Make 8:1-26

¹Gii dokopa endakali kambu andake mende deaka ipao kateaminopa dupanya nee natami nasia-pyaa. Dokopa Jisasame baanya disaipele dupa epena latala dapa lamaiya-pyaa:

²“Endakali dakaita namba-pipa yuu gii tepoma katapumano doko, indupa dupa nee natami nasilyamo dokonya dupa kondome kumilyo.

³Dupa nee nanao nambame mee nyakamanya andaka pena latopa yangi dupa tependa tangena lawambe latala kaitinisa lombapae setamina,” lea-pyaa.

⁴Disaipele dupame baa lamaiyoo, “Endakali napalenge yuu dakenya naimame nee anjatae kapa pao nyepala endakali dakaita tiaka nao nena lao maitamape?” leami-pyaa.

⁵Baame dokaita pisoo, “Nyakamanya betesa akipate silyape?” lea-pyaa. Dupame, “Kalange silyamona,” leami-pyaa.

⁶Dopa leaminopa baame endakali kambu doko isa petena lea-pyaa. Dopa latala betesa kalange dutupa nyepala Gote lao yaka pilino latala konjia-pyaa. Konjepala baanya disaipele dupame mokosoo maina lao maiya-pyaa. Maiyamopa baanya disaipele dupame endakali kambu peteamino dupanya mokosoo maiyami-pyaa.

⁷Dupanya wapaka yakane kuki mendatupa apata siaka-pyaa. Baame dutupa Gote lao yaka pilino latala dutupa apata mokosoo maina lea-pyaa.

⁸Endakali dokaitame nao tiaka kayateaminopa konjepae kakana siamo dupa baseketa mandi kalangenya mandyuu tumbasiami-pyaa.

⁹Endakali dupa taosene kitomende jowapi mende-pyaa. Dupa nee napeaminopa baame pena lea-pyaa.

¹⁰Dopa latala baanya disaipele dupa-pipa sipi mendenya pyakalyetala yuu taono Dalamanutatena peami-pyaa.

¹¹Dokopa Patasi dupame ipupala Jisasa pii yanda pimaiyami-pyaa. Dupame baa minao makande pyoo baame kaitinya-tae kongali mende pina leami-pyaa.

¹²Dopa leaminopa Jisasame etete mona ŋee latala, “Aipuma endakali indupa palelyamino dupame kongali mende pii lelyamipi? Nambame nyakama kiningi langilyona, endakali indupa palelyamino dupa kongali mende laitaka napitowana,” lea-pyaa.

¹³Dopa latala baame dokaita yakinatala sipi dokonya dee pyakalyetala endaki pete dokonya yangitena pea-pyaa.

¹⁴Dokopa disaipele dupame betesa namandyuu kame setala peami-pyaa. Sipi peteamino dokonya betesa mende nasiamopa mendai iki sia-pyaa.

¹⁵Jisasame dokaita kyoto joo lamaiyoo, “Kandeleno! Patasi dupapi dee Etote mauwapinya iisa dupame nyakama koyasetamina wandyuu kalyepape!” lea-pyaa.

¹⁶Dopa leamopa dupame betesa nasiamo tenge dokonya nyakamalapo leami-pyaa.

¹⁷Dopa leamino doko Jisasame kandatala dokaita lamaiyoo, “Nyakamame aipuma betesa nasilyamo lao mende lamai lamai pilyamipi? Nyakama mona napalengepe? Nyakamame masala naelyamipi? Nyakama mona pyakilyetae kalyape?

¹⁸Nyakama lenge tenge dokome nakandelyamipi? Nyakama kale katenge dokome nasilyamipi? Nyakamame kame setelyamipi?

¹⁹Nambame betesa yuungi nyepala akali taosene yuungimi nena lao konjakamaiyo ongonya konjepae kakana siamo dupa nyakamame baseketa mandi akipatenya mandyuu tumbasiamipi?” Jisasame lea-pyaa. Dupame baa lamaiyoo, “Kingi ita mende-kisa dee lapomanyana,” leami-pyaa.

²⁰Jisasame dokaita lamaiyoo, “Nambame betesa kalange nyepala endakali taosene kitomendeme nena lao konjakamaiyo dokonya konjepae kakana siamo dupa nyakamame baseketa mandi akipatenya mandyuu tumbasiamipi?” lea-pyaa. Dopa leamopa dokaitame, “Mandi kalangenyana,” leami-pyaa.

²¹Dopa leaminopa baame dokaita lamaiyoo, “Nyakama masetala naelyamiakape?” lea-pyaa.

²²Dokopa dupa Betesaita yuu dokonya epeami-pyaa. Epeaminopa endakali dupame akali lenge monda mende baa kateamo ongonya laminao ipupala baame watandena leami-pyaa.

²³Jisasame akali lenge monda doko kii nyepala yuu taono yakane doko yakinatala kii minao mendasale pea-pyaa. Pupala baame akali dokonya lenge dolaponya sopokali tasinya pisetala, baanya kingi dolapome baa minia-pyaa. Dopa petala, “Embame opale mende kandelepe?” lao baa pisia-pyaa.

²⁴Dopa leamopa baa lenge talyetala, “Nambame endakali dupa kandelyo. Dupa ita mendapua kaita paele pipiminopa kandelyona,” lea-pyaa.

²⁵Dokopa Jisasame akali dokonya lenge dolapo deaka kingimi minia-pyaa. Dopa piamopa akali dokome kandokondape pyoo kandea-pyaa. Baanya lenge dee auu pyoo tapala baame dupa pitaka auu pyoo kandea-pyaa.

²⁶Dopa piamopa Jisasame akali doko andaka pena latala lao pituu, “Emba yuu taono yakane dokonya napupi,” lea-pyaa.