Marcos 8:1-26

¹Chupa taq laꞌ la qꞌij xkimol kibꞌ ukꞌiyal tikawex. Y ruma na jinta kiwa re kakitijo, ri Jesús xebꞌusikꞌij rutijoꞌn y xubꞌiꞌij chike:

²—Lik kajuchꞌ kaꞌn nukꞌuꞌx chike wa tikawex ma e urox qꞌij waꞌ e kꞌo wukꞌ y na jinta chi kiwa.

³Yey we e laꞌ kebꞌenutaq bꞌi chikocho y na jinta kꞌo kitijom, riꞌ kebꞌeꞌqꞌochqꞌobꞌ pa bꞌe, ma e kꞌo jujun chike lik naj e petinaq wi —xchaꞌ.

⁴Rutijoꞌn xkibꞌiꞌij che: —Pero, ¿pa kariqitaj wi wa re ketzuq wa ukꞌiyal tikawex? Ma chupa wa luwar na jinta ne kꞌo e jeqelik —xechaꞌ.

⁵Ri Jesús xutzꞌonoj kꞌu chike: —¿Janipa chi pam kꞌo iwukꞌ? —xcha chike. —Wuqubꞌ —xecha rike.

⁶Ewi ri Jesús xtaqan che ketzꞌuyiꞌ ri tikawex chuꞌlew. Xukꞌam kꞌu ri wuqubꞌ pam y xtioxin chwach ri Dios. Tekꞌuchiriꞌ, xuwechꞌ upa y xuya chike rutijoꞌn chaꞌ kakijach chike rukꞌiyal tikawex; y rike e xkiꞌano.

⁷Yey kukꞌaꞌam ne jujun raltaq ko kar. Ekꞌu ri Jesús xtioxin chwach ri Dios puwi waꞌ y xtaqan kꞌu che kajachiꞌ chike ri winaq.

⁸Xewaꞌ kꞌut y lik xenoj chi utz. Tekꞌuchiriꞌ, xmol ri chꞌaqaꞌtaꞌq kiqax y rukꞌ waꞌ xnoj wuqubꞌ chakach.

⁹Ri xewaꞌik, laj e juna kajibꞌ mil tikawex. Ekꞌu ri Jesús xebꞌuchꞌaꞌbꞌej kanoq,

¹⁰xok kꞌu bꞌi chupa ri barco kukꞌ rutijoꞌn y xebꞌek pa taq ri luwar re Dalmanuta.

¹¹Kꞌo jun qꞌij ri fariseos xebꞌopon rukꞌ ri Jesús y xkijeqo e laꞌ xa pa chꞌaꞌtem kakichap pa chꞌaꞌoj. Xkitzꞌonoj kꞌu che kuꞌan juna kꞌutubꞌal re chilaꞌ chikaj chikiwach chaꞌ kaqꞌalajinik we Rire taqom lo ruma ri Dios; waꞌ xkiꞌano xa re kꞌambꞌal upa.

¹²Ekꞌu ri Jesús lik xukꞌis ukꞌuꞌx y xubꞌiꞌij chike: «¿Suꞌbꞌe ri tikawex re waqꞌij ora e kakitzꞌonoj kanꞌan juna kꞌutubꞌal chaꞌ kaqꞌalajinik we intaqom lo ruma ri Dios? Paqatzij wi kambꞌiꞌij chiwe: Na jinta juna kꞌutubꞌal kayaꞌtaj chike» xchaꞌ.

¹³Ewi xebꞌuya kanoq, xok tanchi ubꞌi chupa ri barco y xqꞌax chꞌaqa yaꞌ.

¹⁴Ekꞌu rutijoꞌn ri Jesús xikꞌow chikikꞌuꞌx kakikꞌam bꞌi pam y xa jun chi pam kꞌo kukꞌ chupa la barco.

¹⁵Ewi ri Jesús xebꞌupixabꞌaj, jewaꞌ xubꞌiꞌij chike: «Lik chichajij iwibꞌ chwa ri “levadura” ke ri fariseos y chwa ri “levadura” re ri Herodes» xchaꞌ.

¹⁶Rutijoꞌn xkibꞌiꞌij kꞌu chikiwach: «Kubꞌiꞌij waꞌ ma retaꞌam na jinta pam xqakꞌam loq» xechaꞌ.

¹⁷Ri Jesús xretaꞌmaj saꞌ la kakichꞌaꞌtibꞌej chikiwach y xubꞌiꞌij kꞌu chike: —¿Suꞌbꞌe kichꞌaꞌtibꞌej chiwach puwi ri na xikꞌam ta lo pam? ¿Kꞌamajaꞌ nebꞌa kimaj usukꞌ? ¿Lik kami kꞌa chꞌuqutal rinaꞌoj?

¹⁸Kꞌo waꞌ kꞌu iwach yey e pachaꞌ na kixtzuꞌn taj. Kꞌo waꞌ kꞌu ixikin yey e pachaꞌ na kixtan taj. ¿Lik nebꞌa na kakꞌun ta chikꞌuꞌx

¹⁹echiriꞌ xinjach ri woꞌobꞌ pam chike ri woꞌobꞌ mil tikawex? ¿Janipa kꞌu chakach xinojisaj rukꞌ ri kiqax? —xchaꞌ. Rutijoꞌn xkikꞌul uwach: —Kabꞌlajuj chakach —xechaꞌ.

²⁰Xutzꞌonoj tanchi chike: —Yey echiriꞌ xinjach ri wuqubꞌ pam chike ri kajibꞌ mil tikawex, ¿janipa lo chakach xinojisaj rukꞌ ri kiqax? —xchaꞌ. Rike xkikꞌul uwach: —Wuqubꞌ chakach —xechaꞌ.

²¹Jekꞌuwaꞌ xukꞌisbꞌej kukꞌ: —¿Suꞌbꞌe kꞌu riꞌ kꞌamajaꞌ kꞌana kimaj usukꞌ? —xcha chike.

²²Tekꞌuchiriꞌ, xebꞌopon pa ri tinamit Betsaida. Taq ri winaq xkikꞌam lo jun potzꞌ chwa ri Jesús y xebꞌelaj kꞌu che chaꞌ kukunaj.

²³Ekꞌu ri Jesús xuchap ruqꞌabꞌ ri potzꞌ, xresaj bꞌi chupa ri tinamit y xchubꞌan che taq ruwach. Tekꞌuchiriꞌ, xuya ruqꞌabꞌ puwiꞌ y xutzꞌonoj che we karil kꞌenoq.

²⁴Ri potzꞌ xtzuꞌn pana chwach y xubꞌiꞌij: —Kebꞌenuwil rachijabꞌ pachaꞌ chi e cheꞌ kebꞌinik —xchaꞌ.

²⁵Ri Jesús xuya tanchi ruqꞌabꞌ puwi ruwach ri potzꞌ. Jekꞌulaꞌ ri potzꞌ xkunutajik y utz xtzuꞌnik. Xtzuꞌn kꞌu pana naj y xril ronoje chi utz.

²⁶Tekꞌuchiriꞌ ri Jesús xutaq bꞌi chirocho y jewaꞌ xubꞌiꞌij che: —Matok bꞌi pa ri tinamit y matzijoj ne kꞌana che junoq e riꞌin xatinkunaj —xcha che.