SAN MARCOS 8:1-26

¹Jngu nixtjin kionga ꞌñu nkjin xuta kuañajan ngani ꞌba tumé tjinre mé= xi skine, Jesús kinchjare xutare ꞌba kitsure:

²—Ne faꞌanimana̱ xutankjinbi, ngatꞌa je ján nixtjin nga tjindukona̱ ngaꞌe ꞌba bi nde tjinnire mé= xi skine.

³ꞌBa tsa kꞌuete kjindia ndaba, ku̱anre tsa ku̱aꞌinda ngaya ndiyo, ngu ne kjin jendiba yakꞌani.

⁴ꞌBa xutare kitsingojore: —¿Tunga ñá kuechjaꞌaña xi chine xi ku̱anire xutankjiun nga jngu ngaꞌnde tꞌaxin joni ngaꞌe nga tuꞌyá tjindu?

⁵ꞌBa Jesús tsiningiyare: —¿Jótjin niñuxtila tjinnu? —Yatu mani —kitsingojo xutare.

⁶ꞌBa Jesús ꞌexa nga xutankjiun ngatꞌendu tꞌa nangiu. Kiskjebe niñuxtila xi yatu ꞌba kionga je kitsjare kjuanda Naꞌenchana, kitsixkua ꞌba kitsjare xutare, ꞌba kui kitsikaꞌbisunre xutankjiun.

⁷ꞌBa nde tjinjóre tjiuti ngayeje. ꞌBa Jesús kitsjare kjuanda Naꞌenchana ngatꞌa tseꞌe tjiutiu, ꞌba ꞌexa nga ngatatsikaꞌbisunre xutankjiun ngayeje.

⁸ꞌBa ngatsiꞌi tsakjen kaꞌnda nga kitsere, ꞌba kionga kiskjaꞌañajan xkua xi tsꞌangi, yatu nisin kuán.

⁹ꞌBa je mején ñujun mi mani xuta xi tsakjen. ꞌBa jaskan Jesús kitsikixantꞌa xutankjiun

¹⁰ꞌba jaꞌasꞌen jngu barku ko xutare ꞌba kiji jngu ngaꞌnde xi Dalmanuta ꞌmi.

¹¹ꞌBa jaꞌe nchja fariseo ꞌba ꞌetutsꞌinre nga josiko Jesús. ꞌBa tuxi skutꞌayakoni, tsiꞌare nga saꞌen jngu chu̱ba̱ tuxi kuakuchuyani nga ngatꞌare Naꞌenchana jendibani.

¹²ꞌBa Jesús ꞌñu jaꞌatsere ꞌba kitsu: —¿Ánñu xuta xi tjin ngandaꞌe jngu chu̱ba̱ miꞌani? ꞌBa xinkixi_nuu̱ nga bi kuaꞌere xuta xi tjin ngandaꞌe jngu chu̱ba̱.

¹³ꞌBa ꞌbatsaꞌen kitsikꞌendu kui xutabiu, ꞌba jaꞌasꞌen ngani barku ꞌba xingunda ndachikun kiji.

¹⁴ꞌBa xutare Jesús kichiyajinre nga tsakaꞌa niñuxtila; tu jnguchi niñuxtila yaꞌa ngaya barku.

¹⁵ꞌBa Jesús kitsure: —Chutsijon, ꞌba tikuendo yojonu ngatꞌare naꞌyu sanre nchja fariseo ꞌba ko tseꞌe Herodes.

¹⁶ꞌBa xutare inyafako nijmi xinkjin ngatꞌa kuankjinre nga kui kjua nga tsajainre niñuxtila.

¹⁷ꞌBa Jesús kuankjinre xi inyatsure xinkjin xutare, ꞌba kitsure: —¿Ánñu techuba nijmiñu nga tsajainnu niñuxtilajín? ¿A kje machuꞌyajínnu ꞌba a ninga kje mankjinjínnu? ¿A ne tijñunu?

¹⁸Tjin= xkún. ¿A bi machuꞌyanu? ꞌBa tjin= ñojón. ¿A bi nuꞌyo? ¿A bi nde faꞌetsjenninu?

¹⁹Kionga kitsikaꞌbia̱ ón niñuxtila ngajinre ón mi xuta, ¿jótjin nisin kjinitsio ko xkuare xi tsꞌangi? ꞌBa xutare kitsingojo: —Tejó nisin.

²⁰—ꞌBa kionga kitsikaꞌbia̱ yatu niñuxtila ngajinre ñujun mi xuta, ¿jótjin nisin kjinitsio ko xkuare xi tsꞌangi? —Yatu nisin —kitsingojo.

²¹ꞌBa ꞌbatsaꞌen Jesús kitsure: —¿A kje mankjinjínnu?

²²ꞌBa jaskan Jesús ko xutare echu naxinanda Betsaida; ꞌba kio jaꞌechanire jngu xuta ka, ꞌba kisꞌetsꞌare nga ngatatsiko.

²³ꞌBa Jesús kiskjebe ntsja xuta ko, ꞌba ꞌetukajinko naxinando. ꞌBa kitsikaꞌnyi xkun ko ndatiare ꞌba yanere ntsja ꞌba tsiningiyare: —¿A je matsejenri tsajmi?

²⁴ꞌBa xuta ko kiskutsejenndaire, ꞌba kitsu: —Je ꞌbia̱ xuta, tunga joni ya xi setsuma matsejenna̱.

²⁵ꞌBa Jesús yane nganire ntsja xkun, ꞌba xutabiu nda kiskutsejen, ꞌba kuanda, ꞌba je ne nda kuatsejen yejere.

²⁶ꞌBa ꞌbatsaꞌen Jesús ꞌete ndaba, ꞌba kitsure: —Bi nde bitjasꞌenjinni naxinando ngandaꞌe.