MALUKO 8:1-26

¹Mazua madodo hamwande, dale kulu diyagwe da wanhu waiting'hana hamoja. Wanhu wakala wabule kinhu chochose cha kuja, Yesu kawakema wanahina zake kawalongela,

²“Nowonela bazi wanhu wano, kwavija wakala na nie mazua madatu, na kipigiti kino wabule kinhu cha kuja.

³Nihawalongela wachole mkae zao na nzala, wosinduka mnzila, kwavija wayagwe walawa kutali.”

⁴Wanahina zake wamuuza, “Muluwala luno kwahi munhu kondayazahile mandia ga kuwagwelela wanhu wose wano?”

⁵Yesu kawauza, “Mikate mingahi imulinayo?” Wamulongela, “Mikate saba.”

⁶Yesu kadilongela didale da wanhu dikale hasi. Abaho, kaisola ija imikate saba, kalonga hewela ha Mulungu, kaimogola na kuwagwelela wanahina zake wawagolele iwanhu, na wanahina watenda kamba viwalagizwe.

⁷Vivija wakala na visomba vidogodogo. Yesu kalonga hewela ha Mulungu, vivija kawalongela wanahina zake wawagolele iwanhu.

⁸Wanhu wose waja weguta, wanahina zake wadondola, wamemeza migelo saba ya vakuja visigale!

⁹Wakala wanhu alufu nne. Yesu kawalaga iwanhu wachole kumwao.

¹⁰Kipigiti kikija kakwela mngalawa hamoja na wanahina zake wachola muisi ya Dalumanuta.

¹¹Mafalisayo wamcholela Yesu wasonga kuibamilila nayo. Wamwikila vitega wamulonda yatende mzonza wone kamba Mulungu kamtogola.

¹²Ila Yesu kabweza mhumuzi, kalonga, “Habali wanhu wa mazua gano wolonda mzonza? Haduhu, Nowalongela! Haduhu ikweli yondamgweleligwe!”

¹³Abaho, kawaleka, kakwela muna ingalawa na kasonga kuloka mwambu uyagwe wa idilamba.

¹⁴Wanahina wakala waisemwile kusola mikate na wakala na mkate umwe mngalawa.

¹⁵Yesu kawazuma, kawalongela, “Iteganyeni na mela da Mafalisayo na mela da Helode.”

¹⁶Wasonga kuilongela wenyego kwa wenyego, “Kolonga vino kwavija twabule mikate.”

¹⁷Yesu kagatanga gaja gawakalile wolonga, avo kawauza, “Habali mulongelela avija vimulibule mikate? Ham'vimanya ama hamnavitanga? Mwabule nzonzi?

¹⁸Muna meso ila hamulola? Muna magwiti ila hamuhulika? Muisemwa

¹⁹avija viniimogole imikate mitano? Na kuwagwelela wanhu alufu tano migelo mingahi ya imikate isigale imdondole?” Wamwidika, “Longo dimwe na mibili.”

²⁰Yesu kawauza kabili “Na vinimogole imikate saba na kuwagwelela wanhu alufu nne, migelo mingahi imemile ya imikate isigale imdondole?” Wamwidika, “Saba.”

²¹Yesu kawauza, “Mng'hali hamnavitanga?”

²²Wavika Betisaida, wanhu wamgala munhu kimbugumbugu ha Yesu, wamuyalalila yamkwase.

²³Yesu kamgoga mkono ija imunhu kimbugumbugu, kamgala kutali na ikiwambo. Kamtemela visite mmeso, abaho, kamwikila makono gake, kamuuza, “Kodaha kulola kinhu chochose?”

²⁴Ija imunhu kalola uchana kalonga, “Nowona wanhu, ila wokoneka kamba mibiki itembela.”

²⁵Yesu kamwikila makono mwanza uyagwe mmeso, mwanza uno kaiyoha kubunhula, na meso gake gananazuka, kadaha kulola goya kila kinhu.

²⁶Abaho, Yesu kamulagiza yachole ukae yomgong'ondeza, yolonga, “Sambiubweleganye muna ikiwambo.”