Mak 8:1-26

¹Udu bolo len doh iri lau solo-an labai atukum ame le hawen. Iri ado, ya iri nyamon ta aimon bwai. Eme Jises luhi oro lau tan ala hawen, ma iy asehek i toro i buku doh,

²“Jo tikisi iri lau dah. Iri an hawek ndra winiya len taloh ai, ma niri nyamon ta aimon bwe.

³Ya i buku none jo katiye iri ma son tiri ka-au ka kon tiri, kora-on mada iri kabuluw ya iri kataku kado san, tasah iri rayah mene ame, san tiri lawe-en labai.”

⁴Eme oro lau tan anya, “Kon dah lau aliy bwe. Are lau kameh winiyan salahani niri nyamon udu bolo kon lomale an le dah?”

⁵Eme Jises ndremenyani oro, “Nado jabi ramen sabe udu aliy?” Eme oro anya, “Ndro taloh le.”

⁶Eme iy tiye i tiri lau mwan ma badih kamanyah kado andri bada munyak. Eme iy andrei jabi ramen ma ndro taloh dah, eme iy edeu wurah i ta Kindrei. Ano iy boso-ei ma atehei ili mine oro lau tan, ma oro adeu ili niri lau.

⁷Oro ale ni toro ra-on udu aliy, eme Jises asehek sahou ta nyosowan i ta aliy. Ano iy tiye oro lau tan adeu i le winiya iri.

⁸Eme iri aimon ma ndrine iri idih. Ano oro lau ta Jises tukumwi tikibwah tiri erah asahan i bwak ma ndro taloh.

⁹Ya kane iri lau nane doh i buku hawa (4,000). Ano iy tiye iri lau mwan ma badih au ala hamon ala kon tiri.

¹⁰Eme Jises i bolo ndron ra-ei hawe oro lau tan ma oro au ala loboho kon Dalmanuta.

¹¹Ano iri Parasi ame ya andres hawe Jises. Iri anya kanone iy ma iri ndremenya iy kamekes kalem badu kandrah ta leheya buku none iy amekes gok ta Kindrei handru.

¹²Eme ya budon tan ihis in bolo ndrinen o-on, eme iy anya, “Ki buku sah handru iri lau mwan ma badih ta len dah anya katou kalem? Jo tiye tado handru en! Idah kameh kalem handru winiyan basahan tiri lau na len dah bwai.”

¹³Eme Jises ruwani iri Parasi areu, ma iy i ndron ma iu i len ili kapa gwa li bilisiu.

¹⁴Ya oro lau ta Jises ndramaniy ta akohok jabi ramen, oro andrei rabah le i ndron.

¹⁵Eme Jises anya, “Mada ado kaleu ta yis tiri Parasi ma ta Herot.”

¹⁶Eme oro tiye nyala oro ari ari, “Sebwe iy amekes sahou doh tasah to bakohok jabi ramen bwe nadeh?”

¹⁷Eme Jises tanan ta sahou nane oro asehek, eme iy tiye i toro, “Buku sah handru ado asehek, anya ado jabi ramen bwe? Sebwe mada ado baleu bwe le nadeh? Bar tado boto-on?

¹⁸Ado mada ado udu aliy ya ado batou bwe? Ma ndranye ado udu aliy ya ado banuhun bwe?

¹⁹Ado ndramaniy ja, ta jo mene boso-ei jabi ramen ma limeh i niri lau ma lamawa (5,000) mene deh bwe? Ya bwak sabe mene erah ado andrei?” Eme oro anya, “Ma ronoh la-uh.”

²⁰“Ya ado ndramaniy ja ta jabi ramen ma ndro taloh i niri lau ma hawa (4,000), ma bwak sabe mene erah ado andrei?” Eme oro anya, “Bwak ma ndro taloh.”

²¹Eme Jises tiye i toro, “Budon tado kede-eh baleu bwe le?”

²²Ano Jises hawe oro lau tan au ala asahan Betsaida. Eme ma iri lau ra-on sirini ndramak ari madan kaseu, ya oro tiyani iy eme hawe Jises. Ma oro tiye i ta Jises i buku doh: “Aso aso-ok ou atehei minem kili bwele-e iy ndramak dan op.”

²³Eme Jises tawi mine ndramak madan kaseu nane dah ma sirini iy eme len ta kon. Eme Jises sakaruk i madan ma atehei minen i bwele-e madan, ma iy anya, “Ou atou ari lakou deh bwe?”

²⁴Eme ya iy anyolom i loke ma iy anya, “Ehe, jo atou iri lau, iri a buku none kei adek ma seselek laleyah.”

²⁵Ano ja Jises atehei minen i bwele-e mada ndramak dah ja, ma ndramak dah madan atau i loke eme ma iy anyolom lakou amwenen mara-ei.

²⁶Eme Jises anya, “Ou au ala asiu tam ya ou sala bolo kon.”