi mo i bway mo. Haali/ kun tiya iiyin ’peni pa kun si’dasi’d mo be.

⁴Dhali imanciḵ a’di gwo thoḵki a’di gwo mo ki: Adhana waambuhany ’kwani minu c̱i tonṯe/ mmoshwa e bwam ma si’b imahan ’peni mana mo?

⁵Dhali a’di ki doṯ uni gwo mo ki: Um ’kona maaŋḵuthu’d ekata mo? Uni ki thoḵ a’di gwo mo ki: Ipesu/ mo be.

⁶Dhali a’di ki ḵana dhana waambuhany ’kwani gwo mo mmo’ko ’pena ’cesh mo. Dhali a’di ki bu’th maaŋḵuthu’d ipesu/ mo dhali ki a’di c̱iki mo jin ’boruwa ’bor bwa i is mo tani a’di ki ’ce’d uni mo dhali c̱i uni ki imanciḵ a’di gwo mo mmodhu abori ’kwani mo. Dhali uni dhuki uni ibwambor ma waambuhany ’kwani mo be.

⁷Dhali uni tan gi ushi to yi’de/ idaḵa/ mo. Dhali ki a’di ’borki’da ’bor bwa i is mo tani a’di ḵanki uni gwo mo ki uni gwansan si’da/ minu ’taki dhu ibwambori uni mo be.

⁸Dhali uni shwaki uni mo dhali uni ’kokunu mo mmokap̱ mo. Dhali uni tulki kuluny maa is kun urki ’kup̱ mo mmo’tu’da nura/ ipesu/ mo be.

⁹Dhali uni gwansan kun ’kokin mo mmoshwa a’di mo tani wakina e gi ’kwani alaap̱i doŋon mo be.

¹⁰Dhali a’di ki hash uni mo dhali ki jahanne/ a’di seki bwam ma ḵur mo nyaḵki imanciḵ a’di gwo mo dhali uni iikin mo e bampa/ gi Pan Dalmanuṯẖa mo be.

¹¹Dhali ’Kwani P̱arisiyiin p̱u’dkini a’di mo dhali ṯelki mii ’pen mo mmogar a’di gwo ’kusi ’twa/ mo mmoŋap̱ jamas mii ’peni a’di ’peni momis mo mmopal a’di mo be.

¹²Dhali a’di wuki’da shure/ kagahara mo e shi/in piti mo dhali o gwo mo ki: Atinta ŋap̱ ma nyaḵum yil ’kwani gwansan jamas mii mo? Ka jiŋ gana/ aha/ ṯora um gwo mo ki: Jamas miiŋ kamu/ yisa minu c̱i um ’kwani ma nyaḵum yil gwansan mo.

¹³Dhali a’di ki dhal uni ’pen mo dhali se i bwam ma ḵur doḵ/e mo. A’di ki ’ciṯẖa gap̱ gi ’bana kamu/ mo be.

¹⁴Dhali uni ŋaki maaŋḵuthu’d mo mmo’koki guyu/ mo. Dhali uni tan gi jasi jin ṯal ’deŋ gana/ jin takina uni mo e bwam ma ḵur mo.

¹⁵Dhali a’di ki rum uni ki gwo mo mmo/o gwo mo ki: ’Cunycuri miim bum ki ’bore/ mo dhali jiyi acumaṯ gi ’Kwani P̱arisiyiin ki e ki ’bore/ mo dhali acumaṯ gi ’Kwani Hirodusiyiin mo.

¹⁶Dhali uni su’kkin ki gwo ka rem ’kup̱ mo mmo/o gwo mo ki: Ana dara gi maaŋḵuthu’d mo be.

¹⁷Dhala Yesus nyiṯẖki gwom buni mo dhali o uni gwo mo ki: Atinta su’kkina um ki gwo mo gom maaŋḵuthu’d jin p̱iyi’di um kan mo? ’Kona um ki nyiṯẖ mo ’taa? Walla ’kona um ki mish gwo ’ban mo? Adum bum ’bitha’bi’th mo kana?

¹⁸Um tan gi e mo dhali ’kona um ki mish mo mo? Dhali um tan gi ’ce mo dhali ’kona um ki ciḵ gwo mowa? Dhali ’kona um ki ka gwo e mowa?

¹⁹Ki aha/ ’ce’dkina maaŋḵuthu’di mudhe’d mo gom ’kwani alaap̱i mudhe’d mo dhala nura/ ekata i’tu’dkina um ki kuluny maa kun uri ’kup̱ mo? Uni ki thoḵ a’di gwo mo ki: I’kume’d i’ce’dka su/ mo be.

²⁰Dhali maaŋḵuthu’di pesu/ gom ’kwani alaap̱i doŋon mo tani anura/ ’tu’dkina um ekata ki kuluny maa kun tulkina um is mo? Dhali uni ki thoḵ a’di gwo mo ki: Ipesu/ mo be.

²¹Dhali a’di ki o uni gwo mo ki: Dhali ’kona um ki mish gwo ’ban naskina/ mowa?

²²Dhali uni p̱u’dkini Pam Beeṯsayda mo. Dhali ’kwanin tiya suski wathi/ i a’di mo, a’di jin ta’da ja’da/ mo dhali ŋap̱ a’di mo mmota a’di is ki me’d mo be.

²³Dhali a’di ki sus wathi/ jin ta’da ja’da/ ki me’d mo, dhali a’di ki sus a’di ka pije/ ’peni pa mo. Dhali ki a’di ’taḵki manya/ i em piti mo dhali sus a’di ki me’d piti mo tani a’di ki doṯ a’di gwo mo ki: /E mishi toŋ kamu/ p̱ar e mo ’taa?

²⁴Dhali a’di ki hil ’kup̱ ki mis mo dhali o a’di gwo mo ki: Aha/ mishkina ’kwani mo. Hili uni wakina e gi cwa kun iikin mo ’te/.

²⁵Dhali yan’ko’d doḵ/e a’di ki sus a’di ki me’d piti mo dhali kar me’d piti ap̱o/ em piti mo. Dhali a’di hilki’da hil ki dha’k mo dhali wac̱ mo dhali a’di mishki’da ris to ’baar mo eya tente/ mo be.

²⁶Dhala Yesus ki hash a’di bway gu’b piti mo mmo/o gwo mo ki: Dhalku/ ki cic̱ bampa/ mo.