Maku 8:1-26

¹Morotoino imoihmãkõ tõximõse ropa. Mame tohke pyra toexirykõke otuhpyra toto. Mame Jezu a typoetory tykohmase tyya. Ynara tykase ynororo toto a,

²—Imoihmãkõ pynanohnõko ase ymaro oseruao tohke pyra tynyhse toto exiryke.

³Toto aropory ropahtao ya itapyĩkõ taka etuarimãko mã toto tynahke pyra toexirykõke. Moino tooehse toto tarona.

⁴Mame ipoetory tomo a tozuhse, —Otãtohxo ke imoihmãkõ otuhmãko sytatou osepekahtoh pyra ahtao? tykase toto.

⁵Mame ynara tykase ynororo, —Otãto wyi nae matou? tykase. —7me rokene, tykase toto.

⁶Morarame imoihmãkõ typorohkapose Jezu a nono pona. Mame wyi tapoise eya. Mame, “Kure mase Papa,” kaxĩpo Ritonõpo a, wyi tytohtohkase rahke eya. Typoetory tomo a tokarose ekarotohme imoihmãkõ otuhtohme.

⁷Mame kana inunõkara roropa nae kynexine tuhke pyra. —Papa, kure mase, tykase ropa ynororo. Morara kaxĩpo tyya typoetory tomo a tapiakapose kana imoihmãkõ zohme.

⁸Mame tõtuhse toto tuesapare. Mame zohkõ akoĩpyry tanỹse ropa eya xine, 7me ruto pehme.

⁹Mokaro tõsẽ õnyhpõkõ tuhke exiry 4.000me exisasaka kynexine. Morarame imoihmãkõ tonyohse ropa eya.

¹⁰Moromeĩpo kanawaka tõtyrise ynororo, typoetory tõ maro. Toytose toto Taumanuta pona.

¹¹Morarame parixeu tõ tooehse Jezu a. Sekere tykase toto Jezu a. Jezu nukurãkatary enery se roropa toh kynexine repe, zuaro toehtohkõme.

¹²Yrome Jezu typoihtose eya xine. Morara exiryke pusuh tykase ynororo moe toko. Ynara tykase ynororo eya xine, —Unukurãkatary enery se matose repe, yrome onenepopyra ase oya xine, tykase Jezu eya xine.

¹³Mame tynomose ropa toto Jezu a. Kanawaka tõtyrise ropa toytotohme mõpozakoxi.

¹⁴Morarame ipoetory tõ turukõ poko tuenikehse toto. Toiro wyi pitiko rokẽ kanawao kynexine.

¹⁵Morarame ynara tykase Jezu typoetory tomo a, —Tomeseke ehtoko parixeu tõ poko Erote tõ poko roropa. Otyro porutatoh sã mã toto.

¹⁶—Otara ãko hkoh Jezu nae? Otarãme wyi pyra kuexirykõke, tykase toto oxime rokene.

¹⁷Yrome mokaro etaryke tyya ynara tykase Jezu eya xine, —Oty katoh wyi poko oseosezuhnõko matou wyi pyra oexirykõ poko? Jomiry onenetupuhpyra ro matou? Oty katoh tũpore sã oupuhpyrykõ nae?

¹⁸Tonure amarokõ repe yrome onetõkara sã matose. Typanare roropa amarokõ repe yrome otato pyra amarokomo. Ãmorepatopõpyrykõ poko wenikehnõko matose.

¹⁹5mã wyi tytohtohkase ya, 5.000mãkõ otuhmatohme. Mame otãto tonahsẽ akoĩpyry manymyatose ruto pehme? tykase Jezu eya xine. —12me ruto pehme, tykase toto.

²⁰—Moro ke roropa 7me wyi ahtao 4.000mãkõ otuhmatohme, otãto manymyatose tonahsẽ akoĩpyamo? tykase ynororo, tõturupose eya xine. —7me ruto pehme, tykase toto eya.

²¹—Moro poko onenetupuhpyra ro matou? tykase Jezu eya xine.

²²Morarame Petesaita pona toytose toto. Mame ahno a tonurẽkara tonehse Jezu a, —Ajohpãme sã mose apoko, tykase toto.

²³Mame Jezu a kurãkara tarose ameke emary poko pata ehpikoxi. Ituh tykase ynororo enuru pona. Mame enuru tapose eya, —Osenuhmãko ma? tykase, tokaropose eya.

²⁴Mame mokyro tõsenuhmase repe, —Ahno tõ enẽko ase repe. Yrome wewe panõ rokẽ ytoytõko nase, tykase ynororo eya.

²⁵Mame enuru tapose ropa Jezu a. Mokyro kure toehse ropa. Kure tõsenuhmase ropa ynororo rahkene.

²⁶—Atapyĩ taka topohme ytoko ropa. Pata pona ke ytopyra exiko, tykase Jezu tonuremỹpokara a.