Mareko 3

1

2

3

4

5

6

7

8

9

10

11

12

13

14

15

16

¹MRK 3.1-6 Iesu ge ko bakiamuda sunagoge badari, ege le ge tadawer abra netat tag auserauser.

²Wader le ge turder wi laglag urder Iesui ikelare e seksek ikeli, wige abi lidem dasmerlare ya waiakaida wi wadasmerda ese e able le waidgiri Sabadge.

³Iesude able tag auserauser le ikaidari, “Ma ekwei a kei taragem kikemem.”

⁴Ege Iesude le nautmerda, “Nalu debeiu ikeredi merbi Gelarge pe merbi dikereda ma Sabadge ikerer? A nalu adudlu? Nako e debele ikeredi ma lera idid daseserder? A debele ikeredi ma abi ipit?” Wige nole abi mir ikwarda.

⁵Iesude yabi lidem darasmerlare urkerurker, e eudi akaida okasosoksosok baidari ableglam wi nole umerkak urder. Ege eudige able le ikaida, “Ma mara auserauser tag itrimurik.” Ege abra tag dakaida sikak baidari.

⁶Nade Parasaio gize sunago dikaireta, wige baka dudumdudum obapita wader Erodi lekem, a wige mir ipulare nako wi Iesu waipita.

⁷MRK 3.7-12 Iesu a abra memegle adem bakiauda Galailia keperem ege auka mitkar legize yabi narmirlare. Wi tabakiauda Galilaialam, Iudaialam, Ierusalemalam, Idumialam, able gedlam Ioridanoge apekge a able gedlam pe Taia a Saidon ge naridwerteda. Able au kub lera tabakiauda Iesuim ableglam wi wasolare e able lu waikere.

⁹Iesude tabara memegle daratagerda wi kebi nar wadirsirda abim ya waiakaida legize umerkak abi waitmagda.

¹⁰E mitkar le ge nadgilare, a gair gimgim le mena tabakeslare abim ya waiakaida wi abi waitutirda.

¹¹A gair kerkerge na lera ge dimoni urder yabidoge abi erdarlare, wi kokmamu bamrer abi opem ererbakrier, “Mamanali Adira Werem!”

¹²Iesude dimoni aler daratagerlare, “Wa nole le daratagrawem kaka nete nali.”

¹³MRK 3.13-19 Ege Iesu baka paserge ogi a tababim le darabgerda ge e laglag dawer, wi abim tabakiauda.

¹⁴Egeyabialam 12 kaimegize natutidarda. E yabi daratagerda, “Ka wabi ditutidarda wa karidoge uridwa. Ka yako wabi damarkare adem marauarmem, a waba ya sasrim wanagri ko dimoni adem islare.”

¹⁶Able 12 pe uridli ge Iesui natutidarda: Saimona (Iesude abi nei itkiri Peteru),

¹⁷Zemis a abra barada Zone, Zebedaiora neis werem darali (Iesude yaba nei ditkiri Boanagiz, pe dikeredi Girgirira Werem).

¹⁸Andru, Pilipo, Batolomu, Mataio, Tomas, Zemis (Alepaiara werem), Tadaio, Saimona able Zelotle,

¹⁹a Iudas Iskariota, ge e keubu akaida Iesi dipi.

²⁰MRK 3.20-30 Iesu a pako abra memegle bakiauda metaem. Wi umerkak lewer wairoda ablelam au kub lera etami muige metage.

²¹Legize able mir Iesura buai daratagerlare. Wi detautlare, “E akaida peimpeim baidari!” Ableluglam abra buai tabakiauda mirem abi wairpeirare a waigareda gedim.

²²Able kerkerge wader Aotarle tabakiauda Ierusalemalam. Wi mir igiarlare, “Beelzebul pe Iesui doge dali. E dimoni adem daramaidere able dimoni kirimlera sasrim abidoge dikeredi.”

²³Ableluglam Iesude yabi darabgerda tababim ege yabi daratagelare mir abisir miru. E yabi daratagelare, “Satanade umerkak Satana adem waimu ko ei umerkak mena kelarkelar wadawer.

²⁴Ese wader gedle obaskare mogmog ober a tabara obareslare, able gedle waiakai sasrimkak obai.

²⁵Ese wader netatbuai obaskerare mogmog ober a tabara obareslare able netatbuai waiakai sasrimkak obai.

²⁶Able tonarge, ese Satanade tabara le wanarsare, e waiakai sasrimkak obai a abi sasrimira mop wadikereder.

²⁷Ese nale mirem aukelarkelar le metage obau ko abra lu erwamer wadais, e kikem able aukelarkelar le lageru wadidbar. No pe dikeredi e umele aukelarkelar lera lu erwamem wadais.

²⁸Ka wabi agekar detagreda; Adide umele le omar ge waikai witlam a taba gair Adi opmir atagerlam.

²⁹Adide umerkak wit wadimaidered pe legize Lamar Zogoi opmir detagreda. Yaba witira bodomalam pe niaiem dikeredi.”

³⁰Iesude able mir detauti ableglam wi Lamar Zogoi dabgelare dimoni dali.

³¹MRK 3.31-35 Ege Iesura ama a wader barada tabakiauda ga adge tikweider. Wi miraisisle emarikdarda muiem oba Iesui adem watismeda.

³²Able lera kub ge emreder Iesui dairumaretlare a wige abi detagerda, “Ma dasmer, mara ama a barada pema adge tikwedi a wi laglag mari mir wanatagrare.”

³³Iesude eudim detauti, “Nete kara agekar ama dali? Nete kara agekar barada dali?”

³⁴Ege e le darasmerlare ge abidoge emreder ege detauti, “Wa dasmerare kara agekar ama a barada.

³⁵Netide Adi irmili e pe kara barada dali, kara sisi dali a kara ama dali.”