Mak 8:1-26

¹Na tinine pukakiarla ning, a tnan kunum a tarai la hanot taum, pa belal utna na hangan sur lar ieni. E Iesu i kabah pas anuna kakak a asaerla teteki pa i atai la mang,

²“A maris kol a taraila ne, anasa la ka kes taum hok te natol a pukakiar, pa belal utna sur lar ieni.

³Ning ar sune sen la sur anunla na hanhanua taum ana munurak, lar suah mat ting na ngas, anasa dingla onla, la hanot miting na bakbak.”

⁴Anuna kakak a asaer la dekeni mang, “Mitaha al utna na hangan sur dalar tabar la ono? Anasa a hanua bel ka ine.”

⁵E Iesu i deken la mang, “Naisa bret ning mulo losi?” La kelesi mange, “Dionomahis ka.”

⁶E Iesu i atai a kunum a tarai sur lar kes ting na piu. I kibas pas mais a bret, i atong wakak pas onoi tetek e God, i tibiki pa i sarani tana anuna kakak a asaerla, sur lar tabar a taraila ono. Pa la tol soti.

⁷La los pas naisa na nanatara sis otleng, pa i atong wakak pas ono, pa i sarani sur lar asaurani tana taraila.

⁸A tarai la hangan pa la masur. Lamur a kakak a asaer la song bukus pas mais a rat ana mah a utna na hangan.

⁹A wawas ana tarai ka i arlar ana diat a rip, ika a gurarala pa kakakla otleng la hangan taum onla. Pa lamur e Iesu i sune sen la.

¹⁰E Iesu taum ana nuna kakak a asaer la kas uting na mon, pa la han utumo na papar Dalmanuta.

¹¹A Parisaiola la hanot tetek e Iesu pa la arlak na warwara tataum ono. La mang sur lar tohi. La nunungi sur ir tol ta akinalang sur ir asangani mang i misaot na langit.

¹²E Iesu i ngoro pa i mang, “Sur asa a tarai tagun anone la nunung sur ar tol ta akinalang? A atong momoli ta mulo, bel dir tol ta akinalang ta mulo.”

¹³Pa i kas ulak ana mon, pa la han kusun la utumo na ris a puka tasi.

¹⁴A kakak a asaer la dumani sur lar los al bret, takai sot ning la losi ting na mon.

¹⁵Pa e Iesu i warwara na tumarang tetek la mang, “Mulor tumarang ana is anuna Parisaiola pa e Herot.”

¹⁶Pa la warwara taum ana kamkama warwara ane Iesu, pa la atongi mang, “I atongi larning, anasa belal bret andalai.”

¹⁷E Iesu i tasman anunla warwara pa i atai la mang, “I mangasa ning mulo atongi manga belal bret? Bel mulo tasmani, pa belot mulo talapor? I mangmangasa ning mulo tagar a nuknukimulo sur gong mulo kibas anuk na asasaerla?

¹⁸A matamulo i kes, ika bel mulo tai ono. A talngamulo kaning ika bel mulo longor ono. Mulor nuk pasi:

¹⁹Ning a kibik dilima na bret tetek dilima na rip a barsan, naisa rat ning mulo song tari ana mah a utna na hangan?” La kelesi mange, “Ning a bonot pa pisir naur.”

²⁰Pa e Iesu i deken la mange, “Ning a tibik mais a bret tetek diat a rip a tarai, naisa na rat ning mulo song tari ana mah a utna na hangan?” La kelesi mange, “Mais a rat.”

²¹Pa i deken la mang, “Belot mulo talapor?”

²²E Iesu taum ana kakak a asaerla anunai la hanot tisa e Betsaida, pa a tarai la ben pas ning a matanakut teteki, pa la nunungi sur ir suah a kuna saot ono sur ir tai.

²³I tong pas a kuna kut, pa i ben maskani kusun a hanua. Ning ka namis tar naur a matana pa ka suah tar naur a kuna ono, i dekeni mang, “U ka oroi ta utna?”

²⁴Pa a barsan ning i tai tostos, pa i atongi mang, “A oroi a tarai lar a rakaila ning la han.”

²⁵E Iesu i suah ulak naur a kuna ona matanakut, pa a matana i bot talapor wakak, pa i oroi a utnala rop.

²⁶E Iesu i sune sen a barsan ning, pa i atai i mang, “Ur han tostos sur anuma rumai. Gong u han ting na tinine hanua.”