1MRK 8.1-10 Kebi niainiai, nerut au kub lera tababu tabakiauda etami nade Iesu dawer. Nade ga yaba nole ko nalu nagriweretlare arwem, Iesude tabara memegle tababim darabgerda a yabi daratagerda,
2“Kara nas barukli able leem ableglam wi neis a netat gerger karidoge urdi a pe irdi yaba nole ko nalu nagriwerteda arwem.
3Ese ka yabi gedim namarkare ka nole yabi kikem darasisiare wader yabiaiam ya gabge erkepnonor ge obaum ableglam wader yabiaiam tabakiuda au murisiam.”
4Abi memeglegize abi itmerda, “Nako lelut lewer wairdar e able le wadarasisiare able lekak uteb pe irdi?”
5Iesude yabi nautmerda, “Naket bered nagriwerteda?” Wige abi detagerda, “Keriba 7 bered nagriwerteda.”
6Ege eudi ge able lera kub daratagerda wi obakeri sepge obamri. Ege eudige 7 bered etakri, Adi eswau ikaiku, ege bered mogem itri a tabara memegle naiswerda ya waiakai wi ya lera kub wanaiswelare. Ege memeglegize ga le naiswelare.
7Ege memegle ko urder yaba ko kepkep lar daragriweretlare. Iesude Adi eswau ikailu able larlam, a tabara memegle daratagerda wi able lar le wanaiswerare.
8Wige urder maike 4,000 le, yaba gair lera kem bosi nade yaba lewer aro esemuda. Nade memeglegize kaier etakerda wi dasmerda 7 epei kaier lewerlam bosi. Iesude able lera kub namarikdarda,
10Ege keko bakiamuda taba memeglekem narge batri a bakiauda able utebem ge able gedge irdireder Dalmanutage.
11MRK 8.11-13 Wader Parisyo tabakiauda Iesuim a abi ikaidarda ga abi desaredlare. Wi Iesui bautmerer atamilam kotorlam ableglam wi laglag abi wadamisirda.
12Iesude eudige aukaka ner batawerdi a akiadari, “Naluglam le able kerkerge bautmeli nalu atamilam ikeredi? Ka wabi agekar detagreda, wi umerkak ya atamilam wairpeirare!”
13Ege eudige darakaireta. E ko bakiamuda narge akawerti, wige ko bakomerti bakiauda nerut pekge nikeperira.
14MRK 8.14-21 Memeglegize no netat bered narge tikadarda: wi okataprike darakaireta ko wader wataisa.
15Iesude yabi kikem daratagerda, “Wa okeoke uridwa! Wa okeoke uridwa Parisaio yislam a pako Erodi yislam.”
16Wige bakeli able mir ga ipulare tabadoge. Wi batagelare, “E able lu detautli ableglam keriba nole bered nagriwerteda.”
17Iesu umele dawer wi nalu mir batagelare ege eudige yabi nautmerda, “Wa nalu mir peua ipweda meriba nole bered kak? Wa nole peua umele uridli? Nako waba idoni au wapum dali?
18Waba poni nagriwerteda wa nole dasmereda, waba girip nagriwerteda, wa umerkak asrare. Wa umerkak dikepwalare?
19Nade ka 5 bered itri 5000em, wage naket epei daramida able leweru ge kaier barida?” Wige abi detagerda, “12 epei.”
20“A nade ka 7 bered itri 4000em, wage naket epei daramida able leweru ge kaier barida?” Wige abi detagerda, “7 epei.”
21Iesude eudige yabi daratagerda, “Nako wa mena umerkak uridli?”
22MRK 8.22-26 Wi bakiauda Betsaiadage bakarki nade ge wader legize sadmerle tigareda Iesuim. Wi abim bagoda Iesude abi waitutida.
23Iesu akaidari sadmerlera tag derpeidari a abi adem utebiam datkimuada. E sadmerlera poni mosu ditwi a tabara tag ikaida abidoge dikmerida. A eudige eutmeri, “Nako ma lu darasmereda?”
24Able kimiar eudige egri a abi detagri, “Ka le darasmereda; wi uridli mokakalam lu wipe daragmeda!”
25Iesude ga tabara tag nakaidari able kimiarge namarikdari. Able kimiaride ga aukaise dasmeri; e umele wadasmeli gair lu paretkak. Abra poni ge badgirda.
26Iesude able kimiar ko emarikda taba gedim. E able kimiar detagri, “Ma bakiamu gedim, mage nole ko bakiamu able utebem.”
27MRK 8.27-30 Ege Iesu a abra memegle aden bakiauda gair utebem ge Sizaria-Pilipaige naridweretlare. Wi gabge nakasirweretlare ege Iesude yabi nautmerda, “Wa kari natagrare, nako legize detauteda kaka nete nali?”
28Wige abi detagerda, “Kepkep legize detauteda mama Zone Baptaiso nali: a wader legize pe ikereda mama Elaiza nali: a wader legize pe detauteda mako pema nali able netat le peropetalam.”
29Iesu yabi nautmerda, “Wawa uridli? Wape nako peua detauteda kaka nete nali?” Peterude abi detagri, “Mama Keriso nali!”
30Ege Iesude ge yabi kelarkelar daratagerda nole ko able mir waditauteda netat leem.
31MRK 8.31—9.1 Ege Iesu eudige akaidari tabara memegle ya wenerwereda, “Abie Lera Werem ya au asiasi wadigi. Aule, Kirim merkemle a Aotale ya abi wadituaklare. Abi ya waipitare, nade neis a netat gerger obarkare e ya ko idid waiakai.
32E paretkak able lu yabim daratautlare. Peterude abi kebikebi wader lelam adem igardi eudige akaida abi tetaperti.
33Iesu tabatawirikda taba memegle darasmerda, eudige Pererui ertaperti. E abi detagri, “Ma adem bakiamuda karialam, Satana! Mara akepwar no lera akepwar nagriwerteda. Wi nole Adira akepwar nagriwerteda!”
34Iesude eudige tabara memegle tababim dabgerda a wader le pa uridli. E yabi daratagerda, “Nale laglag karidoge watabakiamu e nole tababu obakepwarwa, tabara satauro watepwa a kari watararmirwa;
35ableglam na lelut laglag tabara idid weper ei weumi: nale karim weumi a pako debe mirge e ya tabara idid watirpei.
36Nako lelut agekar sikak wadawer ese abi kemerkemer able gesep obakwar ei weumi? Nolekar!
37Lelut umerkak tabara idid ko wairapei.
38Nale yabialam able mitkar witwit a seksek lelam kari wanatuak a pako kara mir, Lera Werem dali ei abi ya watidituak nade e watabakiamu muige taba Babi zoromge taba zogozogo angela kem.
