Mareko 8:1-26

¹Dameŋ ira ŋic guru sâko Jesurao tumaŋnerâ nânâ tâmiric jupie motecfâcne hefârec‐joparâ jazawec,

²“No ŋic jaŋere bunane sâqorekac, jaŋe norao ŋafe ʒoaŋ jahec â moc juku nânâre hâmoŋgopieŋ.

³Eme nânâ tâmiric hae‐jeŋicko sorec‐jopape hatao rahuc nânâre hâmo sipiric eniŋmu, gâcne jaŋe mâreŋ ʒorickonec warembiŋ.”

⁴Iŋuc mume motecfâcne jaŋe ʒiŋuc âzâcnembiŋ: “Mâreŋ tuhuo ʒira nânâ sâko wenirec bâfuarâ ŋic iŋucne gumec‐jopapene sâcjopaocmu?”

⁵Mupie wio‐jarerâ muwec, “Ŋoŋerao poroŋ wezimuc fokac?” Eme jaŋe mumbiŋ, “Seweŋ.”

⁶Âzâcnepie manarâ mume ŋic jaŋe qâzuckerâ mâreŋko waha ŋepie poroŋ 7 rorâ daŋge murâ bazuhuc motec jareme jaŋe bâtâc barâ ŋic jarembiŋ.

⁷Erâ opâ qowi piicne jahec mac ŋewec i iŋuc jaha jambuŋkerâ mume ŋic bâtâc bajarembiŋ.

⁸Eme ŋic jaŋe nârâ gapec‐jopawec. Erâ mâreŋko tiwâne ŋerawec i sasac 7 ira ropie hurâ fusucmawec.

⁹Nânâ nâmbiŋ ŋic i jaŋere ʒare 4 tauseŋ. Nâpie sorec‐jopame risiembiŋ.

¹⁰Ŋic jaŋe rapie izia motecfâcne jaŋehec wokeo ferâ raku Dalimanuta mâreŋko fisimbiŋ.

¹¹Ira juhapie farisaio ŋic jaŋe Jesurao fisirâ dâŋzi jâiŋkerâ sambâŋko fuŋne qaqa mâsi moc mume fuame honeniŋte mumbiŋ. I esâickehuc âzâcnembiŋ.

¹²Âzâcnepie ʒâire‐jarehuc nokafe herâ muwec, “Ŋic iŋucnezi fuŋne weniŋucte fuŋne qaqa mâsire muŋgopieŋ? No jâmbomac ŋazape: Ŋic iŋucne fuŋne qaqa mâsi moc mi ŋowatu‐jâmbâŋkepemu.”

¹³Iŋuc murâ behec‐joparâ motecfâcne rocjopame wokeo ferâ riqic ocniŋucnao raʒimbiŋ.

¹⁴Eme motec jaŋe poroŋte nikec‐jopame foha raʒimbiŋ. Mocsâkoa wokeo fowec.

¹⁵Ehame uŋdâŋ ʒiŋuc muhuc jazawec: “Ŋoŋe farisaio â Herode hâmu goreŋ‐jeŋic bâec bacnehuc paŋsawa juŋʒepieŋ.”

¹⁶Jazame jaŋackoaŋ nazaŋ gazaŋ erâ mumbiŋ, “I poroŋte nikec‐nâpome foha wareŋgopeneŋte nâzâkac.”

¹⁷Dâŋ i muhapie hazec‐ticnao hume manarâ jazawec, “Poroŋte nikec‐ŋopajec irec wemocte muc manac eŋgopieŋ? Ŋoŋe fuŋne mi mana taraŋgopieŋ? Maŋŋeŋic moc mi uŋtokac me?

¹⁸Ŋoŋe ʒâŋe‐ŋeŋic foipiehame wiac mi honeeŋgopieŋ â hazec‐ŋeŋic foipiehame dâŋ mi manaeŋgopieŋ? Ŋoŋe wiac hone manac ehuc ninikecne jueŋgopieŋ me?

¹⁹No poroŋ 5 bâtâc barâ ŋic 5 tauseŋ gumec‐jopape tiwâne fome ropie sasac wezimuc hurâ fusewec?” Wio‐jareme mumbiŋ: “12”.

²⁰“Â poroŋ 7 bâtâc barâ ŋic 4 tauseŋ gumec‐jopape tiwâne fome ropie sasac wezimuc hurâ fusewec?” Jaŋe mumbiŋ: “7”.

²¹Mupie jazawec, “Eme mamana‐ŋeŋic sifu mi fuakac me?”

²²Eme raku Besaida haeo fisipie ŋic tiŋtuŋ moc Jesurao bawarerâ mezi bâuaocte âzâcnembiŋ.

²³Âzâcnepie ŋic tiŋtuŋ menao rorâ hae râpeo bahurâ ʒâŋe‐ticne tâfec ruacnerâ mene qizecnao râehuc wiocnewec, “Wiac moc honekomec?”

²⁴Eme tiŋtuŋzi ʒâŋe firâ muwec, “No ŋic honec‐jopape jâc hawari tinac erâ rac warec eŋgopieŋ.”

²⁵Iŋuc mume Jesu e menezi ʒâŋene bâuame ŋic e ʒâŋene biaŋkeme fiɋaɋackerâ bembeŋko â ʒoricko wiac sasawa hone‐hâmowec.

²⁶Eme Jesuzi sorehuc ʒiŋuc âzâcnewec: “Go haeo mi fehuc mâc ficgao rac.”