San Marcos 8:1-26

¹Se tonale omololojkej miekej tlakaj iwan mach okipiayaj tlan kikuaskej, Jesús okinnotzke imomachtijkawan iwan okinmilwij:

²―Nikinmiknomati in yinmej tlakaj ya kipiaj eyi tonale nowan iwan mach kipiaj tlan kikuaskej.

³Tla amo nikintlamakas iwan nikinmilwis ma wian inchan, welis kuatleyuiliskej ipan ojtle, porke sekimej de yejwan owalajkej de wejka.

⁴Imomachtijkawan okilwijkej: ―Nian mach akaj chanti, ¿kan tikkuitiwej pan para tikintlamakaskej?

⁵Jesús okinmilwij: ―¿Keski pan ankipiaj? Yejwan okijtojkej: ―Chikome pan.

⁶Ijkuakón okinmilwij in tlakaj ma motlalikan. Okitilanke in chikome pan iwan omotlasojkamatke inawak Dios, okipojpostekke in pan iwan okinmakak imomachtijkawan para ma kinxejxelilikan in tlakaj iwan yejwan ijkón okichijkej.

⁷Noijki okinpiayaj sekimej michintzitzintin. Jesús noijki omotlasojkamatke inawak Dios iwan okinmilwij imomachtijkawan ma kinxejxelilikan in tlakaj.

⁸Nochtin kuale otlakuajkej asta oixwikej. Iwan satepan okololojkej tlan osobraroj iwan asta otenke chikome chikiwitl.

⁹Otlakuajkej kej nawi mil tlakaj. Iwan satepan Jesús okinmakaj.

¹⁰Satepan Jesús otlejkok itech se barko iwan imomachtijkawan iwan oyajkej. Iwan oajsitoj se lugar itoka Dalmanuta.

¹¹In fariseos oejkokej inawak Jesús iwan opéj Iwan motlatlajtolkuepaj. Okitlajtlanilijkej ma kichiwa se milagro kej se señas para kitaskej nik melawak kichiwa ika ipoder in Dios.

¹²Jesús oelsijsij iwan okinmilwij: ―Namejwan ankinekij annechtlajtlakolmayawiskej, annechtlajtlaniliaj se weyi milagro. Ipan melajka namechilwia ke namejwan mach ankitaskej nion se milagro de ilwikak.

¹³Ompa okinkajtej iwan oksemi otlejkok itech barko iwan opanok oksé lado de yen lago de Galilea.

¹⁴Imomachtijkawan in Jesús mach okitkikej pan itech barko, porke okelkajkej iwan okitkikej san se pan.

¹⁵Jesús okinmilwij: ―Ximotlachilikan de itech inlevadura in fariseos iwan de itech ilevadura in Herodes.

¹⁶Imomachtijkawan opéj kimolwiaj se iwan oksé: ―Ijkón techilwia porke otikelkajkej in pan.

¹⁷Jesús okimatia tlan okiyejyekoayaj iwan okinmilwij: ―¿Tlanik ankimolwiaj ke ankelkajkej in pan? Wel ankuatlakuawakej, mach ankimomakaj kuenta.

¹⁸Ankipiaj anmixtololowan pero mach antlachiaj. Ankipiaj anmonakaswan pero mach antlakakij.

¹⁹Xikelnamikikan nijkuak onikinpojpostekke in makuile pan iwan onikinmajmakak makuile mil tlakaj para ma tlakuakan. ¿Keski chikiwitl otenke de pan katlej osobraroj? Yejwan otlanankilijkej: ―Majtlaktle iwan ome chikiwitl.

²⁰―Iwan nijkuak onikinpojpostekke in chikome pan para nawi mil tlakaj, ¿keski chikiwitl otenke de yen pedasos katlej osobraroj? Yejwan okilwijkej: ―Chikome chikiwitl.

²¹Ijkuakón okinmilwij: ―¿Mach ya ankimomakaj kuenta? ¿Ankiyejyekoaj Nej nitlanemilia por amo ankualkuikej in pan?

²²Satepan owalajkej itech pueblo de Betsaida, iwan okualwikilijkej se tlakatl katlej mach tlachia, okitlatlawtijkej in Jesús ma kintlali imawan ipan yon tlakatl para ma pajti.

²³Jesús okimatilanke iwan okixtij de itech yon pueblo. Satepan okitlalilij ichijchi itech ixtololowan, okintlalij imawan ipan iwan okitlajtlanij kox ya weli itlaj kita.

²⁴Ijkuakón opéj tlachia iwan okilwij: ―Nikinmita in tlakaj kej kuanmej iwan nikinmita nejnemij.

²⁵Jesús oksemi okintlalij imawan ipan ixtololowan yon tlakatl iwan okinawatij kuale ma tlachia. Iwan ijkuakón yon tlakatl opajtik iwan opéj kuale tlachia.

²⁶Ijkuakón Jesús okititlanke ma wia para ichan, iwan okilwij: ―Amo xikalaki itech pueblo iwan amo akaj itlaj xikilwi.