Mak 8:1-26

¹Ana e pogos tai, pupia p̃ina na yeririna la moki apimi sina pu Yesu, la asum̃a amio pano-o, viso kar la, ana la pe kala kinanen re poli. Ana Yesu pio kiena nalogena la apimi lavisi puna, pisa pan la pisape

²“E, in na sineu miye p̃ina la nini pap̃isi, komin nap̃a la asike amio ita legiena telu p̃aro rui, kala kinanena la p̃isi.

³Ana visae netam̃an la ava um̃a m̃ala nap̃a pe akinana re sanene poli, pona lap̃as viso kar la e mrapa komsusa, kilamarala malko, komin lap̃asia m̃ala um̃a la sike koperina pap̃isi.”

⁴Ana kiena nalogena la apisa pania, asape “?Ana tevagan yeririna la nene e yo korena nini sanape ne?”

⁵P̃isi na naga piun tan la, pisape “?Amiu amlarar ke kilaparavi via?” Ana la apisatam̃ea “Olua ga p̃a.”

⁶P̃isi na Yesu pisa pan p̃ina moki la nene, pisape “Amiu atotano e yo nene wa.” Naga mla kilaparavi la olua nene, pisa potena pan Ntewa panonia, p̃isi na kawewowaia, kian pan kiena nalogena lala vena akianlelein van yeririna lala, p̃isi na la apion tetain pan la.

⁷Ana la amla m̃ena narin satin lua la ga e pogos nene, a Yesu mlotuwo m̃ena ga, pisa pan la sape ava avionlelein m̃ena ga van yeririna lala.

⁸Ana la nap̃a akinana pano-o, mep̃ela la kawa, ana korkoro kinanena nap̃a akanligania, ap̃ar akon pa e karo olua.

⁹Ana la nap̃a akinana e pogos nene tol sane manu vari. P̃isi na Yesu miila si p̃ina la nene ap̃asup̃e si m̃ala um̃a lala,

¹⁰ana naga pa e kiela wa, amio kiena nalogena lala, apetan yo nene, akusro apa atol yo tai nap̃a kiena ki Talmanuta.

¹¹Ana e pogos tai, le Varasi lap̃asia apim asape agorua Yesu, asape atap̃ali m̃ena ga naga, ana la apisa asape “Imimi sinemimin mesape okilali pupia kile tai van imimi, nap̃a sane okila e puriu kawaena nae ma e peni.”

¹²Ana Yesu naga miyuveve pa kona, sa nap̃a sinena maren la pa rui, naga pisatam̃e la, pisape “?Sanape na amiu na nanagane, sinemiun asape avisu kile tai ne sanene? Nepisa ke pe lelaga pan amiu, sane peraga, yoko kiamiu lus la na nanagane tap̃atete avisu kile tai.”

¹³Ana Yesu pure petan la mligan la asike na, pa si e wa, pa kusro lapa komp̃asia pa lepas na vano.

¹⁴Ana pogos nap̃a la apetan yo nene apa atol komp̃as nen lapa nene, amilan sane sinela pon nawararen kala kilaparavi p̃asia amio la, ana la amlarar ga kilaparavi taaga teke amio la e wa.

¹⁵Ana Yesu pisa visena tai pan la, pisape “Amiu monar avisuar ruru amiu, vanon is kiena ne le Varasi la amio Erot.” Yesu pisa is nene, kana kinasia p̃elaga viowa kiena ne nasumonena lala, ana nalogena la pe asitom kilia re poli.

¹⁶La amloge visena nene, apisayu ke pan la, apisape “Pona naga pis sanene vanon ita pe top̃ar re kilaparavi lap̃as pimi poli yo.”

¹⁷Ana Yesu kilia m̃a kiela sitomena lala, p̃isi na pisape “?Amiu apisayu ke asape ita pe top̃arar re kilaparavi komin ya? ?Sanape, amiu pe amloge kilia re poli, pona pe apisu kilia re sur la poli wa? !Sinemiu la m̃arera pap̃isi wa!

¹⁸Amiu kilamaramiu la sike na, ana apisu kilale re sur poli, ana kiligamiu la sike na, ana amloge kilia re sur poli. ?Pona amiu pe asitom̃al re si sur la nap̃a nemiyum̃aen pan yeririna la poli?

¹⁹?Pogos nap̃a nekiantetain kilaparavi lima nanua ne pan yeririna la manu lima nap̃ane, akan pano-o mep̃ela kawa, ana akon korkoro kinanena la nene pa e karo via?” La apisatam̃ea, asape “Imimi mokonkonia lualima taaga pa lua 12.”

²⁰P̃isi na naga piun sina ga, pisape “?A pogos nap̃a lala manu vari nanua ne akan kilaparavi olua ga nap̃ane, p̃isi na amiu akon si karo via?” Ana la apisatam̃ea, asape “Imimi mokonkonia olua.”

²¹Ana naga pis pan la, pisape “?Pogaga, ana sanapen nanagane? ?Amiu akiliali m̃a sur la nene, pona pere ke ga wa?”

²²Ana Yesu la apam atol pulkumali nene, Petsaeta. Ana la nae yo nene, a sumon kilamara kata tai pimi puna, atagi pania vena tol ruru yaru nene.

²³Ana Yesu tarar limana ne kilamara kata, sumon naga pano, la lua amiyuve kumali apa lepas na vano. P̃isi na Yesu mla wasirina, mligan e kilamaran yar luwoka nap̃ane, mligan liman tea, ana piun petania, pisape “?Sanape, ko na opisu ke suria, pona pere ke ga wa?”

²⁴Ana yar nap̃ane kirava, kira pisu suri lala, naga pisape “Ee, nepisu ke yar lala, ana nepisu la sa ga purp̃es nen laki la amiyal ke na.”

²⁵Ana Yesu mligan si limana e naga, yam luania, p̃isi na yar nene kilamarana pimi po ruruia, naga kilia kira pisu si suri lala, kira pisu la merarava po na po pap̃isi.

²⁶Ana Yesu pisa pania, pisape “Yoko ko ove ova re si ovisu la nene gar um̃a, oto mesmes ga mom̃a.”